المكونات
كوب ونص طحين
نص كوب زبدة ذايبة + ملعقتين طعام زيت
ربع او نص كوب سكر بودرة حسب رغبتكم
انا عجبني نص كوب وبعضهم عجبهم ربع كوب
بيضة وحدة
ملعقة ص بيكنغ باودر
فانيليا
هيل
معجون تمر
الطريقة
نخلط الزبدة والسكر مع بعض انا ضفت لها ملعقتين طعام زيت
بعد الخلط ضفت البيضة والفانيليا والهيل
ونستمر بالخفق حتى يصير مثل الكريمة
اخر شي نضيف الطحين والبيكنغ باودر ونخلط
نكون مجهزين معجون التمر
وهو تمر منزوع النوى مع ملعقة هيل وملعقتين زبدة
والحين نبدا نحشي
وقبل لا نبدا نشغل الفرن على درجة حرارة 180 ونخليه جاهز لاستقبال المعمول
ناخذ كرة صغيرة من العجينة ونفردها ونحشيها بالتمر
ونحطها بالة المعمول ونخليها تاخذ الشكل
ما قدرت اصور الا بعدما انتهيت لاني محد معاي في المطبخ ويدي كلها زبدة
بس اكيد كلكم تعرفون الطريقة ماشالله عليكم:)
المهم نصفها في صينية مدهونة
ندخل الصينية الفرن لمدة ربع ساعة
ويازين ريحة الهيل
&
المعمـــــــــــــــول
هو حار حلو
وهو بارد حلو
وبعدما بردت بديت الف بالورق المشمع لاني بوديها الليلة حق امي وخواتي
ونتقهوى عليها باذن الله
الْحَمْدُ لِلَّهِ الَّذِي أَطْعَمَنِي هَذَا وَرَزَقَنِيهِ مِنْ غَيْرِ حَوْلٍ مِنِّي وَلَا قُوَّة
شكله يشهي تسلم يدك يانور الفجر