مع الأولى شيء ومع الثانية شيء ثاني

مساء الخير لكل بنات حواء


باقول لكم قصة ماهي مشكلة ولاهي تخصني وتخص واحد من الأهل

وأحسه فاقع مرارتي والله صدق الرجال مامنهم آمان ومايبان الزين في عيونهم

الرجال دائماً يفكر في نفسه أول يعني بالصريح أكثر الرجال أنانيين

وباقول لكم القصه علشان تعرفون شخصية الزوجة لها دور في معامله زوجها لها


وبسمي هالرجال ( خالد) وهذا ماهو اسمه الحقيقي


نبدأ


من الثانوية كان خالد يبي يتزوج وكل يوم يفتح السالفة على أهلة ,,,, وكل ماحالوا يقنعون فيه يتخرج ويشتغل وبيزوجونه كان رافض يقتنع ,, وأبوه قال له محد بيوافق عليك وأنت توك بالثانوية ومابعد تخرجت ولا توظفت

قال له أنت تقول كذا علشان ماتبيني أتزوج الحين ,,, وصارت كل يوم المشكلة نفسها تتكرر وقالوا له خلاص بنزوجك

وتقدموا لبنت وثنتين وثلاث واربع محد وافق وبعد الرابعة قال خلاص مابي أتزوج الحين حس بالحرج من نفسه لما أنرفض أكثر من مره


وتخرج من الثانوية ودرس دبلوم واشتغل ,,, ووقتها طلب من أهله مره ثانية يدورون له على عروس له

وتقدم لبنت صغيرة عمرها 18 وكانت تدرس في ثالث ثانوي وكانت من الطالبات المتفوقات والمؤدبات والمحترمات


أختارتها له أخته لأنها أستاذة وتدرس هاذي الطالبة وأعجبت بأخلاقها وأدبها وتفوقها


ووافقوا عليه وانبسط وانبسطوا له أهله وهم مرتاحين ,,, وقرر الزواج بسرعة وبعد ثلاث شهور من الخطبة تزوج


وزوجتة كانت شارطة عليه بالعقد مايمنعها من الدراسة ,,, ولما تزوجها كانت تو متخرجة من الثانوي


وسكنها في بيت أهله بس كانت مثل الشقة لها كل شيء


كانت زوجتة تلبس عباة كتف وبعد الزواج منعها منها وقال لها تلبس عباة راس ,,, وقالت له ع العين والراس

واحترمت طلبه ولبست عباة الراس ,,, وقال لها انسي عباة الكتف ممنوع تلبسينها في أي مكان حتى لو في البيت ,, وقالت له أمرك ماطلبت شيء

قال لها مرتين بالأسبوع تنزلين لأهلي وتطبخين الغذا لهم ويوميا تنزلين لهم تشوفينهم وش يحتاجون من مساعدة

وهي كل ماقال لها شيء قالت طيب وعلى أمرك كانت مره خجولة وتخاف تضايقه بأي شيء


ورفض أنها تكمل دراستها وأنها تقدم على الجامعة وطبعاً كل الطلبات السابقة مع رفض الدراسة طريقتة ماكانت أوامر وفرض الشيء

كان يكلمها بأسلوب ويقنعها وهو راعي أسلوب الاقناع


وكان راتبه بسيط 3 الالاف ريال وعنده اقساط ,,, ولايعطيها راتب شهري بس مو بخيل كان ياخذها تتشري لها احتياجاتها ويشتري احتياجات البيت

بس عودها تشتري اشياء أسعارها مناسبة لإمكانياته وهي عادي عندها وقنوعه وعمره ماراح المجمعات الكبيرة

ولا أخذها للمجمعات الكبيرة ,,, بس للأمانه والصراحة كان يجيب لها هدايا حتى لو شيء بسيط

هو من يشتري لها عطورها ,,, وهي كل شيء يقوله تقول تم مايكون عندها راي

وحصل مثل مايبي لبست عباة الراس ولا درست ومرتين بالاسبوع هي من تطبخ الغذا لأهله

مع العلم أهله ناس طيبين مره ويخافون الله ويعاملونها معاملة حسنه ووقت ماتطبخ الغذا الكل يساعدها

بس هم مسوين جدول كل يوم طبخ على وحده من خواته الثنتين علشان أمهم ماتقدر على شغل البيت والطبخ

مع العلم عندهم خدامه ,,


حملت بعد 5 شهور من الزواج وتعبت من الوحم وكل ماشافها تعبانة وقرفانه من العطور يقول لها دلع بنات

وكل مره يشوفها تعبانه يقول لها نفس الكلام ومايصدق أنها تعبانه صحيح ولما جات وقت ولادتها


وأخذها للمشفى قال له تبي ابرة الظهر ورفض قال ماتحتاجينها كلها كم ساعه وتولدين وأمهاتنا أولدوا من دونها ومافيهم إلا العافية

وجابت له ولد ,,, ولما طلعت من الأربعين قالت له تبين تقص شعرها وتصبغه ورفض

مو علشان يبيه يطول أو يبيه أسود بس رفض يقول ماله داعي


وهذا غلط منها تستشيره بكل شيء حتى لو شيء خاص فيها وبمجرد يرفض تسكت ماتحاول تقنعه أو تعرف السبب



وقال تبي تستخدم مانع ورفض وقال لها ياويلك لو اكتشف أنك استخدمتي مانع


ورفض ترضع ولدهم صناعي وماجاب لها حليب صناعي ولا جاب لها مراضع


قالت له جيب له شفاط ورضعه للظروف اذا بطلع أو عندي شيء وقال لها ماله داعي ومافيه طلعه بدونه اصلا


وهي تقهرررر يابنات طيب ناقشيه ارفضي ولو مره هو رجال وش فهمه في سوالف الحريم

وش عليه هو لا بيرضع ولا بيسهر ولا بيضطر ينحبس بالبيت علشان ولده



وحملت مره ثانية بعد 6 شهور من ولادتها وجابت له الولد الثاني

وللمره الثانية رافض انها تستخدم موانع ونفس الشيء رافض تعطيه صناعي


وهي كأنه غاسل مخها واللي يبيه تسويه باقي يقول لها أرمي نفسك بالنار وترمي نفسها


وحملت للمره الثالثه بعد شهور قليلة من ولادتها

وجابت له الولد الثالث



المهم كان يفرض عليهم تزور بيت جدة كل أسبوع مره ولو يوم ماتروح قلب الدنيا فوقها

لازم واجباري تروح وتواصل اهله

وهو مايزور أهلها الا بالشهر مره او مرتين مع أنها قالت له أبوي واخواني يبون يوم بالأسبوع تتغذا معهم

بس أسبوع يروح وعشرة لا


المهم البنت ماعندها شخصيه تغيرت 180% علشانه مع أنها جميلة وصغيرة بس اللي يشوفها يعطيها أكبر من عمرها

لبسها مافيه أناقه وكرشها من الحمل وراء بعض صار كبير ووزنها زاد كثير عن أول


واذا عندها موعد أو تبي تطلع يأمر على أخوانه يوصلونها واذا هو بيوديها مايحترم الوقت دوم يتأخر عليها

ولما تقول له تأخرت يقول لها الدنيا ماراح تطير بس لو هي تتأخر عليه شيء ثانيء


المهم بعد ولادتها بالثالث بكم شهر


جاها وقال لها أبي أتزوج وحده ثانية وطبعا صاحت وأزعلت وأهله ازعلوا وقالوا له بنت الناس ماقصرت

ماعمرها غثتنا بشيء ودوم معنا وتساعدنا وماعمرها اشتكت


وحصل كلام كثير وأهله مو موافقين أنه يتزوج وهي أزعلت وراحت بيت أهلها وهو حاول يقنعها

وكان يبي يتزوج أخت صديقة وهي أكبر منه بكم شهر يعني أكبر من زوجتة الأولى

وزوجتة الأولى أجمل منها بالشكل


واستمرت هالمشكلة شهور حتى رجعها للبيت وفرض على أهله يتقدمون للبنت حتى لو مو موافقين


وتقدموا لها ووافقوا عليه وتزوجها



والبقة قريباً اعذروني ماقدرت أكمل ولا قدرت أكتبها في وورد وأخزنها مابي أحد يقراها بجهازي ويعرف من أتكلم عليه