بصراحة هذا الموضوع أنا سبق وكتبته بمنتدى ثاني
وقلت خليني أنقله لكم هني
لأني أشوف البنات يحبن السنع
ولأن التفاعل أكثر ما شاء الله
وإن شاء الله تستفيدون منه
وحاولت أبسط لكم لهجتنا الإماراتية علشان
كل أخواتنا من الجنسيات العربية الثانية يقدرون يفهمون علي
وما أبغي غير دعواتكم الطيبة لوالدتي الحبيبة
بالشفاء من الفشل الكلوي
السلام عليكم
اشحالكن خواتي ؟؟؟
بغيت أعلمكم على طريقة سهلة جدا لتنظيف وترتيب البيت
لأن البعض منكم يستصعب المهمة ويتعاجز
بس طريقتي هاي وايد سهلة وممكن اتسوينها على مراحل
مب كلها في يوم واحد :
يلا أباكم اتشاركوني في هالحملة :
بسم الله
استعنا على الشقا بالله :09:
أول شي في حملة النظافة هاذي لازم تكون الأشياء
التالية متوفرة عندج وبدونها لاتبدئين الحملة :
1- أكياس الزبالة السودءا (عزكم الله) لأنها كبيرة وتستوعب أغراض وايدة
2- فوطة ناشفة
3- وفوطة مبللة بالماي
4- معطر للملابس
(أنا حاطة كلونيا اسمها طيب بريحة الليمون في علبة رشاش)
وأبخ منها بين الثياب وتعطي ريحة انتعاش الليمون
5- بوكسات التخزين من ايكيا أو أي مكان أرخص
6- جهزي :arb: وياج !!!!!!!!!!!!
تعرفين ليش لأن غلط ترمين اي شي من أغراضه بدون علمه
علشان ما يسويلج حفلة محترمة
ولأنه هو أدرى بالأشياء اللي يبغاها
في أشياء إنتي ممكن اتشوفينها تافهة بس تراها مهمة عنده
علشان جيه يوم بتبدين التنظيف كل ما جيتي صوب أغراضه
اسأليه تبغاه و وإلا ما تبغاه ؟؟؟؟>> هاااا بشروا جبت لكنتكم وإلا بعد
علشان كل شي ايتم بموافقته ((وهاذي طريقتي مع زوجي))
لأنج لو انتظرتي إن هو يتزحزح من مكانه
ويتخلص من اللي في الأدراج والكبت
ترا بيخلص عمري وعمرج والريال ما بعد قام من مكانه
فأحسن شي إنج تهجمين عليه وهو يالس في الغرفة بأمان الله
يلعب على الكمبيوتر أو يلعب ويا عياله
وهاتي الأغراض لين عنده وأسأليه تباه وإلا ما تباه ؟؟
ولا تنسين وأنتي تسألينه تحمرين العين > هذا إذا ناوية على عمرك خخخخخخخخخخخخخخخخ
الملابس :
ابتديت بملابسي وملابس زوجي
الملابس والشيل و الغتر والعبي والأندر وير
اللي شفتها قديمة أو خلاص ما تصلح للبس طلعتها برع
والملابس الي ما نلبسها وما أعتقد في يوم ألبسها
أنا وزوجي بس حاطينها منظر في الكبت
ما في داعي أخزنها وتاخذ مكان في الكبت
أفضل إني اتبرع فيها للجهات الخيرية أو للفقرا
والملابس اللي كانت أزرارها طايحة خليتها على
جنب لأني اقدر بروحي اعدلها
أما الي الزيبر (الجرار) مالها عالق أو تحتاج تقصير
أو تضييق حطيتهم في كيس
علشان أوديهم الخياط ايضبطهم
والملابس الشتوي طبعا أنا من النوع اللي وايد أعز
البوكسات مال إيكيا دووم متوفرين عندي في البيت
أخزن فيهم الملابس الشتوية سواء لي أو لريلي وعيالي
وأبشر بين الثياب صابون ريحته غاويه مثل بالموليف بالخوخ
وبديت بعدين أمسح الكبت من الداخل بالفوطة المبللة
وبعدين بالفوطة الناشفة
وبخيت شوي من الكلونيا على الفوطة الناشفة
ومسحت فيها أرضية وأطراف الكبت
النعول والجواتي :
وسرت عند النعول والجواتي (كرمتو)
واللي شفته ينفع خليته واللي ما ينفع أو مليت منه
حطيته للتبرع في الأكياس السوداء
ونفس الشي لنعول ريلي
وبالمره مسحت الجواتي ونظفتهم من البقع
وبوتات وجواتي الفرو والجواتي المسكرة يعني الشتوي عزلته
العطور :
وأمس نبشت عطوري وشفت في عطور ما أستعملها الحين
ولا أدانيها مع إني يوم شريتها كنت بكامل قواي العقلية
خخخخخخخخخخخخخخخ
وريلي نفس الشي في عطور مصفوفة على التسريحة
مرزوزة من سنة أشوفها ما تخلص>>> شو هالبركة
وطبعا عرفت إنه ما عاجبته الريحة علشان جي ما يستعملهم
أنا أصلا حاطة في الحمام سلة فيها معطرات للجو
المهم وديت هالعطور وضفتهم لسلة العطور الي في الحمام
بدال ما أشتري معطرات وأخسر فلوس
مستحضرات التجميل والعناية والماكياج:
أول شي سويته إني شيكت على تاريخ الصلاحية للمستحضرات
وفي اشياء كانت مش منتهية بس تلاحظين انها استوت يابسة
مثل الماسكات وبعض الكريمات فتخلصت من التالف
بالنسبة لبعض كريمات جسم وبودي لوشن
لقيت علب مفتوحة بس لأن الريحة ما عجبتني
فما استعملتها واستحرمت ارميها في الزبالة
فشو سويت؟؟ جبت العطر اللي بالتولة من أجمل
وخلطته منه كمية بسيطة مع البودي لوشن واستوت ريحته غاويه
وخذيت لفة على الروجات والبلاشرات
وتخلصت من الأشياء اللي ما أبغيها
بس نصيحة خواتي أشوف البعض يعطي الشغالة
من الروجات والماكياج الزايد عندها
وها الشي غلط لأنج بتفتحين باب للفتنة في بيتج
وإذا تبغين تهدينها ماكياج فيوم اتسافر يكون أفضل
وإن شاء الله بيكون للموضوع تكملة
بس لا تنسوني من دعواتكم الطيبة وتشجيعكم
طاسة خبز @tas_khbz
محررة
يلزم عليك تسجيل الدخول أولًا لكتابة تعليق.
أوشن دريم
•
مشكوره عزيزتي وفعلا اهم شي عند التنظيف يكون سي السيد موجود عشان ما ترمين له شي وهو محتاجه
الصفحة الأخيرة