مُـراعـاة مـشـاعـر الآخـريـن انـقـرضـت عـنـد الـبـعـض!!!...

مُـراعـاة مـشـاعـر الآخـريـن انـقـرضـت عـنـد الـبـعـض!!!

أخواتي في الله كل عام وأنتوا وكل أحبابكم وأمة محمد عليه الصلاة والسلام

بخير وصحة وسعادة...ونسأل قيوم السماوات والأرض أن ينصر عباده المستضعفين

في مشارق الأرض ومغاربها نصراً عظيماً قريباً مبيناً، وأن يرزقهم الأمن والأمان

وسقوط كل من ظلمهم أو شارك في ظلمهم واضطهادهم، وأن يرحم شهداءهم

وأمواتنا وأموات المسلمين والمسلمات والمؤمنين والمؤمنات، وأن يجعل قبورهم

رياضاً من رياض الجنة، وأن يغفر لهم ويتجاوز عن سيئاتهم فهو الرحمن

الرحيم الذي وسعت رحمته عزوجلَّ شأنه كل شيء...

ونسأله سبحانه وتعالى أن يوفقنا لما يحب ويرضى من قولٍ أو عمل

في هذه الأيام المباركة وسائر لحظات أعمارنا...

لفت انتباهي عادة سيئة بدأت في الإنتشار كانتشار النار في الهشيم

وهي انقراض الإحساس بمشاعر الآخرين وخصوصاً في مجالس العزاء!!!...

الشيء اللي صدق يقهر إذا شفتي وحدة من المُـعزيات قاعدة وماخذة راحتها

تسولف وتضحك ولا بعد يمكن تخلص دلة القهوة وحضرتها ما خلصت سوالفها!!!...

هذا غير صوت ضحكها اللي ودج تصكينها كف عشان تنطم وتسكت...

سولفي لكن بأدب وبصوت نبرته تقدّر وضع المجلس اللي حضرتج متربعة فيه...

الشيء اللي صدق يبط المرارة من القهر اللي تقعد تسولف عن خطوبة أو عن تجهيزات

عرس بنتها أو أختها أو أي وحدة من معارفها...هذه الصراحة تستاهل تكفيخ يمكن

تحس على دمها وتستحي...ليش أنتي وين قاعدة؟؟؟...وهالناس اللي دموعهم ما نشفت

حزناً على ميتهم ما عندج مراعاة لمشاعرهم!!!...

والأدهى والأمر اللي تقعد تعرّف الحضور بالبنات اللي معاها...هذه فلانة خريجة جامعة

وهذه فلانة تحضر للماجستير ، وهذه فلانة بنت فلان وبتعرس بعد شهرين وبياخذها

فلان بن فلان!!!...وهالناس اللي حضرتج حاضرة تعزينهم اللي فيهم ما يعلم فيه إلا

الله سبحانه وتعالى ما عندج أي إحساس أو اعتبار لمشاعرهم!!!...

وفوق هذا يكفي قهرهم من هالتصرفات اللي صراحةً أنا عن نفسي

أعتبرها بعيدة كل البعد عن احترام الذات، لأن احترام الذات يعني احترام الغير

ومراعاة مشاعرهم ولكن هذه المكارم انقرضت من زمان...

تصرفات كثيرة يشيب لها الرأس تصدر من أشخاص مات الإحساس عندهم

وهم أولى بالتعزية من أهل الميت!!!...ولكن لا نملك من القول إلا فصبرٌ جميل والله المستعان...

أستغرب من بعض الناس إذا أنكروا هذه التصرفات قالوا الزمن تغير!!!...لا والله

الزمن هو الزمن ما تغير ولا بيتغير ولكن الناس والنفوس هي اللي تغيرت وتغطرست

نسأل الله العلي القدير أن يصلح الحال وأن يرزق عديمي الإحساس إحساساً حياً

لتقدير مشاعر وظروف الغير...