بدون مقدمات
ترددت كثير قبل انزل هالموضوع
بس كان ضروري اني انزله
لازم صوتي يوصل للناس اذا ماقدرت اوصله للمسؤلين
اتمنى من ادارة عالم حواء عدم حذفه لان موضوعي مافكرت انزله او اكتبه الا هنا والله يشهد على كل كلمه بكتبها ان هذا اللي حصل وهذا اللي صـــار ..
بكل بساطه كنا رايحين لبريطانيا انا وعيالي واخوي سياحه وزياره لاخوي اللي يدرس هناك
ولما جاء الخميس 15 ابريل يوافق 1 جمادى الاولى موعد رجعتنا للسعوديه
ومن سوء حظنا كانت على الخطوط الجويه السعوديه
رحنا على مطار هيثرو ووصلنا على الساعه 9 صباحا وللاسف انه كان يوم النكبه ويوم تقفيل المطار
انصدمنا من الموضوع فجاه يقولون لنا الرحلات تكنسلت والمطار راح يقفل
ليش ماعلمتونا ليش ماكلمتونا اقلها ارسلو رسايل !!!!
طيب ليه المطار بيقفل وش السالفه !!!
لاجـــواب ... طبعا الخطوط السعوديه كعادتها الكريمه التكتم والسريه ماعطتنا اي خبر
بس روحو خلاص ارجعو ماكان ماكنتو واذا فيه رحلات راح نخبركم بس لاتبعدون يمكن الليله نتصل فيكم ..!!!
رحنا لاستعلامات المطار ولان الشخص بريطاني بكل بساطه قال فيه بركان بمنطقة الايسلاند ومسبب خطر على الطيران
وممكن يقفل المطار لايام ..!!
رجعنا للخطوط السعوديه وقلنا لهم ان من واجبكم توفرون لنا سكن لحد مايتحدد موعد جديد للرحله
وللاسف يرد الموظف بكل بجاحه انهم مو المسؤلين عن التاخير وان السبب من المطار نفسه ولا كان اقلعت الرحله بموعدها !!!!
تعوذنا من ابليس وحمدنا ربنا على العافيه ورحنا لاقرب فندق للمطار لعل وعسى يدقون علينا قريب
كانت رحلتنا رحله رقم 102 الرحله المعلقه اللي اغلب ركابها جلسو بالمطار من 9 الصباح لحد 11 بالليل
وحنا بالفندق مافي اخبار جديده جالسين بانتظار وقلق
المغرب دقو علينا الخطوط قالو احتمال بكرا رحله على الساعه 11 الصباح
راح نرسل لكم رساله بتاكيد الرحله
لكن للاسف الساعه 6 الصباح ارسلو يعتذرون ويقولون ممكن الساعه 4 العصر نرد لكم خبر ..!! كعادتهم المماطله يخافون نفرح بالجلسه ماسكينا مسكه الكل اعلن ان رحلاته تكنسلت والمطار اغلق ولا علقو ركابهم ينتظرون
الا خطوطنا السعوديه المحترمه ..!!!
بالليل طلعت اخبار عاجله بالتلفزيون باسكان العالقين في مطار هيثرو على نفقة ولي العهد
استبشرنا خير وافتخرنا بانفسنا
طبعا وين نروح من نسال ..!!!
اتصلنا على السفاره محد يرد اتصلنا على الخطوط محد يرد
نمنا على خير .. وجاء صباح الجمعه ونزل الخبر بالجرائد
http://www.alriyadh.com/2010/04/16/article516985.html
استغربت من الردود اللي تشكر وتبجل
والحقيقه غير كذا تمـــاما ..!!
يوم الجمعه دقينا على السفاره الصباح ردت مصريه وقالت انهم ماوصلهم خبر بهالشي وان الموظفين لسا ماداومو دقو مره ثانيه .!!! تخيلو يعلن بالتلفزيونات والجرايد وتوها السفاره ماوصلها شي ..!!! باقي اليوم طبعا مايردون !!
دقينا على الخطوط السعوديه يقولون مالنا دخل دقو على السفاره ..!! ياعيني على الاهتمام
راح الجمعه
وجاء السبت ودقيت بنفسي على السفاره طبعا اجازه رد علي الموظف "سعــد القحطاني" الله يجزاه بالخير ماقصر ابدا معي
قال انا سمعت انكم تسكنون وتاكلون وتشربون وتجمعون الفواتير واذا تحددت رحلتكم تسلمون الفواتير للخطوط وهي تعطيكم المبلغ .. كنت مجبره اني اصدق هالكلام ماعندي خيار ..
جاء الاحد ومافيه خبر اكيد ولا مسؤل يرد عليك او جهه تتصل فيك مع ان ارقامنا كلنا مسجله عندهم ..!!
يوم الاثنين بالليل جانا خبر وسمعنا كلام من الناس طبعا ان السفاره تعطي كل شخص سلفه 500 باوند تخصم من فواتيرك اذا سلمتها للخطوط يوم الرحله اذا اتصلو فيك الخطوط ..!!
يوم الثلاثا الصباح راح اخوي السفاره رد الموظف بكل اسف ان الفلوس خلصت !!!!! وانهم ارسلو برقيه يبون فلوس زياده واذا وصلت فلوس يدقون علينا ويعطونا السلفه ..!!! بالله تصدقون مثل هالكلام والتصريف ..!!!
المهم اخوي ومجموعه من الشباب كانو بالسفاره وكتبو برقيه ووقعو عليها وسجلو ارقامهم والحمد لله وصل الخبر للجرائد ونزل هالموضوع
http://www.alriyadh.com/2010/04/21/article518469.html
يوم الثلاثاء بالليل حوالي الساعه 10 يقال ان المطار فتح واستانفت الرحلات من جديد
حوالي الساعه 2 فجرا دق تلفوني الخطوط يقولون لي تقدرين تجين الساعه 7 الصباح بكل هدوء قلت لهم لا ..!!
يعني مجانين يدقون على الناس الساعه 2 الفجر ويبونهم يكونون بالمطار الساعه 7 الصباح ؟؟؟؟؟؟؟
المهم صحينا الاربعا ودقينا على الخطوط وبكل بجاحه قالو لنا بما ان الرحله فاتتكم فلازم لكم حجز جديد !!!!! ياعيني على الاسلوب
شلون نسوي حجز جديد وانتم اللي وقفتو رحلتنا وعطلتوها ..!!
وليه ماحددو يوم معين ووقت معين لرحله العالقين خاصه رحلة 102 ..!! يعني اكيد الاغلبيه طلعو من لندن والغالبيه رجعت لسكنها .. مثلنا انا واخوي رجعنا لليدز الديره اللي ساكن فيها اخوي وقعدنا هناك ..!!
المهم دقينا على الخطوط ندور حجز زي ماقالو وبكل سخافه يقولون مافيه حجوزات الا بشهر مايو يعني بعد اكثر من اسبوعين ..!!!! حتى درجه اولى مافيه الا بعد اسبوع !!
ضاقت فينا الدنيا حتى السفاره تخلت عن مسؤليتنا وقالت انتم اللي ضيعتو عليكم فرصة السفر ..!!
قررنا نروح المطار ونرابط هناك لحد مايركبوننا بالطيب بالغصب هذا حق من حقوقنا والمفروض لنا الاولويه لكن لاحياة لمن ينادي
وصلنا المطار تقريبا 10 بالليل المطار كله مقفل ومايدخلون الا اللي لهم حجز ..!! ضاقت فينا الدنيا وين نروح وين نجلس بهالبرد
رحنا صالات القدوم وقعدنا فيها كانت المناظر مرعبه الناس نايمه بكل مكان كأننا بالحج
اخذت لكم كم صــوره ..!! طبعا ضللت الوجه لايجي احد يحاسبني ..
مشت الساعات والنوم غلبنا
الامن بمطار هيثرو ماقصرو معنا
جابو لنا بطانيات ومويه
لما جاء الصباح الحمد لله فتحت الخطوط السعوديه على الساعه 9 طوابير تنتظر دورها وكلهم من العالقين
الشغله كانت مزاج عيا يركبونا بكل بساطه يقولون لنا لازم لكم حجز جديد
ومن الربشه اخواني ضيعو التذاكر ..!!!
ماصدقوو موظفين السعوديه يلاقون علينا شي قالو ماعندك تذاكر مانقدر نطلع لك تذاكر ماعندك حجز
يستهبلون معنا رقم حجزنا يكفي مايحتاج تذاكر بس كعادة خطوطنا السعوديه لازم المذله
وقفو خواني بعيد بعد مافقدو الامل انهم يركبونا الطياره
جت مسؤله بريطانيه اعلى من الموظفين السعودين وسالت خواني وقالت لهم وش المشكله ليه واقفين هنا
قالو لها اللي صار كامل
ياحبييييييييييييلها قالت انتم لكم الاحقيه وراح تركبون والحين اطلع لكم حجزكم ..ومشت الامور بكل بساطه وكله بعد الله بسبب هالبريطانيه اللي مايربطنا فيها لا دين ولا صله ومع ذلك خدمتنا ..
ابناء بلدنا واخوانا بالاسلام ماساعدونا
هذي صوره للموظف بالخطوط السعوديه اسمه عاطف مدري كيف اوصف دنائة اخلاقه لكن الله حسيبه
طبعا وانا اصوره كان يطالع فيني يعني ماله حق يحاسبني على تنزيلي لصورته بالمنتدى
وهذا الموظف اسمه حسن كان متفهم حبتين لكن ماقصر لازم يوقف عند كل شغله لكن نقول جزاه الله خير
الحمد لله مشت امورنا وتيسرت ورجعنا يوم الخميس بعد مامر علينا اسبوع كامل معلقين ماندري من نروح له وكل واحد يرمينا على الثاني
حكومتنا ماقصرت وخادم الحرمين وولي العهد الله يطول باعمارهم ويمدهم بالصحه والعافيه
المشكله بالمسؤلين اللي مايقدرون المسؤليه اللي عليهم لكن حسبي الله على كل واحد خان الامانه وكان سبب باهمال مكرمة ولي العهد ...
نسيت اقولكم على التعويض
لما عطيناهم الفواتير حقت السكن والمطاعم قالو لا لازم يكون الاكل من نفس الفندق مو من برا ..!!! لاحول ولا قوة الا بالله .. الله ياخذ حقنا وينصرنا على من ظلمنا .. طبعا التعويض ماكان فيه اي عدل
بعض الناس اخذو 5000 باوند وبعضهم اخذ اقل من 500 باوند
المفروض كل شخص كان له مبلغ هذا العدل .. لكن الشكوى لله
الله فوق والله حسيب كل واحد اخذ من هالفلوس من غير وجه حق ..
آآسفه طولت عليكم بموضوعي لكن كنت ابي انقل لكم الصـوره المزيفه لموظفينا خارج بلدنا ..