شام :

حيى الله الغاليات , وحيى الله ضيفتنا الغالية ام دحومي .. ننتظرك بفارغ الصبر غاليتي

حيى الله الغاليات , وحيى الله ضيفتنا الغالية ام دحومي .. ننتظرك بفارغ الصبر غاليتي

أم دحومي الحلو :

أولاً السلام عليكم ورحمة الله وبركاته، وجزاكم الله خير على هالإستضافة، وأسأل الله الذي جمعنا في هذا الملتقى أن يجمعنا في جناته إجتماعاً لا نفترق بعده أبداً يالله .. بسم الله نبدأ :) - كيف تعرفتي على ملتقى الأحبة المغترباتوكم ساعة يوميا تقضينها فيه ؟ في البداية مثل ماقالت أختي عائشه الله يحفظها .. بدأت مواضيع المغتربات في قسم المشاكل الإجتماعية، ولما كثرت المواضيع أتذكر ان المشرفات جزاهم الله خير وجعله في موازين أعمالهم طلبوا من إدارة الموقع تخصيص قسم يجمعنا عشان ماتضيع مواضيعنا بين مواضيع المشاكل الإجتماعية .. والحمدلله صار اللي نتمناه، أتذكر كنت مبسوطة مرة فيه .. وأوري زوجي وأنا فرحانه .. وكان يقول عز الله ماطلعتي منه .. ومن ذاك اليوم وأنا معلقة فيه ونادراً مايمر يوم بدون ما أدخله، على الرغم من قلة مشاركاتي ..!! أقعد في القسم حوالي ساعتين وأحياناً أكثر ..!! - ما هو بلدك الأصلي , وماهو بلد إغترابك ؟ السعودية من مدينة الرياض، تغربت في أمريكا مدينة بورتلاند في ولاية أوريقون ثم في بريطانيا مدينة نيوكاسل - ما سبب اغترابك وكم سنة لك بالغربة ؟ لي تقريباً 5 سنوات ونص ويمكن باقي لنا سنة ونص ان شاء الله السبب دراسة زوجي،الماجستير (أمريكا) سنتين (هو بادي قبل زواجنا بسنتين وكملت معه) الدكتوراة (بريطانيا) 3 سنوات ونص - كيف كان شعورك عند وصولك لأرض الإغتراب؟ شعور مختلط بين الخوف والفضول .. كانت أمنية حياتي أعيش في أمريكا ..!! لكن قبل زواجي أو خل أقول قبل الخطبة، كرهت فكرة البعد عن الأهل والمكان اللي تعودت عليه، كأني دارية اني بتغرب، وكل ماتغرب لنا أحد أشفقت عليه ..!! طبعاً تزوجت وبعد زواجي بشهر ونص رحنا لأمريكا وكان وصولنا لمدينة نيويورك في 10 سبتمبر 2001، والكل يعرف اللي صار في اليوم اللي بعده ..!! :08: أول يوم ما أمدانا نشوف شيء وقال زوجي وش رايك نتمشى في نيويورك قبل مانروح لبورتلاند وكان بيوديني لبرج التجارة العالمي كأهم معلم في المدينة ومنها نشوف المنظر الجوي الجميل اقترحت عليه اننا نأجل هالموضوع الين نستقر في بيتنا ونصير نتمشى بين فترة وفترة على خفيف، لأننا في البداية بنصير تعبانين من الرحلة. والحمدلله اللي ألهمني لهالإقتراح ولا كان رحنا فيها ولا أحد يدري عننا إلى الآن :icon33: طبعاً وصلنا لبورتلاند وقمت الصباح الساعة 8 على اتصال أمي الله يحفظها ويذكرها بالخير، كانت تقول لي وش هالطيارات اللي طاحت عندكم، وحنا ياغافلين لكم الله .. وقلت لزوجي وأمي مازالت عالتلفون وفتحنا على الـ CNN .. إلى والله الدنيا دخنة وحالتها صعبة والعمارة الأولى بتطيح والثانية تلحقها .. يمممممة وش ذا!؟ يالله صباح خير، طبعاً كل ذا أنا مابعد خفت مرة لكن يوم جت الإتهامات عالمسلمين وغيره خلاص عرفت ان الدعوى مو سهلة لكن الحمدلله عدت على خير ولا أحد تعرض لنا والشعب كان طيب ومحترم للغاية - ما هي الأشياء الصعبة التي وجدتها في المكان الجديد؟ كل شيء اجتمع علي في البداية، سنة أولى زواج سنة أولى غربة سنة أولى حمل سنة أولى أحداث ..!! لكم أنت تتخيلوا نار الشوق التي تلتهب في صدري،عمري ماتعذبت وتعبت زي كذا، الحمدلله ان شاء الله يكون تكفير شوق للأهل، وشوق للأكل هههههه لأني فعلاً مع الوحم خلاص اسودت الدنيا في وجهي استغفر الله ماكنت أقدر آكل أو أتنفس، حتى الهواء كان يدوخني ويقلب مزاجي .. سبحان الله - ما الأشياء الجميلة التي أحببتها في الغربة؟ بصراحة البساطة أكثر شيء حبيته و البعد عن الإلتزامات والمجاملات والقرب من الزوج لأني لما رجعت للسعودية في إجازة تعبت كثير واكتشتف ان البعد أحسن وأريح. الصداقات الجميلة، تعرفت على أخوات وقفوا معاي وقفة عمري ماراح أنساها لما ولدت جزاهم الله خير بعد حبيت الصدق والأمانة و سهولة الخدمات والطبيعة والأجواء حبيت العيد في الغربة فيه جو وطعم غير، خصوصاً إذا صليت في المسجد، أحس انه موب زي عيد السعودية عيد للأقارب فقط، لا، تحسين بروحانيته فعلاً وتحسين انه عيد وفرحة للمسلمين كلهم، سبحان الله - ما اكثر الأشياء التي تفتقدينها في الغربة ؟ وهل حاولت تعويضها ؟وكيف استطعت ذلك ؟ أكثر شيء فقدته هم أهلي وتعويضهم صعب جداً، لكن ربي ما يضيع أحد له الحمد والشكر سخر لي ربي صديقات كنهم أخوات ماشاء الله، نسّوني هم البعد ووسعوا صدري الله يوفقهم دنيا وآخرة طبعاً أفتقد كثيراً الأذان والأجواء الروحانية لرمضان والأجواء العائلية للأعياد والمناسبات بشكل عام تتعوض نوعاً ما بالنت والتلفزيون بالقنوات العربية، لكن أكيد مو زي اللي يعيش فيها - كيف تتواصلين مع اهلك ؟ وكيف تتغلبين على مشاعرالشوق والحنين لهم ؟ عن طريق النت سواء ماسنجر أو إيميل، وعن طريق التلفون لأن مو كل أهلي يحبون النت والله أحياناً يكون الشوق غلاب وما أقدر أشيل هالشعور إلا إذا فضفضت لأحد، أو بكيت .. لكن مع الوقت الظاهر ان الإحساس تبلّد :D صرت أقوى من أول، غير ان أشغال البيت كثرت بسبب الأطفال الله يهديهم ويصلحهم، فما عاد فيه وقت للتفكير ..!! - ما هي أخبارك الإيمانية ؟ هل زاد إيمانك في الغربة ؟ نسأل الله الهداية والثبات، والله اني مقصرة للأسف نحاول قدر الإمكان والله يرحمنا برحمته الواسعة ويغفر لنا زلاتنا نعم زاد من نواحي وضعف من نواحي .. يعني من ناحية الإيمان والصبر أحس اني تحسنت مع اني مازلت أحتاج الكثير الكثير ومن ناحية الحجاب تمسكت فيه أكثر، وصرت أنتبه كثير لحركاتي برا لأني أمثل ديني النواحي اللي أحس اني ضعفت فيها أو خل أقول ماعاد تقهرني للأسف العري والخمور اللي في المحلات وبعض المناظر اللي صارت عندي عااااادي جداً ومثل ماقال المثل: "كثرة المساس تميت الإحساس" للأسف وكيف استطعت تعويض الأجواء الروحية في بلادنا الإسلامية؟ المجالات كثيرة .. مثلاً الصلاة جماعة سواء مع البنات أو مع زوجي أو في المسجد (وهذا نااااادر جداً) غالباً في الأعياد أو عن طريق النت والقنوات، مثلاً أشغل تكبير العيد أو صلاة التراويح سوينا قبل فترة أنا وصديقاتي مسابقة حفظ للقرآن، وكانت حفظ فضائل السور، مع تفسير كل مقطع حفظناه، والله كانت أيام حلوة لكن ما استمرينا لظروف الإجازة وغيره، بس ان شاء الله نعيدها - هل وجدت صعوبات في الحجاب ؟ وما تنصحين به أخواتك؟ مو لذيك الدرجة الحمدلله، لأن فيه كثير محجبات ومنقبات، طبعاً نواجه شوية نظرات وأحياناً تعليقات، لكن الحمدلله مامنها خطر أنصح بأن نتمسك بحجابنا وبديننا قدر الإمكان وندعوا لأنفسنا والمسلمين بالثبات دائماً وأبداً وبأن لا نتساهل مهما رأينا من مناظر أو حتى لو أعجبتنا بعض الحجابات غير الشرعية لأنه في النهاية الحجاب ستر وليس زينة طبعاً لابد أن يكون مرتب ونظيف، لكن بدون لفت للأنظار، لأننا في زمن الفتن والقابض على دينه كالقابض على الجمر ويجب أن نتذكر دوماً أن الجنة حفت بالمكارة والنار حفت بالشهوات الله يجيرنا منها - هل زادت مسؤولياتك في الغربة ؟ وإن كان جوابك نعم فصلي لناالحديث عن ذلك ؟ جداً، لأني لم يكن لدي مسؤوليات أصلاً، مثل ماقلت من قبل أنا تزوجت وتغربت على طول، مسؤوليات كثيرة تجمعت علي فجأة، زوج وبيت وتكوين علاقات كل شيء جديد علي حتى اني حملت بعد زواجي بشهرين تقريباً والحمل زاد العبء علي، لكن ربي سهلها من عنده له الحمد طبعاً أنصح كل مقبلة على الزواج أو الغربة أو كلاهما أن تطلع على الخبرات السابقة، حتى لا تنصدم بالواقع مثل ماحصل معي - هل لديك وقت فراغ ؟ كيف ملئت أوقات فراغك؟ نعم، لكن مع الوقت بدأ يقل عندي وقت الفراغ وأحياناً أكون قاعدة ماعندي شغل، لكن ماأحس اني فاضية لأن المخ دايم شغال .. الله يعين والنت بصراحة يقطع الوقت كثيييير فأي وقت ألقى نفسي فاضية، على طول أركض له ..!! - هل مررت بتجارب صعبة وسيئة في الغربة ؟ ما هي ؟ وكيف تغلبتي عليها ؟ وماذا تعلمتي منها ؟ طبعاً لأن الغربة ليست وقت مستقطع من العمر وإنما جزء مهم في الحياة، أصعب موقف عندما أصيب والدي بجلطة بعد سفري بشهر تقريباً، كانت صدمة كبيرة مؤلمة، بكيت كثيراً ودعوت الله بأن لا يحرمني منه ومن رؤيته وهو على أحسن حال، ولله الحمد كان عمي في ولاية كاليفورنيا جاء ليزورني ويبارك لي في الزواج لأنه لم يستطع الحضور، فكان بينه وبين أهلي اتصالات كثيرة، وجوده ريحني كثيراً .. جزاه الله خير تغلبت عليها بفضل الله، وبالدعاء واليقين بأن الله لن يخيب ظني والحمدلله الذي نجى والدي وحفظه تعلمت بأن لا أيأس وأقنط من رحمة الله تجربة أخرى لما حملت بولدي عبدالرحمن تفاجأت مرة خصوصاً اني توني متزوجة، وماكنت أدري وش السالفة، الحلوة متأخرة وبس وكل مرة أقول يمكن عشان نفسيتي مع السفر والقلق .. كنت أستناها في نفس موعد السفر .. ماجت ..!! طيب موب مشكلة وصلنا جاب زوجي أكل من برا حسيت فيه ريحة قلت في نفسي يمكن كبدي قالبة من الطريق الطويل والتعب، بس فيه شي غريب من بكرة نفطر على حليب وغيره برضه نفس الشيء .. يالله وش هالبلد حتى الحليب عندهم غير ..!! :angry2: يوم جا عمي يزورني كان لها متأخرة حدود 10 أيام، أول يوم استقبلته عادي مصحصحةويوم جا من بكره وأطيح عليهم، خلاص ما أقدر أتحمل بداني الوحم من جد، وكنت بديت أثق اني حامل وكل هذا وأنا مابعد كشفت خايفة من الكشف مرررة، أخاف أدوخ من الروعة ..!! بعدها عمي يسألني وش فيك؟ عسى ماشر؟ وأنا مستحية وماأرد آخرتها الرجال شك فيني وكان ذيك الأيام ماتزوج بس يتذكر عمتي لما كانت تحمل، كلنا وحمنا شييييء ..!! في الأخير كلم أهلي قال بنتكم ما أدري وش فيها شكلها حامل، وش أعطيها، راح وعطاني ليمون الأخضر الصغير (أبو زهيرة) وقال لي شميه هههههههههه وإلى يومكم أكره هالليمون، طلع وحمي كله فيه بس ماعلمته مسكين ومرت الأيام .. وكانت صــــــــعـــــــــــــــبــــــــــــة جداً جداً ما أقدر أوصف التعب والآلام والأكلات اللي أشتهيها ذاك الوقت، لكن ما أقدر أطبخها أتذكر كنت أشتهي الجريش .. وحلمت مرتين ان قدامي صحن جريش أباكله ولا أقدر وأقوم وأنا أبـــكـــــــي من القهر، والله حالة صعبة .. الحمدلله اللي عدت طبعاً استمريت في أمريكا إلين ولدت وصار عمر ولدي تقريباً 3 شهور يعني أهلي ماشافوا حملي ولا حضروا ولادتي ولا شيء، الولادة ربي سهلها الحمدلله والنفاس الأخوات ماقصروا معي أبداً الله يوفقهم ويجزاهم بالجنة ياااااارب لكن جتني ضيقة صدر وهذا طبيعي في هالفترة .. بعدها قلت توبة أعيدها وأولد في غير السعودية لما رحنا لبريطانيا حملت ببنتي ورجعت فترة الوحم ورجعت للولادة ولما حملت بولدي الثالث رجعت من الوحم إلين الولادة لأن زوجي كان بيرجع للرحلة العلميةبس والله تعبت كثير وأنا بعيدة عن بيتي وزوجي .. اكتشتف بعدين ان الإنسان خلق في كبد وماحد في هالدنيا مرتاح .. الله يعين - هل أصابك الإكتئاب في الغربة ؟ كيف ولماذا ؟ وماذا تنصحين أخواتك حتى لا يقعن في براثنه؟ مو إكتئاب كحالة مرضية، لكن ضيقة صدر تروح وتجي، وتجيني مثلها حتى وأنا بين أهلي يعني شيء طبيعي، ومالنا إلا الصبر على هالدنيا والتوكل على رب العالمين وأنصح بأن مانستسلم لأي أفكار وهواجس تحبطنا .. وتقلل من عزائمنا .. لأن هذا كله من الشيطان ولو نقنع أنفسنا ان فيه كثير يتمنون اللي حنا فيه ويتمنون تجيهم الفرصة للإطلاع على البلاد الثانية والثقافات كان ماضيعنا وقتنا في ضيقة الصدر، مو معناه ان الإكتئاب على كيفنا، لكن لازم ندعوا الله دائماً بأن يثبتنا ويشرح صدورنا وييسر أمورنا، خصوصاً ان الظروف تختلف من شخص لشخص وحتى القدرات والفروقات الشخصية أما إذا كان إكتئاب مرضي، لازم ماتتهاون أي أخت فيه وتعرض نفسها على طبيب، لأن قد يكون علاجها في البداية أسهل وتكون تغير هرمونات فقط مثل ماصار مع كثير بنات أعرفهم -إذكري لنا موقفا طريفا مررت به , وموقفا أخذتي منه عظة وعبرة؟ لما جا عمي يزورني ويبارك لي بالزواج وأنا قاعدة أتوحم، بصراحة كان موقف محرج خصوصاً انه أول حمل ..!!:35: العظة والعبرة في قصص بعض الأخوات اللاتي هداهن الله للإسلام وبعض المشكلات التي تعترض علاقات الأخوات، أخذت منها عظة وعبرة بأن أعرف حدود علاقاتي مع الآخرين

أولاً السلام عليكم ورحمة الله وبركاته، وجزاكم الله خير على هالإستضافة، وأسأل الله الذي جمعنا...