في أغلب سفراتي تصيدني مفاجآت ما كانت بالحسبان تخلينا نغير خططنا بالكاامل، أمور ما يتوقعها الواحد!
- في شهر العسل رحنا ماليزيا ومنها دولة ثانية، على أساس نرجع ماليزيا 4 أيام بعدين نرجع الديرة.. قلنا نخلي مشترياتنا في ماليزيا فما اشترينا إلا الخفايف من الدولة الثانية. لما جينا بنشحن العفش ونركب الطيارة عشان نرجع ماليزيا،،،، والااا تفاجأنا يقولون لنا ان جوازاتنا بتنتهي بعد 5 أشهر و27، والفترة المسموحة 6 شهووور!! تخيلوا منعونا من الرحلة عشان 3 أيام بس!! وبقينا مع أغراضنا عالقين في المطار واضطرينا نستدين وناخذ تذاكر دايركت على بلدنا بأكثر من 10000 ريال!
- في سفرة ثانية قلنا نخلي آخر يوم للتسوق ولما جينا بسلامتنا نبي نروح السوق ونشوف كل شي مقفل! وقفنا وحدة في الشارع وسألناها، قالت اليوم إجازة.. تخيييلوا صادف إجازة يوم العمال 1 مايو، ما جا على بالنا أبببداً xDDDD
- في رحلة ثالثة كنا رايحين اسطنبول عن طريق دبي وصادف ضباب شديد على مطار دبي، وتأخرت الطيارة الي في بلدنا 3 ساعات كااملة واحنا على أعصابنا (لأن عندنا طيارة ثانية في دبي لازم نركبها!) .. المهم وأخيراً أقلعنا ووصلنا دبي لكن للأسف رااحت عنا طيارتنا.. بس ما قصروا طيران فلاي دبي حجزوا لنا في رحلة الليلة الي وراها، وحجزوا لنا ليلة في فندق المطار ووجبات مجانية، وصرنا بس ندور ونستكشف المطار إلى ما جا وقت طيارتنا .. بصراحة حبيت التجربة :D
- في رحلة رابعة كنت مسافرة مع عيالي وخادمتي ولما جينا بنركب الطيارة ونرجع بلدنا أتفاجأ إن شركة الطيران حجزت لولدي الصغير باسم ولدي الكبير! يعني الكبير عنده تذكرتين والصغير ما عنده! وما رضوا يعدلون الخطأ من عندهم .. وعلى ما اتصلت بزوجي وكلم الشركة وعدلوا الخطأ بقى بس ربع ساعة على الرحلة والبوابة بعييييييدة، ومسكت الولد وشغالتي مسكت الولد الثاني وصرنا نررركض على كبر المطار.. لا وفي الأخير أنا حسرانة حدي الحمد لله لقيت حمام جنب البوابة xDD ولحقنا على آااخر دقيقة.. لكن متتتتنا
من مثلي مرت بمفاجآت السفر ؟