الله يعينك كلنا بالهوى سوى

نصيحتي لك تخلين الشغل الصبح لأن فيه بركة ، أكيد لما تنامين للعصر راح تقومين مالك خلق لأي شئ حتى ولدك

الله ييسر امرك حبيبتي ...شوفي انتي مشكلتك مو بالشغل والتنظيف انتي مشكلتك باللاوعي (مو مقتنعه فيه).دائما اعطي نفسك اشارات ايجابيه مثل انا نشيطه ,انا منجزه, انا قادره على ادارة بيتي بكل نشاط وحرفيه,واستعيني بالله ولاتنظرين للآخرين ايا كان موقعهم ومستواهم.وفيه حل رهيب جدا جدا من تجربه ومصداقا لما اخبر به الحبيب صلى الله عليه وسلم إذا جيتي تنامين انتي وزوجك قولوا:سبحان الله 33,والحمدلله33,والله اكبر34.والله ان لها مفعول السحر .انا بيتي سبع غرف وثلاث دورات مياه_اكرمكم الله_ وعندي اربعه الله يصلحهم كلهم صغار والحمدلله اموري ماشيه مثل ماأبي .ولله الحمد والمنه .ماأقولك مافيه قصور .لا اكيد بيكون فيه لكن الحمدلله كل شي يتعدل.والله يوفقك

صادقه والله انا الشغل اللي اسويه الصباح بساعه بغيره مايخلص بساعتين,الصباح فيه بركه عجييييييييييييبه .

توني اشوف مواضيعك بتنظيف المطبخ والحمام .. واقول ما شاء الله باين عليها سنعة وست بيت
شوفي انا وضعي قريب من وضعك بس زيادة انا ادرس وما أفكر اني اجيب شغالة طول العمر ان شاء الله
انا ساكنة بدور 4 غرف وحمامين ومطبخ وصالة
عندي ولد عمره سنتين ونص .. وأدرس
والحمد لله اموري متسهله .. الغسيل مرتاحة لان الغسالة توماتيك .. مريحة .. والمواعين (وهذا اكره شي عندي) عندي غسالة صحون ومرره ريحتني الحمد لله
الكوي ثيابه اغسلها بالبيت ويكويها برا .. وباقي الكوي مرتاحة منه لان شغالة اهلي تكويه
وبالنسبة للتنظيف ..المجلس والمقلط وحمامه .. نظفيهم زين وسكري الباب واقفليه لا يروح ولدك .. وخلاص ما راح يتوسخ الا بين فترة وفترة تنظيف سريع عن الغبار
الصباح اذا صحيتي رتبي غرفتك ومفرش سريرك وقفلي الغرفة وبتبقى مرتبه طول اليوم .. ما يبقى الا الصالة والمطبخ وغرفة ولدك منتب عجزة عنها بسيطة ان شاء الله
وزوجك عوديه يتعاون معك .. يعني اذا ما راح يساعد على الاقل لا يحوس
وممكن تجيبين شغالة بالساعه اسبوعيا للتنظيف الدقيق .. وانتهينا
انا اكره الشغالات وما اتحملهم .. حتى لو عندي شغالة اعرف نفسي ما راح اتكل عليها وولدي مستحيل احطه عندها
بوديه للحضانة حتى لو هي عندي بالبيت .. فايش فايدتها؟؟ خساير على رجلي وضغط عليه ..وشر اجيبه بفلوسي؟
مع ان اللي حولي كلهم عندهم على شغاله وشغالتين .. بس هذا ما يعني اني لازم اصير مثلهم
ومع الطفل الجديد اكيد بتتعبين في البداية بس شوي شوي وتتعودين .. انصحك تسجلين ولدك بروضه عالترم الجاي بعد الشتاء والبرد .. لانك بترتاحين الصباح في المدرسة يطلع طاقاته ويلعب .. يرجع يتغدا وتحوسين انتي واياه لحد الساعه 6 بعدين تعشينه وينام وتجلسين باقي الوقت مرتاحة تخلصين شغلك او مع البيبي الجديد بعد ما تجيبينه ان شاء الله
ارجع اقولك تراك ست بيت شاطرة باين من شغلك ونظافاتك .. ونجاحك في بيتك وثمرة تنظيفك وشغلك هو اللي بيقنعك ان شاء الله