مقهورة ، وفيني غصصصة

عندي أخت موظفة عندها أطفال وش كثرهم ماشاء الله ،الله يحفظهم ، عندها أطفال صغار عددهم خمسة ،أكبرهم عمره خمس سنين ونص، جابتهم ورا بعض ، لإن عمرها كبير وبتحلق على نفسها ،
وهذولا غير اللي يدرسون في المدارس،، متخيلين كيف معاناتها معاهم !! ،
المهم وقت ماكانت حامل بآخر واحد وقربت ولادتها طلبت فزعتي من بين خواتي ، لإن ماعندها شغالة وقلت لها أبشري وسمي وآمري ، واستأذنت من زوجي علشان أقعد عند أختي وقت نفاسها ،واهملته كل هالوقت بدون اطفاله وزوجته ، علشان خاطر أختي .
طبعاً نفاسها عند أهلي والشغل كثيير كررررف بمعنى الكلمة ، ورب البيت اني انظف البيت ومايكمل نص يوم وهو نظيف من كثر الناس اللي تحوس ، حتى مرات أقعد من النوم الصباح وأشوف المواعين بالمطبخ بكل مكان ، والله اني أمسك دمعتي وأكتم بقلبي ، هذا غير أطفال أختي اللي لازم ألاحظهم مع أطفالي طبعاً ،، وغير اللي يدرسون لازم أجهزهم للمدارس ،، وغير استقبال الحريم اللي يزورون أختي ،،
ولكم أن تتخيلوا معاناتي
المهم جلست عند أهلي وقت نفاس أختي لين تعافت،، بعدها جتها شغالة جلست عندها كم شهر وانحاشت ،، وطلبت أختي مساعدتي ، هالمرة اني أمسك اطفالها وقت دوامها ،، وساعدتها كثييير كثيييير ،، كنت اتناوب عليهم مع امي ،، وأحياناً خواتي الثانيات يساعدونها ،، بس مو كثري أنا أكثر وحدة ساعدتها بحكم إني ما أداوم ،، أنا تعبتتتت وضحيت كثيير ،، لدرجة أحيان اهملت بيتي وزوجي واطفالي علشانها ،، واحيان امسكهم وتنزل دموعي من التعب لان اطفالي يسهرون واذا قربوا ينامون تتصل علي وتقول لي تعالي عند اطفالي ،، واضغط على نفسي واواصل ماانام لين يخلص دوامها
الحين بتقولون وين المشكلة
المشكلة يابنات انها مع بداية العطلة يمكن من أول يوم أو ثاني يوم عطلت فيه أختي ،،، صار سوء تفاهم بيني وبينها ،، ولكن مشكله تافهة تاااااافهة ماتسسسوا الزعل أبداً ، لكن مدري ليش حسيتها كانت تنتظر أي فرصة علشان تزعل علي ،، ورب البيت كبرتها كبرتها خلتها هواااايل ،، وقاعدة تسب وتشتم فيني بقروب أهلي في الواتس بأبشع الألفاظ وأحقرها ، كلام حقير ورب البيت اني بكيت الحين وانا اكتب لمّا تذكرته ، وقدام خواتي وأخواني المتزوجين ،، لدرجة من حقارة الكلام طلعوا اخواني من القروب وحظرتني من الواتس
ووحدة من خواتي بعد عمممري راحت تستجوبها تبي تشوف هي وش تبي بالضبط وليش هالزعل كله ،،
ويوم ردت لي قالت ترا ماعندها سالفه تلف وتدور ماعندها شي واضح تزعل عليه ،،
لدرجة ارسلت لها بالقروب قلت لها خلصت المصلحة اللي تبينها مني وجت العطلة وقلبتي علي ،، قالت اسمحي لي ، لازم اوقفك عند حدك ،، قلت توقفيني عند حدي وش سويت ،، وتلف وتدووور يابنااات ماعندها إجابة ،، وأنا أحاول اخذ منها سبب ،، لين ارسلت لي وحدة من خواتي ع الخاص قالت اتركيها ، لاتدورين حقوقك عندها تدرين انها كذابة وكذا وكذا ،،
اقتنعت بكلام اختي وطلعت من القروب
واشكي لأختي الثانية اقول بعد وقفتي وتعبي ومساعدتي لها تسوي فيني كذا ،، عاد تقول لي راح تجي المدرسة وتحتاجك !!!!!!
معقولة راح تطلب مساعدتي بعد اللي سوته فيني !!!!
مع اني ادري انها حاطة في بالها انو راح تجيها شغالة وبتقول في نفسها خلاص انا مو بحاجة مساعدة من أحد
والحين اذا اجتمعنا عند اهلي ماتكلمني واحسها تكرهني من قلب
معقولة فيه ناس بهالحقارة ؟!!! يعني انتوا قد صار لكم كذا ، يوم انتهت المصلحة منكم ،، انمسحت فيكم الأرض مثلي

واللي قد صار لها نفس هالموقف وش سوت ،، لإني بصراحة مجروحة وفيني غصة ،، وأبغى أي شي يخفف عني