مقهووورة: كيف أعود زوجي ما ياخذ فلوسي

السلام عليكم ورحمة الله
كيفكم طيبين ان شاء الله




ببدا على طول
انا من يوم تزوجت وبفعل التربية الخاطئة وضعف الشخصية ما كان عندي ابدا فلوسي الخاصة
يعني مهر ما اخذت ولا ريال؛ زوجي قال انه ماعنده المقدرة انه يعطيه حاليا فاتفقنا انه يعطيه متى ما يبي، مهر مؤجل يعني

وطبعا ليومك بعد عقد من الزمان ما اخذته وادري مارح اخذه
يعني جهزت للزواج من فلوسي وماعطاتي الا خاتم ذهبً


وفلوسي اللي جتني هدية كلها من غبائي سلمتها لزوجي
ومكافأتي ماكنت اخذ منها الا ريالات معدودة وأحيانا اداوم وانا مو فاطرة ومامعي الا ريالين واقول لنفسي يلا عادي بتحمل او اشتري لي شي من الآلات بريال

كل هذا على اساس ادخر وما اصرف وما أثقل عليه
لاني كبرت في فقر وديون وابوي ماكنت اطلبه ودفاتري اشق الورق اللي كتبت فيه والباقي اخليه للترم الجاي وهكذا 😭😭

المهم اني اشتغلت بعد الجامعة سنتين براتب حلو ثلاث اضعاف اللي ياخذه زوجي ووالله العظيم مااخذت منه ولا خمسين ريال ولا اقل منها

كنت بمحرد ما تجيني اسلمها لزوجي
وهو طبعا مستانس وعاجبه الوضع وكان يوصلني كلام من حريم ازواجهم اخوياء لزوجي انه يتفاخر ويقول اخذ كل فلوسها وانا المسيطر وشخصيتي قوية ومن هالكلام


وهو صدق كذا اعوذ بالله فيه من اخلاق الجاهلية الغضب والجهل واذا عصب ممكن يكسر في المطبخ ويهدد بالطلاق وانه بياخذ العيال معه

واللي صار وخلاني اكتب هالموضوع اني والله الحمد بعد احداااث كثيرة ومعاناة وتعب وعيت على نفسي وشفت اني كنت غبية وصرت احاول اتعدل


وحاليا عندي مصدرين دخل
الاول شغلة اون لاين راتبها بسيط وصار لي سنة ما اخذ منها شي لانها على طول تروح للديون

والثاني دوام دخله متوسط
بس نفس الشي ماقدرت ادخر لي مبلغ ما يعرف عنه زوجي الا مئات محدودة
لانه ياخذ البطاقات ويعرف الارقام السرية ويحاسبني على البنزين وهو يوديني واشتري مقاضي وملابس بفلوسي ومع كذا مو عاجبه وصارت تصير بينا مشاكل كل فترة لانه يقول انتي تكبرتي وعشاي جو انك مستقله وتشترين بدون ماتشاوريني

وانا مستانسة بنفسي اني صار معي فلوس واني اقدر اللع نفسي شوي اذا اشتهيت شي ووالله العظيم مرة طلبت بيتزا توصيل بدون مااقوله شي زعل وعصب ومابغى ياكل لاني ماشاورته ولا قعدت اترجاه واشكره وامدحه عشان يجيب لنا زي ماعودته
وهالعيد انا متقضية لي ولبناتي من فلوسي والمح له وش بتشتري لي هدية للعيد ولا في فايدة





واليوم قمت واشوف الرسائل على جوالي تم سحب مبلغ كذا
وزعلت لانه كل الراتب تقريبا وهو سحبه واخذ بطاقتي وراح شرا فيه مقاضي وقلته له ليش مااستاذنتني انا اتعب واكرف وفي الاخير بكل برود كذا تاخذ! ووين فلوسك انت على ايش تروح وصارت هوشة ليهذي اللحظة متزاعلين وعصب ويقول مارح اوديك الدوام ومارح تدوامين مرة ثانية وخلي الكبر يفيدك وهكذا ….



ادري ان انا الغلطانة من البداية وما ودي اسب نفسي كثير لكني الحمدلله وعيت على غلطي واحاول اصلح بس مافي مجال وهو متربي كذا انه عادي الحرمة تكون الصرافة عالبيت لان هذا حال اهله: امه طول عمرها تشتغل وراتبها اكبر من زوجا وهي اللي تصرف على كل شي


الله يعوضني على هالقهر والحياة البائسة ومل وحدة مثلي
اذا تكلمت اخذت اثم غيبة ولو اسكت احس اني بنفجر والبيت مشحون كابة ولا اقدر اطلع الا باذنه وبكرة في جمعة استراحة ومعايدة ومارح نروح عشانه زعلان

الله يرحمنا برحمته 😭

وش الحل مع هالحال؟