كيف حالكم ياحريم بشرو عسى الحال يسر
والله انا اليوم جايبة طريقتي في المكرونة بالباشميل مرررررة كل اللي ذاقوها
مدحوها يمكن طريقتي فيها تقليدية ومعروفة بس ماعرف احس فيها نكهة غريبة حلوة
اتمنى انكم تجربون طريقتي بحذافيرها وقولو رايكم بصراحة
المقادير
كيس مكرونة قودي ( جيبي المكرونة المبرومة مو الطويلة )
لحم مفروم او دجاج مسلوق ومنتف <<<< اختياري انتي واللي تفضلي منها
حبة فلفل رومي اخضر مقطع لمربعات صغيرة
حبة طماطم مقطعة
حبة بصل مقطع لمربعات صغيرة
ملعقتين صلصة طماطم
ملح - بهارات مطحونة - جبنة مبشورة
الباشميل
3 ملاعق دقيق
2 ونص كوب حليب سائل
ربع كوب زيت
مكعب واحد مرقة ماجي
ملح - بهارات
دحين نجي للطريقة:
1- اسلقي المكرونة مع ملعقة زيت لحد ماتستوي وتصير لينة
2- كشني البصل مع الفلفل الرومي لحد مايذبلو ويحمر البصل بعدين حطي فوقها اللحمة او الدجاجة وحركي لمدة دقيقة بعد كذاحطي الطماطم مع الملح والبهارات وغطي عليها لمدة ثلاث دقائق الين تتسبك الطماطم واذا اتسبكت ضيفي عليها ملعقتين الصلصة وحركيها لين تتجانس مع الخلطة
3- حضري البشاميل بوضع الزيت في القدر الين يسخن وحطي عليها الدقيق وذوبية في الزيت وحركيه كويس واتاكدي ان الدقيق كله ذاب في الزيت بعد كذا اسكبي الحليب على الدقيق مع الاستمرار في التحريك واضيفي عليها الملح والبهارات ومرقة ماجي ولا تخليه مررررة ثخين خليه اقرب للسائل بس في نفس الوقت متماسك
4- اسكبي نصف البشميل في قدر المكرونة واخلطيها معها
5- احضري صينية تيفال وضعي فيها طبقة اولى من المكرونة المخلوطة مع البشميل وفوقها طبقة اللحمة او الدجاجة واسكبي فوقها الباقي من المكرونة وساويها وبعد كذا صبي فوقها البشميل الباقي وبملعقة خشب حاولي تضغطي بخفيف على البشميل ورشي فوقها الجبنة المبشورة
6- حمي الفرن من فوق وتحت وحطي المكرونة واستنيها لما تحمر وطلعيها وقدميها
لعيلتك بعد ماتبرد شوي
وبالف صحة وعافية على قلوبكم
وهذي المكرونة عملتها قبل يومين يم يم اشتهيتها مرة ثانية بروح اسويها
