مكرونه الباشميل بالتونه

السلام عليكم ورحمه الله وبركاته
حبيت اشارككم بطبق لذيذ لا يقاوم وهو مكرونه الباشميل بالتونه
المقادير
مكرونه كامله طويله . علبه تونه او علبتين . بصل . ملعقتين صلصة . ربع فلفل بارد . كزبره .
مقادير الباشميل ثلاث أكواب حليب . ثلاث ملاعق دقيق . بيضه
والي عندها حليب مجفف بيكون ثلاث أكواب ماء كل كوب تذوبي فيه ملعقتين حليب مجفف يعني بيكون المقدار ثلاث أكواب ماء مع ست ملاعق حليب مجفف
الطريقه
تسلقي المكرونه
تكشني التونه أنا سويت علبه تونه كشنت البصل ع فصين ثوم ثم ملعقتين صلصه وبعدين التونه وأضفت الفلفل البارد والبهارات وشوي كزبره وخليهم يتسبكوا ولو تعملي حبتين تونه زيدي الصلصة
نصلح الباشميل
عملته بطريقه الأخت miss smile
وهو كل كأس حليب يعادل ملعقه دقيق ويكون بارد يعني نخلط الحليب مع الدقيق وهو بارد بعدين نولع النار عليهم
سويت ثلاث أكواب حليب مع ثلاث ملاعق دقيق وولعت النار تحتهم وحركي الين يثقل ضيفي بيضه (اختياري) ورشه فلفل اسود
نجيب البايركس نعمل نص المكرونه ونضيف لها ثلاث ملاعق باشميل ونقلبهم مع المكرونه ثم نضيف التونه ثم بقيه المكرونه ونصب الباشميل وع الفرن
صورتها لكم وهي لسه حاره من الأفضل أنك ماتقربيها ع طول خليها تبرد بعدين وقت التقديم سخنيها عشان تكون أكثر تماسكا
مره لذيذه جربوها