جزاك الله خير عزيزتي هتون


مغتربه عن بلادي

انا بانتظارك

اهلا بالبنات كلهم

وانشاء الله على كلامكم تطلع الفيزا هالومين
أما انا بسمع كلامكم وبصير قوية انشاء الله ولا ازعل ولا اكتئب ولا اصيح >>> كثري منها

يعني انشاء الله اني بصير عاااااادي (هين) طبعا في الغربه

المهم يا اخواتي انا الحين قاعده على النت ما افطرت ولا شي على طول طيران عليكم
واختي زهق على شانك باكتب يومياتي من جديد بس ليه ماحد رد علي يوم سالت عن ميني اوريو وين الاقيه عشان اجيبه معي لاستراليا واشخص عليكم .........

امس رحت مع امي وخواتي للسوق شفت قماش مخمل مره حلو طايح وناااااااعم يعني مو ثقيل ولا هو سترتش والمتر 50 ريال عجبني وقلت باشتريه وبفصله عبايه لي تكون حلوه وسكبه وما تكون مره واسعه زي عباياتنا الفراشه لا تكون عادي هذا عشان البرد عندكم .. وألوانه مره حلوه فكرت اخذ كحلي على ازرق مره حلو وفكرت اخذ اخضر غامق على زيتي كما ن هذا حلو واحترت فقلت المره الجايه اشتريه >>> اصلا ماكان معي فلوس ولا كان ماصبرت ........

المهم انا قبل كم يوم شريت قماشين واحد جنز سماوي فاتح والثاني زي المخمل او زي الشموا لونه بيج يعني هذا ثقيل ما ينفع للحر بس بفصله يكون طويل وساتر للشتا أما الجنز فهو حلو صيف وشتا .... قلت بدخلهم على الخياطه وتفصلهم لي على المقاس اللي ابي وبعدين اوديه على الخياط يفصلي عليه الباقي ارخص >>> لاحظو اني باقش من العبايات يعني مو مره بس 5 قطع شي صيفي وشي شتوي عشان ارتاح ولا اقعد ادور حجابات هناك

ترى انا ماحب العبايات الجاهزه ما تعجبني ولا شفت شي عجبني عشان كذا قلت بفصل على مزاجي
ولقيت بالطوات طويله بس ماحبيتها مره شكلها حلو بس علي مو حلوه يوم لبستها طلعت كني سوريه قلت مابيها

ترى يا بنات سويت نسخ قبل ما انزل ردي عشان اضمن ان ردي ما يضيع زي كل مره

المهم نكمل
الجو عندنا بالرياض برد وانا جالسه للحين ارتب بيتي وافضيه والشنط معبيه المكان واللي بالارض واللي حالته حاله طبعا هذا يرجع للاولاد الله يحفظهم ماخلو شي مرتب

بناخذ معنا سبع شنط كلها كبيره والظاهر كرتونين كبار زياده

وحده من الشنط للجزم تكرمون وللشنط ترى عشقي الشنط والجزم وابو الشباب ما قصر عنده جزم وصنادل الدنيا وكلها يبي ياخذها عشان كذا الله يعين

مطبخي حوسه مواعيني اللي بوديها بيت اهلي ماخلصت والكراتين اللي عندنا صغيره
انا مو كل اغراضي باحتفظ فيها بس اللي اشوفه غالي وللحين حلو واحتاجه هو اللي غلفته عشان يروح لبيت اهلي اما العفش كله راح ينباع ماعدا الثلاجه .. غسالة المواعين والغساله الاتوماتيك والتلفزيون الكبير اما الباقي كله من الافران والتلفزيونات الصغيره العاديه كلها بنصرفها للي نعرفهم وللخيريه

ترى لي رجعه بافطر العيال واجيكم
مع السلامه

الســـــــــــــــــــــــــــــــــــلام عليكم بنـــــــــــــــــــــــــــــــــــات

السلام عليكم ورحمت الله وبركاته
كيفكم بنات ان شاء الله تكونون بالف خير ..
والله اشتقت للمنتدى وبالذات ملتقى المغتربين
انشغلت في السفر رايحين بكره ان شاء الله
ادعونا لنا نوصل بالسلامه ..