عندي بعض الاسئلة ....
الاول : هل تغني ادويتك التي كتبتها عن مايسمى بالمردود اوالحوائج التي تصنعها المداويات والتي تتكون في بعض الاحيان من خمسين او ستين عشبه كما يقولون , سمعت ان هذا المردود الجاهز لابد منه لانه يعمل على تضويق المراة وعودتها كما كانت قبل الولاده ,, هل اتوكل على الله واشتري هذا المردود ام ان ماكتبتيه كاف ؟؟؟
هل الارطا له اسم ثاني ؟ ومافائدته ؟
بالنسبة للمحلب سمعت انه يشم الا يضر اذا وضع في التحاميل ..وهل يمكن ان استغني عنه ؟؟؟
بالنسبة للتحاميل ممكن اسويها واحفظها لمدة شهر او شهرين يعني ماتخرب ؟؟؟
ارجوك الرد سريعا لاني في بداية نفاسي واريد ان الحق نفسي ,,
انا ما ادري اذا انتي متعودة على هذا المردود ودايم تستخدمينه وما شفتي منه الا كل خير عادي استخدميه ولكن انا دايم انصح انه الوحده ماتأخذ شيء ماتعرف مكوناته واحسن شيء الوحدة هي تسوي علاجها بنفسها الارطا معروف ولكن ممكن تستخدمين بدله (العرن) بس مو زي الارطا وفايدته مطهر للجروح ويشد هذيك المناطق ويمنع تعفنها لانها تكون منطقه متضرره من الماء... اما المحلب ابدا ابدا مايجيب الشمم وبكيفك اذا تبين تستغنين عنه لانه ماراح يضرك بالعكس ينفع وله دور كبير بالتنشيف من الافرازات اما التحاميل ممكن تحفظينها لمدة عامين او ثلاثه ما تخرب وخاصه اذا عاجنتها بعسل طبيعي وانا الحين عندي تحاميل لهم اربع سنوات ماتغيرو كانهم امس مسويات
سؤال: ممكن توصفين لي شكل العنزروت
العنزروت شكله زي الاحجار الصفيرة جدا ولونها بين الاحمر والبيج او الحليبي وهي لزجه عند وضعها في الماء وطعمه مر.
سؤال: هل تعرفين الكرعم .. وصفته جارتنا نعمله زي التحميلة ووضعة في شاش وربطها وادخالها ..وبعد ساعة اخرجها اكرمك الله ..
وهل اكل الكيوي يسبب المويات فعندما وصفتة جارتنا على انة يزيد في نسبة الدم اكلت منة بكثرة لمدة يومين علما ان الدورة لم تاتي ..استمرت عندي المويات لمة اسبوع ولم تكن مويات عادية
الكرعم هل شكله زي المكسرات خفيف الوزن مختلف الاحجام لونه زي الفستق اذا هو فنحن نسميه(الكرمع) وينبت في شجر الاثل وهو شجر معمر ينبت قريب من المزارع ويستخدم(الكرمع) لتلوين الملابس في السابق وعندما كنا اطفال نجمعه ونبيع العلبه(الشوربا) بـ 5 ريال وهذا قبل 20 سنه ولكن في حياتي كلها اول مرة اسمع انه يستخدم كتحميلات لانه مجرد ملون ولذلك ما انصح باستخدامه.
سؤال: انا متزوجه من سنه وشوى وماعندى اطفال سويت تجربتين اطفال انابيب وقدر الله لها الفشل الحمد لله اليوم بس اخذت نتيجة التجربه الثانيه .. المهم الأدويه اللي استخدمها خلال فتره اطفال الأنابيب كثيره واحسها سببت لي مويه كثيره وصارمعي هواء خفيف وانا جالسه احس فيه بعد يومين راح تجيني الدوره ان شاء الله ياليت تدليني وش اسوي علشان اعرف
استخدمي نظام الدورة وحافظي عليه اكثر من شهر وهل الضعف اللي يحتاج الى انبيب معك ام مع الزوج على كل حال ياليت تجربين الحلب وبار النخل والعسل وسبق اني ذكرته
سؤال: انا متزوجه من سنه ونصف وما حملت عندي ضعف مبايض وهرمون الحليب مرتفع ما اعرف شوه الحل وانا اتعالج من 6 شهور تقريبا وما اعرف احد في بوظبي يدلني على وحده تعالج طب عربي وكيف اعرف اذا عندي انقلاب في الرحم او ميلان
المشكلات اللى عندك تكفي(ضعف مبايض+ارتفاع هرمون الحليب)
اكيد الطبيبه اللي تشرف على حالتك واصفه لك(الكلوميد) اذا كذا استمري على علاجه ولكن انصحك انك تجعلين الحلب هو رفيقك الدائم اذا تبين الحمل اشربيه كالشاي+وخذيه كسفوف وان شاء الله يكون حمل.
سؤال: بالنسبة للمر اللي عندي لونه مايل للأحمراو البني الغامق وقيل لي انه لونه اسود لما يكون قديم وطعمه مر جدا اما الشكل اللي عرضتوه شفته عند العطار لكن كيف يتم طحنه كأنه حجر
وما عليه على عندي بعد سؤال لاحضت اجود بقع بيضاء حول المهبل وبين الشفر--(سامحوني ) وعلى ما اظن انها فطريات فكيف التخلص منها وهل الصابون مضر في هذه الحاله وهل عدم التنشيف بعد التغسيل يسبب هذه الفطريات
فعلا المرة والصبرة اذا كانو قديمات اصبح لونهم اسود
اما اللي تقولين الافضل تعرضين نفسك على طبيبة نساء وولادة وهي تحدد العلاج بالمضادات وانصحك بتنشيف المنطقه بعد كل غسل
سؤال: أني أقوم بعمل التمارين التي ذكرتيها(للبول)الله يعزك بس بين فتره وفتره والحمدلله كل شي تمام,بس أحس بعض الأحيان بأفرازات-تقدرين أتقولين مره كل شهرين إلى ثلاث شهور,فهل هذا طبيعي مع أني زرت الطبيبه وأكدت أنه طبيعي.بس انا مو مرتاحه لأن بدأت هذه الحاله معي بعد الولاده الأخيره يعني قبل سنه وسبع شهور.فما رأيك أنت؟؟؟؟
**أستعملت شيئ يسمى(الملحه)عندنا في البحرين,وعوعباره عن الملح الفارسي مع بعض الأدويه الشعبيه وتتحمل بها السيده في فترة النفاس والحيض للتنظيف,وأناأستعملته في النفاس ومازلت أستخدمه في فترة الحيض. فهل سمعتي عنه وما رأيك فيه؟؟؟؟
الافرازات زي ماقلتي طبيعي بس مو تتعدى المعقول يعني يوميا اما اذا كانت هذي اول ولاده فطبيعي بتحسين باختلاف شوي بس مع الوقت والاهتمام بنفسك كلشيء يكون طبيعي
اما الملحه الفارسيه ماتضر ولكن انتبهي لاتكون (شبه) لانهم بعض الاحيان يغشون
سؤال: اللي ماتطهر من الاربعين بسرعه يعني خلص الاربعين وهي ماطهرت هل هذا يعني انها مااهتمت بنفسها كويس؟؟ايش ممكن تاخدحتى يتوقف الاثر البسيط اللي الوحده تشوف مابين فتره وفتره بعد انتهاء الاربعين (خاصه اذا كانت الدوره جت في نهايه الاربعين)؟؟
زي ماقلتي عدم الاهتمام يسبب عدم النظافه بسرعه
سؤال: انا استخدمت الاعشاب والكبو الدوره اللي فاتت .. بس ماحسيت أي تغيير أبداً .. يمكن لأني ماستمريت عليها تمام وكانت الدوره من قبل ماتبدا ومن قبل استخدم العلاج ..
وانا احس بألم زي البرق بالطول على الجانب الايمن والايسر واحياناً من النص من داخل وهذا الألم كان يجيني .. بس المره هذي أكثر واقوى .. عندي إفرازات مستمره .. وأحياناً زي فقاعة الهوا الصغيره تخرج من الأمام ..وينتفخ بطني وتبدء آلام الدوره من قبل الدوره بأسبوعين ثلاثه .. أصير كني حامل .. وإذا نزلت تكون قليييله .. أحياناً أحس اني تماااااام ..وأحياناً كلمة خربانه قليل .. من كثر الافرازات ..
التغير الوحيد اللي لاحظته .. المويه اللي نزلت بعد استخدام التحميله .. كانت كثيره .. مع إني ما حطيتها الا مره واحده .. آخر يوم ..مادري وش الحل .. وهل يكفي استخدام العلاج وقت الدوره بس ..
لأن رمضان على الأبواب الله يبلغناه وإياكم .. وصعبه أفطر على السفوف
الالم اللي زي البرق اذا ماني غلطانه فانتي داخلك هواء على برد واذا الدورة ماتنزل الا قليل وزي التراب فعندك بعد سدد وكذلك التحميلات اذا لقت مويه كثيره بتسحبها لهذا السبب تلاقين معك مويات كثيرة ولذلك انصحك انك تسوين النظام وقت الدورة وبعد رمضان (وبعد ماتقضين الايام اللي عليك) اتبعي
النظام لمدة اربعين يوم واذا نزلت الدورة اثناء النظام اقلبيه على نظام الدورة وبعد ماتخلص الدورة ارجعي وكملي على نظامك السابق وان شاء الله بتشوفين الفرق ولكن اهم شيء ماتيأسين وغير كذا يمكن يبيلك فترة مع الاستمرار على النظام لحد ماترجعين زي اول يعني ممكن اكثر من دورة وافضل شيء للوحدة اذا كان سبب خرابها بعد نفاس ماتتعدل
الا بعد نفاس ثاني وتستخدم النظام السابق(وهذي معلومه اكيدة)
سؤال: ممكن اكل كاكاو لاني امووووووت عليه ؟؟
ثانيا ممكن استغني عن العنزوروت لاني دخت مالقيته ؟؟
هل ممكن استخدم غسول قشر الرمان لانهم امدحوه لي ؟؟
حبيبتي كولي كاكاو على راحتك اما العنزروت مهمه حاولي تدورين عليها
اما قشر الرمان انا شخصيا ماعمري جربته وعشان كذا ما اقدر اقولك هو زين
ولا لا يمكن اذا احد مجربه ونفع معه زين بس والله ماادري
سؤال: -1 هل لا بد من استخدام الحلبة في الدورة وليس في النفاس(اليست الحلبة لتقوية الظهر فقط واعطاء قوة جسمية للوالدة)فهل لي ان استغني عنهالان صراحة ريحتها بتنفر زوجي مني والناس بعد
-2 لقد قلتي ان الحلبة تعمل على تطرية الرحم فهل اذا كملت المدة اربعين يوم لا تعمل على تطرية الرحم في هذه الفترة وانا طاهرةاي ليست في وقت الدورة
-3 انا دورتي ما تنزل من اول يوم تنزل يوم ثالث وفي اليومين الاوله تكون سوداء وكأن معها تراب ثم بعدذلك تنزل الدورة وتأتيني الام الدورة وتكون دورة طبيعيةأي حمراء فما السبب في ذلك.
-4كم كمية التمر الذي يؤكل في الصباح
-5 يصلح اني اسوي الكبو ثم اتحمم بعده بساعة (علشان ريحته قاتلة)
الحلب يستخدم في الدورة والنفاس وزي مافهمت انك ممكن تنفسين عند زوجك وخايفه من الريحه لاتخافين مع النظافه ومزيلات العرق النوعيه الممتازة او الطبيعيه بتروح المشكله خاصه اذا حرصتي على تنظيف منطقة الابطين كل يوم وكذلك لبستي ملابس كامله نظيفه كل يوم واذا كانت ملابسك مبخرة (بعود اصلي) مو معمول لان العود ياسبحان الله مايشم كل ماجلستي.. وكل ماقمتي متطلع منك الا ريحة العود . كذلك الحلب ماتستخدمينه الا في الايام الاولى من النفاس او الدورة يعني مو كل الاربعين , اما ان الدورة زي التراب فعندك سدد استخدمي(الحبه السوداء +المرة)في عسل طبيعي بتنزلها وانا شرحت الطريقه قبل , اما التمر كلي على حسب رغبتك وازين شيء التمرة مع الرشاد وهى بعد سبق اني قلت طريقتها . اما الكبو لازم تسوينه قبل النومه وتنامين عليه ولاراح ينفع اذا تروشتي بالعكس تضرين نفسك وزوجك اذا يحبك اذا شرحتيله الوضع انك في فترة نفاس او دورة ولازم تسوين كذا وانه اذا ماسويتي العلاج بتضرين نفسك اكيد بيتفهم وممكن انك تعتزلينه في النوم بس هذي الفترة.
سؤال: انا توي طلعت الاربعين وعلطول اشتركت في نادي رياضي مع نظام رجيم فهل هذا يااثر على
الرياضه ماتضر بس مو العنيفه اما اذا كنتي والدة بعمليه ياليت تصبرين على الاقل اربعة اشهر
سؤال: شريت كل الاشياء ماعدا الارطا لقيته مطحون ناعم لونه ترابي فاتح فهل ينفع ؟؟؟
ايضا الحزاه لم اجدها فهل هي ضرورية ومافائدتها ؟ هل لها اسم ثاني ,,
الوصف السابق للارطاء اذا كانت مطحونه واستخدميها وان شاء الله بتنفع اما الحزاة مفيده وتشد اللحم ولكن اذا ما لقيتيها ميخالف وللاسف ما اعرف لها اسم
سؤال: ولادتي بعد شهرين وجمعت الاعشاب ولكن لم اجد (الارطاء -الحزاة- جنبة البر- فلفلة الهواء ولا عود الهواء ) هل هناك بدائل ام ان هذه هامه ونافعة اكثر من غيرها
ايضا اختي ماذا عن الكلى هل ستتاثر من هذه الاعشاب وهل الاعشاب ثقيلة على الكبد ؟؟وهل ستؤثر في الرضاعة يعني هل ستنتقل بالحليب للمولود ؟
كما فهمت لايوجد بخور للعشرين اليوم الاولى فهل هذا صحيح ؟
ممكن تستغنين عن الارطاء بعرن بس تريه مو زي الارطا ممكن تستغنين عن الحزاة مع انها مفيدة ممكن تستغنين عن جنبة البر ولكن فلفل الهواء وعود الهواء ضروريان, اما الكلى والكبد باذن الله مايتأثرون بهذه الاعشاب
وبالنسبه للرضاعه لاتخافين رضعي ولدك وخليه يتعود على هذى النكهات وان شاء الله ماراح تضره بالعكس يمكن تزين صحته اكثر, اما البخور(الكبو) مايعمل في الايام الاولى يعمل في الايام الاخيرة العنبره اذا كنتي تقصدين اللي تستخرج من كبد الحوت فكنا اول نستخدمها لوجع الرأس وكنوع من المنشطات للجسم ترفع الطاقه وتقوي الجسم على التحمل ولاامراض القلب ممتازة وتفتح السرايين من الكلسترول ولعلمك الاصليه لونها رمادي وريحتها مو زينه ابد واللي كبر حبة الحمص تسوي 300 ريال والحين من الصعب تلقين الاصليه الا عند ناس تثقين فيهم وهي ممتازة لكل شيء تقريبا اما زيادة الوزن
ماادري هي تنفع ولا لا لكن فيه عدة اسباب تمنع الوزن ممكن (خشه او دود) واذا عرف السبب بطل العجب ان شاء الله .
سؤال: انا عندي من بعد ماولدت قبل سنتين الم اثناء الجماع وايضا التهابات دايم اعالج منها وترجع وكم مره اروح يقولون انه عندي بداية قرحه وايضا عندي حكه تجيني دايم مع العلم اني احس اني مو خربانه عاديه , مع اني مااستخدم اي مانع للحمل بس ماحملة وكانوا يقولون الاطباء بسبب ارتفاع هرمون الحليب والان الحمد لله تعدل ولاكن ماحصل حمل اعتقد عندي ضعف
اذا الالم اثناء الجماع مستمر معك الى الحين مع الالتهابات حتى لو ماتحسين بالخراب فهذا من علاماته والخراب مو خراب المهبل زي ماسبق وقلت الخراب يكون بالارحام ومضارة تكون على المرأة من المضايقات الي يسببها غير بعض الحالات يكون فيها خمول عام ارجع واقول يمكن عندك ميلان لجهة الالم اللي تحسين فيه ولذلك تأخر عندك الحمل عشان كذا انصحك تكشفين عن امرأة (طبيبة عرب)
بس لاتقولين لها انا عندي ميلان شوفي هي وش تقولك ولاتكتفين براي واحد اهم شيء مرأة ثقه لان الميلان علاجه (دق المخبنه) وهي طريقه سهله بس صعب اني اشرحها.
سؤال: يطلعلي سوائل والحين في الفترة الاخيرة خروج هواء يعني اختربت وكيف ارجع مثل الاول واشلون اختي اعرف اني صرت زينه وكم المدة
وهل الملح الفارسي هو نفسه الملح الخشن
بما انك تعانين من خروج هواء فهذا لوحدة علامه على خراب شديد ياليت تستخدمين النظام في دورتك القادمه وبعد رمضان طبقي اربعين يوم وبصرامه لاتتهاونين او تلخبطين والملح الفارسي يختلف عن الجراش مع انهم يأدون نفس الغرض.
سؤال: في هذه الايام اشكو من خروج ماء بكثرة الله يكرمك واشعر بالم في ظهري وبالذات في منطقة اخر الظهر وغير انني اعاني من خروج هواء في الايام العاديه وحتى ايام الدوره
ولي معناه مع الدوره الله يكرمك ففي البدايه تكون عاديه ومن رابع يوم يبداء السائل البني ويكون بكثره في البدايه
وبعدها تاتي افرازات لونها بني فاتح وتاخد ايام تصل الى سابع يوم او ثامن يوم تقريباوهي على هذه الحال ولكن في هذه الايام يخف وضعهاتدريجيامن ناحية اللون والكميه وقالت لي إحدى الاخوات بانها حيض ولكن تشكين من فقر دم مما يجعلها تاتي هكذا وللمعلوميه انني اشعر بإن هناك شي متحجر وكان هناك حيض باقي لم ينزل
وغير اني انا من النوع التي تشكو من خروج السوائل والهواء حتى في الايام غير الدورة ولا اعرف كيف اتصرف وياريت توضحين لي خصوصا اني وجدت مشقه في اكمال قرائتي للموضوع لاني لا استطيع الجلوس كثيرا على الجهاز فياريت تعطيني وصف العلاج وجزاك الله خير وللمعلوميه انني لم اتزوج بعد
والله مشكله انتي تعانين من خراب شديد جدا جدا جدا مع انك بنت واكيد انك من النوع الي ماتهتم بنفسها ابد وهذي مو غلطتك بس لان البنات بشكل عام ما يهتمون بكلام امهاتهم ولا يطيعونهم وقت الدورة ولكن الحمدلله انه مشكلتك لها حل لان خرابك ناتج من عدم اهتمامك بالدورة مو عدم اهتمام نفاس ولكن لازم تنتبهين معي الحين كل دورة تجيك تمتنعين عن الممنوعات وتاكلين موتسوين رجيم وتأخذين الاعشاب السابقه كلها مو تقولين حلب وريحته لا انت بنت مو متزوجه تخافين ان زوجك يشم هالريحه وباقي الناس لايهمونك اهم شيء صحتك لانه ممكن هذا الخراب يسبب لك عقم في المستقبل (الله لايقوله) ولاتعتقدين اني قاسيه معك الا والله خوف عليك كانك اخت او بنت لي وممكن انك تسوين النظام اذا ودك لمدة اربعين يوم ميخالف وخروج السوائل البنيه هو دليل على عدم اهتمامك بنفسك وانك ماتطهرين بسرعه ولو كان عندك فقر دم لكان الدم معك زي الماء ولونه برتقالي .
ولاتستخدمين التحميلات ممنوعه عنك لانك بنت.
سؤال: شاهي الاعشاب ممكن اشربه في غير اوقات الدوره اوالغسول بعد اقدر استخدمه في غير ايام الدوره انتي ذكرتي اكل ممنوع هل هو ممنوع وقت الدوره بس والاجميع الاوقات مثل الليمون وبالنسبه للمشروبات الغازيه هل هي ممنوعه بعد في غير ايام الدوره انا من الوصف اللي وصفتيه والردود اللي قريتها باين اني خربانه يعني يبغالي اربعين يوم بس ودي اسئلا لازم اربعين يوم لان دورتي بعد اسبوعين يعني بيقطع علي رمضان الله يشرفه
ممكن تستخدمين شاي الاعشاب في كل وقت اما الغسول الافضل بس ايام الدورة اما الممنوعات وقت الدورة بس او النفاس وايضا اذا بتسوين النظام مدة اربعين يوم كحجبه.
سؤال: هل تعرفي زيت الافندر وزيت اكليل الجبل هل هو للشعر ام ماذا وهل فعلا المحلب للالتهابات
زيت الافندر ما اعرفه اما اكليل الجبل (العبيثران) نبات عطري وينبت في القيعان ولا ادري اذا كا يستخلص منه زيت اما المحلب فهو ممتاز لسحب السوائل خارج الجسم .
سؤال: اذا المراة نفاس لا ينبغي لها استعمال العطر لانها قد تصاب بالشمم على حد قولك يعني اللي افهمته انه يشبه حمى النفاس ارجو التوضيح قصدك بالشمم يعني اذا المراة حائض او نفاس اذا شمت العطر يصيبها هذا المرض
هل عندك هالخبرة من واقع تعاملك مع جدتك ام انك دارسة له عذرا اذا كان تدخل في خصوصياتك
الشمم يصيب من بعض انواع الطيب ولذلك اهم شيء تجنب جميع العطور خاصه الريحان المسك وهذا من واقع عشته مع كثير من النساء وانا يامحكيتك تعرضت بعد نفاسي لحمى شديده وانفتح جرح العمليه ولا يعرفون السبب ولكن عرفت انه شمم وكان ريحان المهم تعبت وانا من مستشفى لمستشفى لمدة اربع سنوات وفي احد المرات ذهبت لواحدة من نساء طب العرب وما ان مسكت بطني حتى سالتني هل تعرضت لشمم ريحان لرابع او خامس يوم من ولادتي والحمدلله تعالجت لمدة 3 شهور وشفيت اما الطب فانا لست بطبيبه ولكن عندي معلومات من جدتي وجدت امي وكلهن طبيبات وحاولت ان اجمع المفيد وفيه معلومات اخذتهن عنهن والحمدلله اكثر صديقاتي الواتي اعطيتهن النصائح او اكتشفت علاتهن شفين وبعضهن رزقن بالاطفال بعد عقم زاد عن 7 سنوات ولكن هذا كله من الله والنيه الصادقه
سؤال: بغيت اسالك عن التحاميل كيف انشفها بالرغم من اني حاولت انشفها بتعريضها للهواء الا انه العسل ذاب ولا قدرت انشفها ياليت تقولين طريقة تنشيفها لاني انا احطها في الفريزر ؟؟؟؟؟
الملح اللي بالتحاميل ملح عادي خشن اللي كيسته بيضاء أو ملح حجري ؟
اكيد انتي لما تسوين التحميلات تزيدين نسبة العسل وبعدين لازم يكون عندك شوي مويه بس عشان تقدرين تتحكمين بتكويرهم وعشان المرة تلزق وغريبه انتي متأكدة ان العسل طبيعي اما الملح ممكن ملح خشن مثل اللي وصفتي او ملح فارسي بس مدري وش تقصدين بالملح الحجري حاولي مرة ثانيه وقليلي العسل وعرضيها للهواء
سؤال: العسل طبيعي بس انا اعجن فيه الين تصير قاسيه بحيث اقدر اكورها اما الملح الحجري هذا يباع بالكيلو . بس حبيبتي الملح الفارسي هذا مااعرفه !!!
الملح اذا هو الملح اللي بالاكياس(ملح القصيم) عادي استخدميه
سؤال: سؤالي هو أنني سمعت محاضرة مسجلة في شريط وبعد نهايتها كان بعدها مقطع لرجل - يبدو أنه خبير في الأعشاب-وكان مما قاله : أن بعض النساء لاتهتم بنفسها بعد الولادة فينفر منها الزوج ,وأن هناك أعشاب مهمة للمرأة وقال: أن هناك مادة عند العطارين تسما(خواجوا) إذا تبخرت بها المرأة فإنها تشد وتجفف وتعود المرأة كالبكر؟
فهل كلامه عن الخواجوا صحيح؟وهل يمكن أن نتبخر به لوحده بدون بقية خلطة الكبو؟وإذاكان ممكنا فكم المدة المطلوبة ؟
فعلا صدق هذا الرجل ولكن الجهل عندنا يالنساء بعض الاحيان يجعلنا نعيش في حيرة ولاندري مسبب المشكلات الحقيقيه في حياتنا الزوجيه والخوا جوا ممتاز لكل شيء ونحن نستخدمه كاكبو وممكن تطبخينه مع زيت زيتون وشوي بصله كمدلك للبطن وممكن يخلط مع شوي ارطاء وملح للجروح او القروح
وممكن مع محلب للثه وله عدة استخدامات
سؤال: صار يجيني من فترة تسع شهور تقريبا كدرة قبل الدورة ..لمدة ثلاث أيام وهي مضايقتني مرة
لأن ماعمري جاني زي كذا .. دايم تجيني الدورة بدون اي كدرة ناس قالو يمكن المبايض فيها شي!!!!!!!!
الكدرة اللي تجيك لونها بني غامق مع بني لزج او لونها برتقالي وكأنها زلال بيض اذا لونها بني (فاحتمال عندك سدد على نسبه خراب) اما اذا كانت اللزوجه لونها برتقالي فانك ايضا عندك شوي خراب مع فقر دم . ياليت تحددين أي نوع من الكدرة.
سؤال: الكدرة بني .. بس مو لزجة .. ياليت تقول لي وش العلاج ودورتي قريييييييييبة مرررررررة ياليت تستعجلين الله يخليكاذا لون الكدرة بني زي ما قلتلك عندك سدد استخدمي ( المرة + الحبه السوداء) وسبق اني ذكرت طريقتها اما المرة والملح والمحلب اذا قصدك للتحاميل اطحنيهم ناعم
سؤال: لقد ذكرتي سابقا علاج البواسير ... السؤال .. هل تطحن المرة والملح وهل يطبخن على النار .. الرجاء اذكري الطريقة باالتفصيل
سؤال ثاني ..هل تعرفين المقرونة عند العطار فية وحدة تخلطها مع المحلب وتذكرها انها نافعة للنفساء والحائض ..ما رايك فيها ..وهل العصائر والكاكاو تضر النفساء والحائض؟
بالنسبة لعلاج البواسير اخلطي الشحم مع الملح الناعم والمرة المطحونه وبعدين اذيبيهم على النار وحركي لحد مايذوب الملح والمرة وبعد كذا اتركيهم لحد مايبرد ثم دخليه بالثلاجه (الفريز) ثم طلعيهم وشكليهم على الحجم المطلوب .
اما المقرونه نعم اعرفها ولكن ما ادري من ايش تتكون وهي ممتازة لبعض النساء وضارة للبعض الاخر فبعض النساء تسبب لهم التهابات شديده وبعضهم تناسبهم مرة وهي نوع اصلي ويصل سعر الاصلي منها(وزن 30 غرام 300 ريال) اما غير الاصليه بعشرين ريال وماتنفع , وتاخذ الاصليه وتخلط مع شوي
مرة ومحلب وتوضع ربع ملعقه صغيرة على فنجان قهوه بكر وتشرب على الريق. اما العصائر على حسب النوع والافضل تجنبه واكل الفواكه طازجه لان بعض العصائر حامض ولزج وبارد ولذلك الافضل تجنبه اما الكاكاو لا مايضر كلي منه قدر رغبتك عادي ولكن احسن شيء التمر خاصه هذي الفترة
سؤال: بغيت اسال التحاميل ايش اسوي بالمره والمحلب اطحنها بعدين المحلب اللى جاني دوائر بيج صغيره مادري هو ولا لا؟؟
بالنسبه للتحاميل اطحني المرة والمحلب والمحلب زي ماوصفتيه كان تغلفه قشرة خفيفه لونها بيج وطعمه مر بس مو كريه لا باس فيه
سؤال: اختي انا صار لي عشرة أيام من عملت عملية فتق في السر والحين عضلات بطني كثير تألمني مع ان الدكتورة أعطتني حزام لشد العضلات الا انني اعاني من الألم، ياريت تكونين تعرفين وصفة اعشاب أو زيوت اقدر استخدمها لتخفيف الألم أكون جدا شاكرة لك.
اذا الجرح لونه احمر وتحسينه منشد وينبض بعض الاحيان فهذا شمم والاطباء يسمونه التهاب بشكل عام افضل شي تتكبين كبو الشمم وانا اعتقد اني ذكرت من قبل مقاديرة ولكن اهم شي تزيدين المرة والحلتيته الرطبه وتخليها قريب من منطقة العمليه وتتكبين مرتين في اليوم عند المغرب وعند النوم وبعد العمليات بشكل عام خاصه اللي بالبطن دايم نحس ان العضلات شاده وانك لو ضحكتي بتنفتح وهذا طبيعي بس كثري من المشي والحركه.
سؤال: انا عملت نظام الدورة اول يوم عادي لكن ثاني يوم جاتني الام في الظهر الام الدورة العادية فهل هذا عادي؟ علما ان الدورة دائما تجيني بدون الام ومااحس بها ابدا
بالنسبله للالم اذا كنتي مو متعودة انه يجيك الم وقت الدورة وخاصه اليوم الثاني فيمكن اول كانت الدورة ماتطلع زين بس مع الادويه والاهتمام اصبح يطلع الدم الفاسد وكدليل على كلامي اذا بطلع منك قطع سوداء وبعدها ترتاحين فهذا هو السبب الدواء طلعها ياليت تخبريني اذا كذا صار معك
=============================
عندي بعض الاسئلة ....
الاول : هل تغني ادويتك التي كتبتها عن مايسمى بالمردود اوالحوائج التي...
سبحان الله .