المقادير
راس ملفوف ( لهانة) متوسط الحجم
نص جيلة عيش (رز) المفروض مصري بس أنا استعملت بسمتي لأنه مخلص و ما مداني أروح أشتري
بصل مقطع صغير
طماط مقطع صغير
ثوم مدقوق
نعناع يابس
زيت زيتون
عصير ليمون
معجون طماط
مكعب ماجي دجاج
الطريقة
المقادير السابقة طبعا حسب الذوق و الحاجة. أنا أحب أطبخ الحشوة نص سوا تطلع أطعم و ألذ.
بالنسبة للملفوف نفوحه (نسلقه) نص فوح و نشخله و نتركه حتى يبرد و ينشف
أما بالنسبة للحشوة نحمس البصل مع زيت الزيتون و لما يبدأ يستوي نضيف مكعب الماجي
و نقلبهم حتى يذوبون و بعدين نضيف الثوم و نحمسه شوي و عقب نحط الطماط و نخليه يذوب تماما
و آخر شي نحط العيش اللي سبق إنه نقعناه و شخلناه.
نرد نضيف زيت زيتون و عصير ليمونة و ملعقة معجون طماط.
بعد ما نشوف العيش تشرب المكونات و بدا يستوي نضيف النعناع و نطفي النار.
ناخذ ورق الملفوف و نشيل الجزء اليابس اللي بالنص و نقسم الورقة قطعتين و نحط قفشة أكل حشو بكل ورقة ملفوف و نلفه نفس ورق العنب.
نقطع بطاط دوائر بسمك متوسط و نصفه بقاع الجدر. بعدين نرص الملفوف و نضيف له علوب فلفل حار بعد إزالة الرؤوس مالتها.
و نذوب ملعقة معجون طماط بالماي و نضيفه مع عصير ليمونتين و زيت زيتون و رشة ملح للملفوف
و نحط صحن فوق الملفوف عشان ما يتفكك أثناء الطبخ و نخليه على نار هادية لمدة ساعة أو أكثر بشوي.
و نجيك على نضوج الملفوف بأنه نطلع وحدة و نقسمها بالقفشة إذا شفناها مستوية عدل نطفي النار و ذوقوا ألذ ملفوف و ادعوا لي بالتوفيج. اترككم مع الصور
بسم الله ما شاء الله تبارك الرحمن
أتمنى إن الوصفة عجبتكم و عوافي على قلوبكم
وترى توني مسويه انا وشغالتي
لامي الله لا يحرمني منها تحبه
مررررررررره