ماشاء الله تبارك الله


ام كريم تسلمي على المعجنات الجميله

طير الحرم الف سلامه عليكي

دينا الف سلامه عليكي الم الودان صعب ربنا يشفيكي ويعافيكي

مرمر ماشاء الله تسلم ايديكي

النهارده خليت فراخ لان مش بيوصل عندي فراخ مخليه وتبلتها كالاتي وشلتها في الفريز

البانيه

عملت الصدور شرائح رقيقه +عصير بصل +عصير ليمون +فلفل اسمر+رشة جنزبيل+ م زبادي بيطريها واوقات باحط معلقتين حليب لو مش عندي زبادي+توم

مفروم


شيش طاووق

اخدت الجزء العريض من الورك مش عارفه اسمه ايه والدبابيس شيلتها علشان بنحبها بالكورن فليكس

وخليته وقطعته قطع كبيره

كوب زبادي +توم مفروم +بصله مفرومه +كاتشاب +م صلصه +بابريكا +عصير ليمون +فلفل اسمر +رشة جنزبيل باحب احطه في

كل حاجه (انا لو هاعمله تاني يوم باقطع معاه مربعات فلفل اخضر وبصل وطماطم علشان تشرب من التتبيله لكن علشان فرزنته

ما حطيتش)

شاورما

الطريقه دي من فتاة المستحيل هنا في المنتدى سهلللله وخفيفه واعتمدتها

قطعت الصدور شرائح صغيره +عصير ليمون+خل +توم +فلفل اسمر +رشه خفيفه جوزة الطيب( الحقيقه لسه باستخدمه واتمنى تادو

لو تقدر تتاكد لنا من موضوع الحرمانيه وتاخد لنا فتوى من احد شيوخ السعوديه)

الطريقه

بتتشال في التتبيله قبلها بيوم في التلاجه وتاني يوم توضع في صينية فرن وعليها حوالي ربع فنجال زيت زيتون

انا وتغطى بورق فويل وتدخل فرن نولع من اسفل فقط وبعد ساعة نولع من فوق كمان علشان تتحمر

وطبعا تعمليها ساندوتشات بخبز الصاج مع الطحينه والبقدونس والخيار المخلل او الاضافات المفضله

شاورما الزبادي

شرائح صدور دجاج+معلقتين بصل مبشور+خل +رشة قرفه +رشه خفيفه حبهان مطحون+رشه خفيفه قرنفل مطحون+رشة جنزبيل

+زبادي

في طاسه على النار نضيف الفراخ بتتبيلتها لحد ما تنزل ميتها وتستوي والميه تنشف ننزل عليها بشرائح بصل وفلفل اخضر

ثم طاطم كاريهات صغيره وتلف في الخبز زي اللي قبلها

هي تتبيلات سهله ومعروفه بس قلت ممكن واحده من اخواتي تحتتاج لها


سيلفانا

ماشاء الله شكل الوصفه رووعه بس للاسف المكان هنا لايصله اي كائنات بحريه ان شاء الله اجربها

لما ننزل مصر اجازه

بسم الله ماشاء الله تسلم الايادي ربنا يوفقك يارب وانتي مقيمه في المدينه
يامرمر دا انا هموت واعيش بالمدينه برتاح نفسيا جدا فيها ادعي لي اعيش
بالمدينة ياريت تكلمينا شويه عن المدينه عاوزة اعرفها اكتر واكتر ياريت
تعملي لنا رحله الي المدينة من اول مانوصل والاماكن المشهورة يعني
احنا ضيوف عندكم وليه هتسيبوا المدينه طبعا ربنا يوفقكم معلش اصلي
بحبها قوي ونفسي اكون فيها من بكرة ودور تحفيظ القرآن نظمها ايه .

سيلفي انا لما باعملها بانيه باعمل الكفته العاديه خالص

مفروم+بصل +عصير ليمون +شبت وكزبره وبقدونس بصراحه الشبت بيخلي الكفته لذيذه+فلفل اسمر+رشة بهارات خفيفه+ملح

وطبعا بتكون مفروم فيها نسبة دهون مفرومه مع اللحمه

وانا مش باعملها صوابع انا علشان تاخد نفس الشكل وتكون رقيقه وتستوي كويس باعملها في غطا برطمان ههههه

زي البرجر بابطن الغطا بنايلون واشكل فيه وبعدين ارفعها منه وارصها على صينيه وادخلها الفريزر تجمد علشان اقدر اغطسها في

الدقيق والبيض المتبل والبقسماط بدون ما تتفتت لانها بتكون رقيقه شويه وارجعها تاني الفريز لحد ما تتماسك

طبعا باسخن زيت غزير ونسقطها فيه واول ما تاخد لون دهبي اهدي النار علشان تستوي وبعدين طلعيها على

مناديل مطبخ دقيقه بس علشان يمتص الزيت وبعدين رصيها على فرشة بقدونس وبالف هنا

سما جزاكي الله خيرا هعملها ان شاء بطريقتك ربنا يبارك فيكي

جبتلكو انهرده بقه كفته بانيه بس ايه خطيره وسهله اوى
وتنفع للعزومات شكل وطعم احلى من بعض كفايه بقه رغى ندخل فى المفيد
المقادير:
لحمه مفرومه - بيض - بقسماط - بصل مفروم - وملح - فلفل اسمر - كمون بهارات

نضيف البصل والملح والفلفل الاسمر والكمون والبهارات على اللحمه ونقلبها فى بعضها كويس

وبعدين نبططها رفيع عشان تستوى


ونحطها فى البيض ونقلبها كويس

وبعدين البقسماط

ودول بقه جاهزين على التحمير

وده بعد التحمير

وده من جوه مستويه وطريه وخطيره بجد

وهنا قدمتها مع مكرونه بالصلصه ومسقعه وعيش


سيلفي لقيت لك طريقه بالصور على فتكات بس انا بافضلها بالشبت والخضره

وعزومه سعيده ان شاء الله