ام كريم انا زيك كل يوم لحمة او فراخ ولازم جنبهم رز او مكرونة قوليلي بقي بتخرجي من الروتين ازاي

أولا
طريقة الكوكيز
150 جم زبدة
ربع كوب سكر عادي بس مش خشن أوي عليه 2معلقة كبيرة عسل أسود (كبديل للسكر البنى) 50جرام
تلت كوب سكر بودرة 60 جم
كوب ونص دقيق + معلقة ونص صغيرة بودر
صفار بيضة
رشة فانليا

تدعكي الزبدة مع السكر كله كويس حتى تنعم تضيفي صفار البيضة والفانليا وتقلبي كويس تضيفي الدقيق المخلوط بالبودر وتقلبي كويس
تضيفي الشوكولا الدمعات شوية للعجينة وتسيبي شوية للتزيين من فوق
لو لاقيتى العجينة طرية ومش عارفة تشكليها كور دخليها التلاجة شوية
بعد كده تشكليها كور قد البيضة الصغييرة
تغطسي وش الكورة في الشوكولا الدمعات حتى يلتصق بها شوية
تحطيها في صينية مش مدهونة تضغطي عليها شوية بإيديكي منها تنفرد حبة والشوكولا تلزق فيها بس مش تفرديها على الأخر لأنها بتفرش حبة في الفرن يعنى خليها في سمك الكعك بتاع العيد لا مكورة ولا رفيعة
تسخنى الفرن كويس على 180 بعدين دخليها في الرف الأوسط حتى تأخد لون دهبي يعنى من 10 إلى 15 دقيقة
بس خللي بالك لاتحرقيها عشان هي في الأخر بتتحمر بسرعة بس مبدأيا لاتفتحي عليها قبل 10 دقايق

طريقة الشوكولا الدمعات

لاقيتها ب 24 ال ربع كيلو قلت لأحرااااااااااااااااام مانعملها في البيت أوفر وبشوكولا المطبخ
على فكرة بستعمل نوع إسمه سويفاكس مخصصة للطبخ ورقتها خضرا ممتازة أوي
تبشري الشوكولا وتحطيها في كيس صغير من بتوع السندوتشلت بس إوعي يكون مخروووووووووووووووم
تربطة الكيس وتحطيه في مية سخنة مش بتغلي سخنة بس
وتسيبيه لحد ماتسيح الشوكولا
تجيبي ورقة زبدة أو ورقة فويل وتفرديها على صينية وتعملي فتحة صغنووووووووونة في طرف الكيس بالمقص وتبدأي تعملي نقط من الشوكولا على الورق وتسحبيها لفوق عشان يكون ليها سن على شكل الدمعات الجاهزة
تدخليها التلتجة تجمد وبس طلعيها من الورق وعبيها في حاجة وإستعمليها زي ماانتى عايزة


بسسسسسسسسسسسسسسسس
التعامل مع الشوكولا صعب في البرد
على العموم الجو مش برد أوي اليومين دول
عندي الصور بس للأسف مش لاقياهم هدور تاني ولو لاقتهم هنزلهم

أنا عن نفسي يوم مابغير يبقى بيتزا وشوية معجنات اللي بالجبنة واللي بالتونة
لو إفتكرت حاجة تاني هقوللك
بس عارفة حماتى بقى بتغير بحاجات تانية
إشي بصارة وعدس وكشري ومسقعة يعنى حاجات زي كده بس للأسف جوزي مش بياكل ولا حاجة منهم

بسم الله ماشاء الله تسلم الايادي جزاكي الله خيرا
شكله روعه وواضح الجهد المبذول ربنا يوفقك .