اسماء كل سنة وانتى طيبة يا جميل ويلا قوليلنا اخبار العزومة ايه

ازيكم ياقمرات

لسه حالا يدوب قاعده ....صحيح اتهلكت هلكة تمام لكن الحمدلله الاكل عجب الكل اوي وافتكروا اني جيباه جاهز الحمدلله

عملت تقريبا نفس الاصناف اللي قولتهالكم لكن حاجات ملحقتش اعملها

عملت الطبق الرئيسي رز كبسة وكباب حلة وبانية وصينية كفتة ببطاطس وورق عنب وسمبوسة جبنة ولحمة وبطاطس محمرة وسلطة كول سلو (دندونة القمر دعتلك من كل قلبي على طريقة تقطيع الكرنب للكول سلو بالمخرطة سهللللللللللله وسريييييييييييييييعه بجد جزاكي الله خيرا)وسلطة زبادي ومخلل وخشاف وقمر الدين وكاركدية وعصاير جاهزة

والحلو تشيز كيك فقط والحمدلله عجبهم اوي

وخلاااااااااااااااااااص مفيش عزومات لاااااااااااااخر رمضان

جزاكم الله خيرا على اي نصيحة كتبتوها او اي طريقة اخدتها منكم

صحيح كانت علقه بس تعليقات الرجاله وزوجاتهم فرحتني اوي وحسستني اني لسه فالحه في حاجه

ابلة دينا
ما شاء الله على ابداعاتك لازم تطلبي حفظ حقوق الطبخ إنتي عارفة مفيش حاجة مضمونة الأيام دي
بس بجد تسلم ايديكي وربنا يبارك في صحتك و نتعلم منك كل جديد

اسماء
كل سنة وإنتي طيبة ويجعل عمرك كله في طاعة و مبروك العزومة يا جميل

النهاردة فطرنا باقي مسقعة باللحمة المفرومة من امبارح و عملت شوربة عدس و سلطة و الحلو عملت السينابون الكذاب بتاع هند

بكرة إن شاء الله ناوية على مكرونة و كفتة شوية و سلطة
كنت عاوزة منكم أفكار لأصناف حلو سريعة و تنفع في زنقة النقل و الدربكة دي وعاوزة أعرف ممكن القطايف ألفها قرطاس و افرزنها ولا لازم تكون محشية ؟

كتكوتة القطايف ممكن تعمليها قرطاس وتحطيها فى الفريزر بس طبعا رصيها على صينية الاول وغطيها ولما تتجمد ابقى حطيها كلها فى كيس واحد ولما تخرجيها على التحمير على طول وبعدين احشي القرطاس كريمة ومكسرات او قشطة او ايس كريم

اسماء مبروك العزمة انها عدت على خير وعجبت الناس الواحد بيحس ان تعبه مراحش بلاش

صباح الفل يا أحلى بنات
كل سنة و انتو طيبين
خلاص بكره نص رمضان اللهم تقبل صيامكم و قيامكم يا رب العالمين

بقولكوا ايه
انا عندي عزومة لحوالي 12 فرد ففكرت بدل ما اقف في المطبخ و اتهد لوحدي اني اجيب مثلا اكل جاهز من بره

فكرت في حضرموت يجيبلي مثلا خروف بالرز و اعمل انا السلطات و العصاير و الحلو مثلا

ايه رأيكو في الفكرة

و هل فيه مطاعم تانيه تعرفوها ممكن تريحني و تجيبلي اكل حلو يكفي و يشرف ؟؟؟؟