مش انا جربت اعمل كب كيك مش هتصدقوا :)

طبعا هو منفش اوى يعنى نفش على استحياء كده ولا واحدة عدت ورقة البليسية :)
طبعا انا مكسوفة منكم بس بحاول اتشطر ولن ايأس ان شاء الله

بس انا تقريبا بدأت اعرف اية الاخطاء اللى عملتها وهحاول اتجنبها المرات الجاية وطبعا جزاها الله خيرا دينا استشرتها ونبهتنى للاخطاء دى

صلوا على النيى

قولت اجرب فى بييضتين وكوب دقيق واحد عشان الخسائر متبقاش كتير

خرجت البيض من التلاجة عشان يبقى كل المكونات فى نفس درجة حرارة الغرفة (مذاكرة كويس انا )

وجبت كوب دقيق منخول وعليه نص معلقة ممسوحة بيكنج بودر وذرة ملح (مش بقولكوا مذاكرة كويس)

وكسرت البيضتين فى طبق وعليهم نص كوب سكر ورشة فانليا وقعدت اضرب اضرب اضرب لما يبنلهم اصحاب قصدى لما البيض ما شاء الله نفش و على وابيض (اذكى اخواتى بقولكم مش مصدقنى)

قوم بغباءى المعهود فرحت وقمت ضايفة على البيض معلقة سمن ومعلقتين زيت وكملت ضرب
قوم فششششششششششششششششش البيض نزل لسابع ارض وبقى مية سايحة
اضرب تانى ما اضرب مفيش فايدة بقى شوية مية فى قاع الطبق

اعمل اية اعمل اية اكبة فى الحوض لأ اكبة فى الباسكت لأ حرام

وبعدين طب اقليهم لجوزى ولا حد شاف ولا حد درى ؟؟ طب ونص كوب السكر اكيد طعمة هيبان

المهم اخر الحوسة اللى انا فيها قولت يلا بايظة بايظة قومت حطة الدقيق باللى علية وقلبت بالمعلقة

وضربت بيضة برشة فانليا على جنب لوحدها لحد ما نفش وقومت مقلباه مع الخليط الفاشل السابق وقلبت بالمعلقة بسرعة لحسن شوية الهوا اللى فى البيضة يطيروا وقموت موزعة فى صينية الكب كيك وجرى على الفرن المسخن مسبقا

و25 دقيقة والريحة طلعت وطلعته من الفرن وزى ما قولتلكم فى الاول كان مكسوف يخرج برة ورقة البليسية بس هيتاكل يعنى هيتاكل ان شاء الله

انا قولت اكتب بالتفصيل تجربتى يمكن حد مبتدء زى يستفيد وميكررش الاخطاء

دينا جزاها الله خيرا نصحتنى لان ايدى مش متدربة كويس على خليط الكيك

انى اضرب الزيت او السمن مع السكر لوحدة
والبيض مع الفانليا لوحدة
وانخل الدقيق بذرة الملح والبيكينج لوحده

بس طبعا بسرعة بسرعة والبيض يبقى اخر حاجة عشان لما اقلبهم فى الاخر على بعض البيض ميلحقش يهبط


ونصحتنى كمان ان لو الكيكة فشلت انى لا اايأس ولا انط من الشباك ولا اقعد جنبها اعيط عادى ااقطعها ترنشات واحطها فى الفريزر ولما اروق وانسى اللى حصل اطلعها اعملها تارت او تريفل ارصها فى قاع طبق شيك وعليها فواق مسكرة كمبوت وخليط اى حاجة على الوش زى كريم شانتية مثلا او اى فكرة طبق حلويات فيه تبطينة كيك

الحمد لله

صباح الفل

عدت

عملت اللحمة فلتو تبلته وديته للكبابجي والفراخ عملتها على الشواية وتحتها صينية فيها مية زي نورا ما قالت وطلعت اختراع زي الكبابجي بالضبط

وعكلت مكرونة بالباشميل

وسلطة طحينة وسلطة بلدي ومش قدرت اكتر من كده الوقت كان مزنوق خالص

بس الحمد لله الحاجة طلعت حلوة والتتبيلة فلة

بالنسبة للكباب تبلته بصلة مبشورة مع سماق وملح وفلفل وبشر طماطم

اما الفراخ فزودت علي كده ليمون معصور ومعلقتين زيت

اذيكم ياحلي بنات اخباركم ايه
مشاء الله شايفة بيتزا روعة وكب كيك رهيب فتحتوا نفسي تسلم ايديكم
بقولكم يابنات انا عندي جهاز ساندوتش ميكر ممكن اعمل وافل فيه ولا لازم اشتريه لوحده
اصلي عني العيال بيحبوا الوافل اوي مش عارفة ينفع ساندوتش ميكر ولا لازم الاخ وافل ده اشتريه