كيفوووو الغاليآت :26:
كل عآآآم وأنتمـ بألف ألف خيرر بمناسبة شهر رمضآن الكريم..
اليوؤوم بإذن الله حابة أقدم لكمـ شي مختلف.. اعتبروهآ هدية الشهرر
هذي الله يسلمكم دورة سوتهآ لي أمي في بداية تعلمي للطبخ لأني دايماً أدخل المطبخ
وتهمني أمور الطبخ قالت تعالي يا بنية بعلمج على أهم الأكلات الكويتية اللي يحتاجهآ كل
بيت عشان إن شاءالله إذا تزوجتي تصيرين طباااااخة ويصير زوجج يشكررر فيني :icon28:
ويمدحج عند الكل .. قلت لها حااااضر يا يمااا متى نبلش << أنا ما صدقت كنت حيل
متحمسة وقتها الله الله والله أياااااام ههههههه:hahaha:
وسوينا جدول أنا ويا أمي كل يوم تعلمني طبخة أو طبختين << طبعاً أختكم ما تخلي شي
ما تصوووره جك جك جك :biggrin2: وين ما تروووح بكل مكان وداهية ههههههه
أنا أطبخ وأصووور الجدر بإيد والتلفون بإيد ثانية حتى ساعات أمي تعصب
علي بالمطبخ تقولي انتبهي للأكل بسج تصوير :p
طبعاً كل خطوة صورتها أول بأول ~
والحمدلله صار عندي ملف كاااامللطبخاتي الحلوووات اللي أفتخر فيهم..
حبيت أنقل لكم كل اللي طبخته بذاك الوقت عشان تستفيدون وتطبقووووووون ترى كلهآ
حركات وأسرار أمي الله يحفظهااا لكن شغل ايدي ~
من بعد هالدورة أنا طلعت ماشاءالله أعرف أكلات مهمة عندنا خاصةً في الكويت وعاد بعدها صرت أفنن من عندي وأنا أساساً أحب الطبخ من زمان < طالعه على أمهااا:42:
طبعاً اللي راح تشوفونه أشبه بالدروس يعني قسمناه على أسبووع يعني الطبق اللي أسويه لشخص واحد أو شخصين فقط لأن كان مجرد ]
يالله حبيباتي نبلش بسم الله بحط لكم المقادير والطريقة وكل شي عشان الكل يستفيد يعني مو بس صوور << وموو تضحكون على طبخاتي ترى توني كنت في البداية :p
لا تروحون بعيد~:26:
مجبووس الدجاج
1- نغسل الدجاج عدل بعدين نفركه بكركم وملح عشان الزفرة تروح ونغسله مرة ثانية
2-نضع كمية من الماء في الجدر تغطي الدجاج تقريباً ثم نضيف بصل مقطع - ملعقة صغيرة من بهارات مشكلة + كمون بودر + كزبرة بودر + فلفل أسود بودر + ماجي مكعبات + هيل بودر + شوية ملح ونتركه حوالي نصف ساعة لين ينضج
3- بعد ما ينضج الدجاج ندهنه بشوية كركم لإعطاء اللون ومن خلف قطعة الدجاج نرش شوية فلفل أسود ونقليه بزيت غزير من الجانبين
4- نيي الحين للعيش أنا سويت حوالي جيلة .. أول شي نحمس بصل في الجدر بعدين نضيف ماء الدجاج ونضيف شوية ملح - ماجي بودر + عصير ليمونة وآخر شي العيش ونتركه على نار عالية بعدين إذا شفنا تبخر معظم الماء نقصر ونتركه على نار هادية
5- قبل لا يستوي بشووووي نحط شوية زعفران مذوب ماء+ شوية صبغة صفرا وآخر شي الدجاج
ننتقل الحين لطريقة الحشو~
1- نجهز النخي بحيث إنه ننقعه بالماء لفترة بسيطة بعدين نفوحه لين يصير لين شوي + نجهز كشمش
2- نحط كمية من البصل المقطع في المقلى ونرشه بالماء لين يذبل
3- نضيف للبصل ليمون أسود بودر + ملعقة صغيرة من بهارات مشكلة + دارسين بودر + رشة ملح ونحمس لين يتغير لونه وآخر شي نضيف الكشمش والنخي اللي جهزناه ونقلب لمدة خمس دقائق .. وانتهى
يتبع~