هذا الملف لفطورنا للست من شوال بناءا على طلب البنات بملف اليوميات :) ..
وهذا ملف اليوميات لمن حبت الاطلاع عليه ..
يوميات فطور بيتنا بهالشهر الفضيل وبالصور ..
اولا في وايد صور ضاعت للأسف لان كامرتي اختربت :06: وامسحت 3/4 الصور والصور اللي راح اعرضها هي اللي قدرت أنقذها ، والله يابنات مت قهر كنت مصورة لكم الصور بالخطوات بس الله يعوض علي و اعوضها لكم ان شاء الله لكم ياقلبي ، وفي صور راح تلقونها مو واضحة وايد لانها من التلفون :( ..
سامحوني يابنات على القصور من ناحية الصور بهالموضوع بس والله مو بايدي..
مـــاشـــاء الله ، تــبــارك الــرحــمــن..
فطور اول يوم ال6 من شوال ..
وهذي صورة السفرة "صغيرة لان مو رمضان ، الله يعوده علينا بالخير"..
وترى هالصورة مو موضحة كل اللي بالسفرة لان الصورة اللي بالطول انمسحت..
سلطة خضراء..
المقادير:
خيار
طماطم
خس أمريكي
بقدونس
خلطة السلطة الجاهزة بالريحان
الطريقة:
نقطع الخيار والطماطم مربعات صغيرة..
نفرم البقدونس والخس ناعم..
نخلط المكونات ونسوي الخلطة "بإضافة ماء وزيت عليها" ونضيفها على السلطة مع عصرة ليمون..
فتة الحمص لذيذة وسريعة..
المقادير:
خبز "استخدمت اللبناني"
1-2 ك حمص المطحون مع الروب والطحينة وشوية ثوم وليمون وكمون وفلفل اسود وملح
1/2-1 ك حمص حب
ماء سلق لحم
1 م ك كمون
زيت زيتون
وصنوبر محمر
الطريقة:
قطعي الخبز مربعات متوسطة شربي الخبز بماء سلق اللحم وانثري 1/2 ك حمص حب على الخبز وشوية كمون ثم حطي الحمص المطحون فوق الحب وساوي الوجه ثم زينيه بالصنوبر والكمون والزيت وبالعافية ..
وهذا منظرها من النص..
فتة لسانات لذيذة جدا براي اهلي وتم القضاء عليهم اول الاطباق تبارك الرحمن..
انا ما اكل بالخروف غير اللحم والمصارين من ايد امي او جدتي بس واي شي ثاني واااي الله يديم النعمة..
المقادير:
لسانات خروف طازجة "افضل"
بهارات سلق اللسانات:
دارسين ناعم وعودان ، هيل ، لومي ، ملح وكركم ، بهار لحم وجوزة الطيب وفلفل اسود ناعم وحب
2 ك روب
خبز لبناني
1/4-1/2 ك طحينة
م م ثوم ناعم
2 م ك ليمون
م ص كمون و م ص فلفل اسود و رشة جوزة الطيب
ماء سلق اللحم او اللسانات "امي تسلقهم مع اللحم"
صنوبر محمص
الطريقة:
اسلقي اللسانات "احمسيها بالبصل والثوم ثم البهارات والماء الحار وخليها تغلي وكل ماتطلع الزفرة شيليها ..
ثم قطعي الخبز وشربيه ماء سلق اللحم..
اخلطي كلا من "الروب والثوم والطحينة و الليمون والبهارات" مع بعض وصبيهم على الخبز..
قطعي اللسانات بالحجم اللي تحبينه وقلبيهم بشوية زعفران واقليهم بشوية زيت او زبدة ورشيهم على الوجه وزيني الطبق بالصنوبر المحمص وبالعافية..
وهذي صورتها من قريب..
قوزي دجاج ، والدجاج محشي فريك أخضر..
المقادير:
دجاج كبير
بهارات سلق الدجاج:
لومي ودارسين ناعم وعودان وهيل وبهار دجاج وفلفل اسود ناعم وملح
فريك أخضر " منظف من الصخر ترى فيه وايد صخر صغير ومغسول ومنقوع ساعتين"
حمص حب
ماء سلق الدجاج حار
ملح و2م ك دارسين وم ك فلفل اسود وم ك كمون
1 م ك زبدة
للتزيين : حشو"بصل وكشمش" ولوز وصنوبر محمرين بزيت وزبدة
الطريقة:
حمسي البصل ثم الفريك والحمص وصبي عليه ماء سلق الدجاج وخليهم بنفس المستوى "يعني الماء بس يغطي سطح الفريك لا اكثر ولا اقل ، لاننا نقعنا الفريك ساعتين" ، وخليه لحد مايغلي وحطي الزبدة على الوجه ثم غطي الجدر وقصري النار وخليه 10 دقايق ..
افركي الدجاج بشوية ثوم مع الفلفل الأسود من داخل واحشيها بالفريك مع البهارات وبعدين حمريها وهذي الطريقة بالصور..
طريقة حشو وسلق وتحمير الدجاج :)
وهذي طريقة الرز وبعد سلق الدجاج..
طريقة الرز والدجاج والحشو :) ..