دكتورة هبة يارب يخليكى يا رب والف شكر ليكى على اهتمامك وردك وربنا يكرمك يارب
ده انا مش عاوزة اقولك باقى القتلى والله اللى جوه وطبعا موجود يافندم الغسول بس صابونة طبية وانا عارفة انك قولتى بلا ش صابون بس هيه خاصة للوجه وايضا كريم بالكولاجين قال يعنى علشان التجاعيد ويتخن وشى شوية وهو مش فاكرة ماركة ايه برضه حاجة قيمة بس بقفلته علشان مايبردش طبعا انا عندى مشكلة عكسية لبنات الملف
الى هيه نقص الوزن وباكل كل حاجة ومش باعمل ريجيم لا انا باغصب نفسى اكل بالعافية زى الاطفال ومافيش فايدة برضه باخس المهم معلش تعباكى استعمله ولا لا وامتى ومر ة تانية شكر اجزيلا يا قمر

وماله يا روشى ندخل على الشعر
شوفى يا ستى الاثنين كويسين بس نفس الهدف واحديعنى الاثنين بيوقفوا التساقط
انتى لو كنتى استعملى اى واحد فيهم ولقيتيه كويس وريحك كملى عليه وممكن كمان تكملى المجموعه يعنى تجيبى التونيك والمسرع هيدوكى نتيجه كويسه وبالنسبه لتركيبهم عباره عن اعشاب طبيعيه وبعض العناصر الغير ضاره يعنى مش زى المينوكسيديل اللى فى hair grow بيديكى نتيجه هايله واول ما توقفيه شعرك يقع تانى يعنى ان شاء الله امن
بس عاوزه انبهك فى اسباب اهم من العلاج الدوائى لعلاج الشعر سواء كان بيقع او مش بيطول اومتقصف مثلا انك مش يكون فى انيميا ويكون غذائك صحى يعنى بتاكلى خضار وسلطه وجرجير والاطعمه اللى بتحتوى على الزنك والحديد وتكون النفسيه تمام لان القلق والتوتر والزعل بيموت جذر الشعره وبيخليها ضعيفه فبتقع
ويكون ده حديث العهد يعنى مثلا مش من وانتى لسه نونو وشعرك بيقع لا يعنى بدا يقع مثلا لما خلفتى او لما بداتى ترضعى او من فتره مثلا نتيجه التقدم فى العمر ولازم برضه تعرفى ان فى سقوط طبيعى للشعر فى اليوم وفى سقوط مرضى واخيرا انه يكون فى مشكله فى الهرمونات لو كل دول تمام اوكى استعملى العلاج الدوائى ساعتها اقدر اقولك ان شاء الله فى خلال شهر هتشوفى نتيجه تفرحك لو بقى كل دول ملخبطين يبقى وفرى فلوسك لغايه ما تظبطى نفسك تظبطى النفسيه والغذاء واستعملى بقى حمام كريم او حمام زيت اللى ترتاحى عليه وطبعا شامبو كويس يكون مناسب لنوع شعرك وعلى فكره حاولى تغيرى النوع كل 6 شهور مثلا نفترض انك بتستعملى دوف يبقى لما يمر 6 شهور غيرى لهيربال اسنسيز لمده شهر مثلا وبعدين ارجعى تانى لدوف لو ده اللى بترتاجى عليه الغرض من كده انك تدى صدمه للشعر لانه بيتعود على نوع معين فاحيانا مش بيسفيد منه بيكون مجرد نظافه فقط


بالنسبه للفيتامينات الافضل طبعا هو البنتوجار بس ميكونش فى حمل ولا رضاعه بتاخدى كبسوله 3 مرات يوميا مع الوجبات ومش بتمضغيها لا بتبلعيها بالماء نتاخديه لمده شهر ونشوف النتيجه لو لاحظنا تحسن بنكمل من 3 الى 6 شهور لو لا بنوقف ونستعمل غيره لانه فى حالات قليله جدا بيكون الجسم مضاد ليه يعنى مش متقبله وبيرفضه فمش بتلاقى نتيجه لاسعماله العلبه فيها 90 كبسوله بتكفيكى شهر
واى خدمه يا باشا



حبيبتى اتاكدى الاول من تاريخ الصلاحيه لا يكون ركناه من فتره وانتهى
لو لسه شغال يبقى استعمليه بديل لكريم النهار لغايه لما ينتهى ارجعى استعملى كريم النهار حسب النظام اللى كنت قلتلك عليه
وبالنسبه للصابونه طالما طبيه وخاصه بالوجه خلاص مفيش مشكله كده زى الغسول بالظبط
اما بالنسبه للنحافه رحتى لدكتور قبل كده يعنى مثلا عملتى تحليل براز عشان تتاكدى انه مفيش ديدان وعملتى تحليل دم تتاكدى من الانيميا والسكر لا قدر الله وفى تحاليل تانيه كتيره بس الاهم انها متكونش طبيعه جسم يعنى فى ناس مثلا من وهى صغيره وده جسمها حتى بعد ما اتجوزت وخلفت مفيش تغير يعنى انتى كده من زمان ولا ده جديد عليكى





اميره لا شكر على واجب يا حبيبتى
وعلى فكره كل اللى بيقال على الشيفنج ده غللللللللللللللللللللللللللللط وكلام اتنقل مع الزمن هو وسيله زى السويت والشمع بس مشكلته انه بيطلع الشعر سريع

شوفى يا ست الكل بالنسبه للانيميا لازم تعالجيها الاول وبعدين تعالجى شعرك لان طول ما الانيميا موجوده الشعر هيفضل متبهدل حتى لو عملتى ايه معلش انا صريحه معاكى بس لان دى امانه لازم اقولك المعلومه الصح
فانتى عالجى الانيميا اعملى الاول تحليل دم عشان تشوفى نسبه الهيموجلوبين وبعدين روحى لدكتور باطنه كويس تابعى معاه عشان هو اللى هيحدد العلاج اما حبوب حديد او حقن وحاولى تاكلى كبده وسبانخ وعسل اسود وجرجير ورمان وتوت وكل الاطعمه المحتويه على الجديد
وربنا يشفيكى يا حبيبتى وتكونى فى احسن حال دايما ان شاء الله

جزاكى الله خيرا يا دكتورة هبة

انا بستخدم تونيك كامينوموتو واقراص بانتوجار مصرى مش مستورد

وشعرى بيتعدل شوية عليه لكن اول ما اكسل عليهم شوية حال شعرى بيتدهور جدا

انا اعتقد انى باكل كويس لكن مقصرة جداجدا فى الالبان والسلطة لكن خضار فاكهة معقول

النفسية والتوتر الحمد لله انتى عارفة ضغوط الحياة والاطفال والشغل صعب جدا النفسية تبقى كويسة فى وسط دول فانسي ان دى ممكن تتغير

انا كنت عايزة اعرف لو فى حاجة احسن من دول اجيبهم بس انتى قولتى انهم كويسيين وانا الحمد لله لما بستمر عليهم بيتحسن الحالة

بس انا خايفة من طول الاستخدام هل يكون ليه تأثير جانبى؟؟ خاصة كامينوموتو؟؟؟

اللى انتى بتستعمليهم كويسين ومفيش ضرر ان شاء الله من اسعمالهم وطالما انتى حاسه انه فى تحسن خلاص يبقى استمرى عليهم ممكن لما تخلصيهم اقولك على حاجات تانيه بس على الاقل استمرى فى العنايه
ونصيحه خلى حد يجيبلك من بره البنتوجار المستورد لان المصرى ملوش لازمه مضرووووووووووووووب

يا حبيبتى الف شكر على اهتمامك وتعبك
وبلنوسبة للنحافة والله عملت كل التحاليل انتى عارفة انا من حوالى اربع سنين فى اجازة روحت مع ماما عند الدكتور بتاعنا اللى جنب بيت ماما وطبعا عارفنا من زمان لانه اساسا جارنا المهم لما شافنى اتخض ايه مالك كويسة قالى مستحيل وقلت له انا الهيموجلوبين رائع لانى على طول الفيتامين لا وايه بتاع الحوامل طول الوقت قالى طب الخسسان ده مستحيل يكون طبيعى المهم اعملى التحاليل ديه وتعالى ماما طبعا على الطبطاب روحت ورجعت مافيش حاجة طبعا الاشعات ماشى شرحه السونار ماشى المهم قعديقرا فى التحاليل باستفاضة لما مافيش حاجة فى اللى فات لقى ان نسبة الصفائح الدمويه ضعيفة جدا المهم روحى لدكتور امراض دم روحت الدكتور قال مافيش مشكلة فعلية حاصلة معاكى خلاص مافيش علاج غير الكورتيزون وانتى مش محتاجاه وبس قصة حياتى والموضوع ده من زمان بس مش طبيعة جسمى ده انا كنت 82 كيلو والله ودلوقتى بالعافية 55كيلو وقبل كده كان 50 ويمكن اقل بس انا فى الوقت ده البنات هدوا حيلى لانهم توائم فطبعا مش قادرة اقولك بس الحمدلله الحمد لله وشكرا ياقلبى على اهتمامك