مراااااااااااااااااحب انا ويني عنكم تصدقووون توي اشوف الملف بس شكله يبي اسبوع اقعد افتشه ( نواعم حلو توقيعك انواع النعومه )
<<----------تبي تسوي توقيع وكل يوم اليوم خخخخخخخخخخخخخ

يا حبيلكم يا بنات ..

رفعتن معنوياتي الله لا يخلي منكن .. والله انكن راعيات فزعة ..

نواعم .. يا أنعم بنت .. يا أنعم وأرق إحساس .. ذبت يوم قريت ردك علي يالغالية .. وودي أشوفك اليوم قبل عقبه .. وش رايك تسيرين علي دامي بالنفاس ؟؟

حبيبتي : الي غاثن اني مارة على الجعيدي قبل ولادتي وشايفة عنده حاجات تهوس مرررة .. لكن ما كنت أقدر أشتري بذاك الوقت .. ما يناسب الكرشة شي!!
ويوم رحت له هاليومين ما اعجبن شي !! ما ادري خلّص الزين الي عنده والا أنا ذوقي تغير عقب الولادة!!!!!!!!!!!

أما اقتراحاتك فحلوة لكن ما عندنا بنات صغار ولا عيال .. كلهن أمهات عيال .. وما ادري وش قصتك مع أكار شوكولانا .. لا يصير لابوك والا أخوك ..؟؟؟
ان كان لكم تراي أمون أبي بلاش!! ( ما تعطى وجه اجحدي عنه انه لكم)!!!!!!!

نعّومة :
عندي لك بعض الاسئلة :
* بكم تغليف القرطاسية الي قلتي حتى أشوف الميزانية تسمح والا لا ؟؟
* اعجبن اقتراحك بالكراتين .. لكن بكم تتوقعين يسوونه؟؟ وممكن يسويه نفس المحل الي قلتي؟؟
* وين مكان القرطاسية بالضبط؟؟
* وين مكان حلويات العربي؟؟ وايش المميز عندهم؟؟
* كيف شكل قصة الدقراديه؟؟ ويطلع الشعر قصير مررة والا مدرج ؟؟ وأي أنواع الشعر الي تناسبه ؟؟ ودي توصفينه لي ولو بشكل تقريبي..
* أبي رقم مرام ؟؟ وبأي مشغل هي؟؟

أدري اني هريتك بالأسئلة بس تحملين أمون .. وأنتي كريمة وأنا استاهل!! ( مداح روحه)!!


كاظمة الحزن :

لا تنحتينن .. هللي واذكري الله .. أخاف أصير اكتب كل النهار وما أحد يعطين فيس ولا قفا !!!
حبيبتي .. وشي قصة الكوكتيل .. أوصفيه لي حتى اتخيله.. وش نوع الشعر الي تناسبه ؟؟
مشكلتي شعري ينفش بالرطوبة ومقبلين على موسم أمطااار !!! أخاف أتوهق بقصة ما تناسب وتطير شوشتي!!!!!!
أما أطقم الحمام فخابرتهن عند محلات المفارش .. عندك الخضيري بفروعه الي بامتداد شارع الملك عبد العزيز بالديره .. وفيه بالزاوية( تقاطع عبد العزيز مع شارع فيصل ) فيه محل جديد كبير مررررة أظن اسمه السنيدي أعجبن من برى لكن ما حصل أدخله لأن أبونا عيا ( شانت نفسه من الزحمات)!! لا يفوتك شكله مغري وكبير وعنده تشكيلات كثيرة ..



هنودي : عيوني مشكورة على ردك لكن وش الفرق بين شكل القصتين؟؟

الزبرجده :
حبيبتي لما الحين ما شفت النخيل ..أما العثيم ما أعجبن شي .. ومبتلشة بعمري ..
الجزم وانتي بكرامة لا تشرين ماركات لما يخفضون .. لأنه بصراحة فرق بين السعر الاصلي وسعر التخفيض .. عندك الماركات بالنخيل ..
أما لو تبين غير الماركات فخابرة لك محل بدواعيس قبة رشيد مقابل بقالة أم علي قبل السواجي حق الجلابيات .. عنده موديلات قمة بالنعومة واسعاره زينة مرررة .. الي يلهدن ويغثن أني أشوف محلات الجزم بالعثيم عارضه نفس بضاعته بس بأسعار فلكية ضعفين أو ثلاثة!!!


عاشقة النفود :
كل هالمدة على بالي انك من بريدة طلعتي من ديرة ثانية؟؟
لا تصيرين من عنيزة بس؟؟ ان كنتي فعلا منه يبي يصدق كلام أبونا !!
كل ما قلت له أبروح عنيزة قال الحين هم يتسوقون من عندنا وانتي تتروحين لسوقهم؟
وش نسوي عاد ؟؟ طبيعتنا ما نبي الي عندنا .. ومقيولة ( زامر الحي لا يطرب )!!!
وحنا يالحريم نحب الدوجان .. لو يقال لنا بالربع الخالي سوق قلنا نبي نشوفه!!!
سيري علي لا جيتي لبريدة تراي حبيبة وسمحة وأحب التعرف على الحبيّبين زيك ..

بدور : ما أدري يا عمري والا كان أفدتك ..


شواطي : البنجابي حياتي تلقينه عند السواجي بالقبة .. واذا تبين غالي وفخم روحي لواحة الجلابية .. والمحل الي مقابله على الزاوية ( ناسية اسمه) بالنخيل .. أو اليشمك بالعثيم ..


ريماس : هلا وغلا بك .. شرفتي الملف..

نواعم : البنجابيات العادية عند السواجي والي حوله ..

أما اليشمك فما انصح به الا وقت التخفيض الا للمضطرة ( حالة الحمل والكرشة)!!
والتخفيض للأسف ما يكون شي الا بفروع الرياض ..دايم اعلانات التخفيض بالجريدة..

الزبرجدة :
حبيبتي لا يفوتك الباحوث ( الصالة الجديدة الي بطريق المدينة ) .. عندهم أطقم سفرررة رهيبة خشعت عندهن ربع ساعة ما قويت أفترك!!! ما شريت لأني شارية من مدة من المجال ..
بس ميزته انه مطقمة ( طاولة أكل وكراسي ودولاب السفرة ومراية كبيرة فخمة ) .. لكنه بصراااحة شي يستاهل ويواجه ويبهر!! لكن يجن أكثر من ست كراسي .. ولو تبين نصيحتي خوذيه أحسن لو جاك ضيوف كثيرين ما تبحلين بعمرك وترقعين بالكراسي!!
أنا عندي كثار بس شايلة بعضهن بالمستودع ومغلفتهن عن الغبار لوقت الحاجة..
أما الكنب فعند العمر.. وعند العمير بعد موديلات حلوة .. لكن عيبهم غالين ومو دايم تلاقين شي فخم مرررة .. لكن استغلي فترات التخفيض لما يعلنون عنه..
أما الفريز ,الثلاجة والغسالة فعدي واغلطي بالمحلات ..عندك بشارع الملك عبد العزيز ,, وفيه فروعهم بشارع البشر والاسكان ..
لكن نصيحتي اسئلي بقسم ساعدوني عن الماركات الزينة والعملية حتى ما تتوهقين بنوع شين اما البائع فلاتثقين بمدحه ترى ولاءه لتجارته وربحه اكثر من ولاءه لك !!!
ونصيحه ثانية بعد لا تشرين فريز صغير لاني توهقت به قلت حنا شويين ويكفينا صار ما يكفي لاغراضي !!! اشري اكبر حجم ولا راح تندمين لانه لك وللزمن
وبعد عندي نصيحة أخيرة :
غرضين ما ينفع تلمسهم الشغالة ( غسالة المواعين وغسالة الملابس الاتوماتيكية ) .. حقت المواعين دخليه بوجود الشغالة ولا تستعمل الا في حالة عدم وجوده .. وغسالة الملابس أنتي بنفسك شغليه وحذريه من الاقتراب له!!
لأن هالجهازين أذا اختلفت عليهن الايدين اندمرررن وصارن ما ينفعن بقرش سعود!!!!!


تفاريح :

هلا بك يالغالية .. نورتينا .

مساااااااء الورد والفل على الكل
حياكم الله يالقصيميات :27: والله استانست يوم شفت ملفكم
تقبولني ضيفه معاكم الله يدخلكن الجنه

هنووووو قصيمية

هلابك يالغالية شرفتينا حبيبتي

بنات عنيززززززززززة تكفوووووون

بنات عنيزة تكفوووون

من احسن دكتورة نساء في مستشفى الوفاء (البر) ؟؟؟؟؟
ومن الدكتورة الحليلة الي ممكن تمدد لي الامومة؟؟؟؟

تكفووون تراي ضايقتن بي الوسيعة بسبب هالدوام ابي حل تعباااانة مرررة

ساعدوني ابي الرد الليلة ضرووووري لانب ابروح لهم بكرى ان شاء الله....

الله يوفق الي ترد علي يا ااااااااااااااااااارب

هلا وغلا فيك أختي ابداع
اسال الله العظيم رب العرش الكريم ان يشفيك والمسلمين اجمعين
الصراحه ماعندي خبره كثيره عن مستشفيات عنيزه بس يمدحون دكتوره اسمها عزه بس للاسف مادري بي مستشفى ..........
الله ييسر لك امورك اي استفسار ثاني انا حاضره