السلام عليكم ياأحلى بنات
أنا جمعت لكم معلومات عن العنايه بالشعر والكلام لشوكولاته عشان كنتى بتسألى

العناية بالشعر

زيت الحية أو حمام كريم بزيت الحيه
عمل حمام كريم مرتين أسبوعيا لعلاج التقصف و تحسين الشعر حمام كريم رأيته عند حراز بدهن الحية

التدليك والمساج للشعر عند التسريح وهذه الخطوة رغم بساطتها الا انى ارى انها الاهم لانها تضمن تنشيط الدورة الدموية وبالتالى وصول الغذاء الداخلى من الجسم وهو اهم من الخارجى ويمكن الاستعاضة عن التدليك بتسريح الشعر فى اتجاهات مختلفة وعلى كره هى أحسن طريقه لمنع تساقط الشعر

عمل ضفيرة للشعر دائما لضمان طوله بسرعة

ها يابنات أنا حكمل بقية التجهيزات متابعين معايا . امبارح كتبت لكم احتياجات المطبخ ولوقتى ان شاء الله مع احتياجات العروس

اولا: ملابس البيت
زى البيجامات –
قمصان نوم –
بيجامات وقمصان نوم قطن-
. الملابس الداخلية القطن و اللى بالى بالك –
. باديهات حمالات وكات
. وبنطلونات باجى وقطن
. الشورتات بتبقى حلوه قوي
الفساتين البناتي القصيره بتبقى ظريفه وعمليه
عبايات بيتى لاستقبال الضيوف وخصوصا الاهل
الباديهات الكات والحمالات وكمان نص كم جميع الالوان -ومتوفرة فى روكسى وكمان رخيصة يعنى ممكن مثلا تجيبى 10 كات و10 حمالات

البنطلونات الباجى والكتان اللى نازلة على الوسط (الواسعة) وكمان البنطلونات البرمودة برضة هاتى منهم الوان زى الاسود والبيج والزيتى علشان يليق مع معظم الالوان

الشورتات القطن والاسترتش جميع الالوان وكلها بتنفع فى البيت

الفساتين القصيرة اللى فوق الركبة زى بتاعة الاطفال ودية تحفة فى البيت لان العروسة لازم تغير فى نوعية لبسها علشان الراجل لازم يشوف الجانب الطفولى فيها وخصوصا لو عاملة ضفيرتين او قطتين

فية كمان اطقم مكونة من بنطلون قطن استرتش طويل شارلستون وعلية بادى بكم طويل وبسوستة من النص والحاجات دية بتنفع لما يكون حد جايلك زى مامتك او اخواتك او اخواتة مثلا اوحتى اصحابك

البيجامات الشورت والطويلة القطن مهمة جدا يعنى هاتى 3 من دول و3 من دول.

قمصان النوم القصيرة فوق الركبة والطويلة القطن وكمان يكون منها الكات والحمالة والنص كم يعنى نوعى

الملابس الداخلية القطن زى
- الاندر وير بالوان واشكال مختلفة وكثيرة
- البرا برضة الوان مختلفة
- وكمان فية اطقم من قطعتين قطن حلوة جدا

الشباشب للبيت 2 للحمام 3 للضيوف 2 للبيت
بالنسبة لقمصان النوم اللى بالى باللك

قمصان نوم ستان طويلة باشكال والوان مختلفة ممكن عدد6 مثلا
البيبى دول عدد10 مثلا
روب عدد3
بيجامات ستان عدد6
والاندر وير الاشكال المختلفة اللى انتوا عارفينها والاطقم المكونة من قطعتين

السلام عليكم جميعا
انا لسة شايفة الموضوع ده دلوقتي وبجد عجبني جدددددددددا لأن فرحي قريب اوي وتقريبا مش بابطل اتكلم مع اختي عن قلقي عن الجهاز والحجات الناقصة والحجات اللي جبتها.. بس اخرا لقيت حد ليه نفس اهتمامتي ومجموعة ممكن اسألها على الحجات المحيراني وممكن افيدهم كمان لأني قريت سريعا كل اللي البنات كتبوه وليا تعليقات عليه

اولا انا فرحي في في نص سبعة ان شاء الله وانا من المنصورة وخطيبي من المحلة والفرح في المحلة ان شاء الله

بالنسبة للي كانت بتسأل عن اللانجري في المنصورة فا فيه طبعا محلات كويسة اسعارها اعلى من غيرها بس مش اوفر اوي يعني وفيه محلات ممكن تشتري منها حجات حلوة برده وبسيطة وباسعار معقولة بس انا عن نفسي باعتبر ان محل وجدي جلال احسن محل لانجري في المنصورة هتلاقيه جنب النساجون الشرقيون في اخر المشاية حجاته تحففففففففة ونصيحة انك تقيسي اللانجري قبل ما تجبيه لاني كنت ساعات كتير احب شكل حاجة واجي البسها محبش شكلها عليا واهم حاجة الراحة النفسية في الحجات دي لانك طول ما انتي مرتاحة وحاسة انها حلوة عليكي جوزك هيتنقله نفس الاحساس اكيد ان شاء الله. وفيه عندك كمان ريناد وده حلو برده بس وجدي جلال عنده كل اللي بيجيبه ريناد تقريبا وزيادة عليه شوية. لو عايزة تعرفي محلات تانية ممكن اقولك انا خلاص عرفت كل محلات اللانجري تقريبا في المنصورة.

بالنسبة للتلاجة كريازي انا فعلا باسمع من زمان انها حلوة جدا بس من حاولي سنتين فيه واحدة صحبتنا كانت متجوزة جديد وجابتها بس بهدلتها اخر بهدلة وفيه كذا حد اشتكى منها مؤخرا ودلوقتي كله بيشجع توشيبا اللي ب 2 باب مش 3 باب. والبوتجاز سمعت فعلا ان يونيفرسال احسن حاجة في السوق دلوقتي. والتلفزيون برده توشيبا والغسالة زانوسي طبعا.

بالنسبة للستانلس طبعا زهران بلا منازع سواء حلل او طقم الشاي او صواني مدورة او السرفيسات بتاع السفرة بجد كل حجاته تحفة والتيفال برده زهران طبعا

بالنسبة للخشب انا جبت من دمياط مع انا بابا مكنش مرتاح في الاول بس بعد ما جه كان مبسوط منه جدا لانه فعلا تشطيب دمياط لا يعلى عليه ولا يمكن اي نجار يعرف يطلع الشغل ده وانا بافضل عن نفسي الحجات البسيطة لان فعلا البساطة بتحلي اي حاجة.

وبالنسبة للي كانت بتتكلم عن المراتب انا كنت عايزة اجيب المراتب الجاهزة بس كنت مقلقة شوية وقلت اسأل الأول لقيت كذا حد اعرفه جايب منها وبيشكر فيها جدا وكلهم اجمعوا على ان ينسن احلى نوع حتى احلى من هابيتات وبالنسبة للتكلفة هتلاقيها نفسها بالظبط ويمكن التنجيد اغلى كمان لانك كدة كدة لازم تجيبي قطن شعر عشان يبقى مريح. فا ناوية ان شاء الله بدون مقاطعة اجيب ينسن. وفيه كمان حاجة عجبتني جدا شفتها عند ماستر بد اللي هيا غطا للمراتب بحيث تحافظ على المرتبة وتغسلي الغطا وترجعيه مكانه تاني وبالنسبة لمراتب الاطفال الغطا ده متبطن بلاستيك ومن فوق قطن وده ممكن نشتريه لوحده من عندهم ان شاء الله لو مفيش ينسن منه. بس انا لغاية دلوقتي مش عارفه توكيل ينسن فين في المنصورة يا ريت اللي تعرف تقولي.

انا عندي كلام كتير جدا عايزة اقوله وعندي لستة كتباها ممكن تفيدكم بس ان شاء الله هارجعلكم تاني قريب. انا بس كنت محتاجة اعرف مين احسن كوافير في المحلة لاني عايزة كوافير على مستوى كويس لان الميكب اب التقيل مش بيليق عليا ابدا ومش لاقيه كوافير بيعرف يعملي ميكب كويس. وكمان تكون لفة الطرحة عنده كويسة. يا ريت اللي من المحلة يفيدني او اللي يعرف حد من المحلة يسأله ربنا يبارك فيكم.

لي عودة مرة تانية ان شاء الله

معلش يا جماعة انا كنت محتارة اوي في الصيني وحجات النيش انا عارفه انا هاجيب ايه بالظبط بس المشكلة ان مفيش حاجة عجباني في المنصورة واللي عاجبني غالي شوية بيعمل 5000 وحجات كدة وانا شايفة انه كتير على الصيني يجي ب 5000 او حتى باكتر من 2000 انا عايزة اروح بورسعيد اجيب الحجات دي من هناك بس الحقيقة مش عارفه اماكن هناك خالص وكمان مش عارفه هيخرجوني من بورسعيد عادي والا هياخدوا جمرك والجمرك ده بيبقى حسب ايه بالظبط وبيبقى كتير والا قليل. معلش اسألتي كتير استحملوني وادعولي لحسن معتش عندي وقت خالص ربنا يستر

القطه الصغيره.... ألف مبروك مقدما على الزواج وربنا يتمم لك بخير
وأسألى ياحبيبتى زى ما نتى عايزه بس للأسف أنا من القاهره ومش حقدر أفيدك فى الأماكن فى المنصوره والمحله لكن إن شاء الله البنات حيردوا عليكى

ها يابنات فين الهمه عايزه نشاط اكتر من كده