شكراااااااا ياقمر على الدعوه الجميله دى
ويااارب يتممللك على خير وتكونى فرحانه طول عمرك ان شا الله
بصى ياقمر انا طبيعه شعرى عاديه
والله والله والله الخلطه دى رهيبه بجد
حتى ماما لما شافت شعرى قالت ماشالا حول ولا قوه الا بالله شعرك جميل على الخلطه دى

بنات على فكره تلاجه الكتروستار جميله ااااوى
هى عندنا فى بيت ماما وماشا الله عليها شغاله حلو اوى والحمد الله مفيش منها ولا شكوى لحد دلوقتى وواعه وجميله حتى الفريزر بتاعها حلو اوى
وماما ناويه تشترى لاخويا منها لانها مرياحه

واحنا كان عندنا ايديل لكن مش عجبت ماما وفعلا الفريزر ضيق والمتوركان مش حلو

cat 2006

بالنسبة لاسم المحل في سيتي ستار هو Ricci وهتلاقيه تالت او رابع محل اول ما تدخل سيتي ستار من الباب الرئيسي يعني قريب مش هتطلعي ولا هتنزلي. وبالنسبة للاسعار اغلبها بتبقى 200 جنيه للبلوزة او الجيبة وفيه كمان عنده فساتين حملات واصلة للركبة او فوقها حاجة بسيطة ودي طالعة موضة انك تلبسيها مع بلوزة بكم تحتها (بس متكونش بدي بحيث تكون مش ماسكة على الجسم) ومع بنطلون واسع شيفون مثلا . وعنده الفساتين دي جاية على سواريه خفيف اوي اوي وهي دي برده الموضة اللي طالعة اليومين دول لو تاخدي بالك وفيه عنده بلوزات شيفون قصيرة رقيقة جدا جدا ممكن تلبسيها على جيبات واسعة وعنده البلوزات الكبيرة الواسعة اوي دي بتبقى شيك اوي برده في اللبس. وعنده كمان بلوزات اللي هيا واصلة لتحت الصدر بشوية صغيرة وبتتربط من ادام بتبقى حلوة برده مع اي فستان حملات من اللي باقولك عليهم واسعار البلوزة القصيرة دي 45 وكمان كان عنده فست قصير كدة يتلبس مع جيبه سعره 65. وفيه حجات تانية كتير مميزة سواء في الخامة او التفصيلة وان شاء الله تعجبك.

وبالنسبة لفابيلوس فعلا تخفيضاته بتبقى تحفة وانا جبت في الشتا وقت التخفيضات شوية بيجامات وقمصان بيت مشفتش انعم منها ابدا بصراحة لكن المشكلة ان فرحي في نص سبعة وكتب كتابي في اخر ستة ان شاء الله والمفروض اني هافرش الدواليب والمطبخ بعد عشر ايام ان شاء الله فا مش عندي وقت خالص استنى التخفيضات. وبالمناسبة لازم تروحي سيتي ستار ايام التخفيضات تخفيضاته بتبقى هااااااااااايلة وتروحي في بداية التخفيضات عشان قبل ما الحجات الحلوة ما تخلص.

انا كمان حجزت مراتب يانسن اليومين اللي فاتوا من عند واحد في حدايق المعادي صاحبه مدير في يانسن وعملي خصم 7% انا مفهمتش اوي الخصم بتاعك اد ايه وجبتيها منين يا ريت توضحلنا عشان البنات يشوفوا احسن مكان ايه ليهم.

شيواوا

الله يبارك فيكي يا رب وميرسي اوي على مساعدك بس معلش يا ريت تقوليلي اروح ازاي جنينة مول من رمسيس لو تعرفي وكمان ترشحيلي اروح ايه لو انا معنديش وقت الا لمكان او مكانين بالكتير وتفتكري وسط البلد احسن والا جنينة مول والا كايرو مول وكمان اروح كايرو مول ازاي وشكرا اوي اوي اوي هاتقل عليكي بالاسئلة معلش. وبالنسبة للمحل هتلاقي التفاصيل مكتوبة في ردي على كات 2006. وبالتوفيق يا قمر.

بالنسبة بقى لبلاتينيوم فا انا رحته تاني على السريع لقيت حجات عجبتني وجبت من عنده بنطلون حلو واسع عشان الوقت مكنش مكفيني بس تقريبا لما رحت اول مرة مكنش عاجبني عشان كنت جاية من عند سيتي ستار فا كنت متأثرة شوية بالحجات اللي هناك :)


نانو

منورانا يا قمر وشكرا اوي على حمام الشعر وان شاء الله اعمله قريب بس لما اجيب حجاته ان شاء الله.

د. بيوتي

جزاك الله خيرا على النصيحة وانا ان شاء الله هاكون محجبة في الفرح بس ربنا يستر والكوافير يعرف يعملي الحجاب كويس.

ميجراتوري

اهلا بيكي يا جميل وان شاء الله اعرف اساعدك في اي حاجة لو في المنصورة :)

سمسمة

على فكرة عدد قمصان النوم من بين 20-30 معقول وده المتوسط كمان وكل ما كان اكتر كل ما كان احسن انا مجربتش لسة بس ليا اختين متجوزين وكمان اصحابي وكلهم اجمعوا انهم بيحتاجوا قمصان نوم كتير وبيشتروا كمان بعد كدة بفترة قصيرة على اللي كانوا جايبينه في الاول لان دايما الراجل بيبقى عايز يشوفك كل يوم بشكل جديد ولو عليه مش عايزك تلبسي القميص تاني :) وكل ما كنتي متجددة كل ما هيبقى عايز يعرف كل يوم انتي لابسة ايه النهاردة وشكلك عامل ازاي. والله اعلم ده حسب كلام الناس اللي حوليا ولما اجرب هاقولك ان شاء الله.

انا هانزل اجيب الصيني الاسبوع ده ان شاء الله مع الكاسات بس شكلها هترسى على المنصورة ومش هالحق اروح بورسعيد او طنطا بس اللي مصبرني انهم بيقولوا فيه حجات جديدة نزلت السوق من اسبوع وهاقولكم على الاخبار لما اعرف.

بالنسبة للتلاجة انا كنت مترددة بين توشيبا والكتروستار بس لما رحت اشتري من يومين مش عارفه ايه اللي نزل عليا وقولت توشيبا :) هو تقريبا النصيب وسبحان الله جاية لون رصاصي مع ان المحلات بتقولي انه لون بيجي بالطلب هو والدهبي ولما جينا نلف باقي المحلات عشان البوتجاز لقيت ان فيه نقص فظيع في توشيبا وبيقولوا عليها طلب جامد بالذات ال 14 قدم. وبالنسبة للبوتجاز انا اعدت اقارن مع ان يونيفرسال كان في دماغي بس مش عارفه ليه دلوقتي شايفة كريازي احسن لما شوفتهم ادام بعض حسيت كريازي احسن بكتييييييييير فا ايه رأيكم يا بنات؟؟ يا ريت تقولولي بسرعة.

بالنسبة للكوافير يا ريت يا سمسمة تحاولي تسألي عن احسن كوافير في المحلة ربنا يكرمك لاني مش لاقية حد يقولي انا سمعت ان الملكة احسن واحد بس اخت خطيبي كانت عامله فيه ومعجبنيش ابدا وسمعت ان فيه واحد جديد تبع المتحجبة اسمه سيتي بلازا تقريبا يا ريت تشوفيلي الموضوع ده ربنا يكرمك ويسعدك يا رب.

القطه الصغيره....
أنا بحب جنينه مول أكتر لأنه كبير وعنده كل الأذواق وممكن تروحى معاه شارع عباس العقاد وحتلاقى حاجات كتير من العباسيه بتروح عباس العقاد وجنينه مول لكن مش عارفه فى حاجه من رمسيس ولا لاء بس لو مفيش ممكن تاخدى حاجه من رمسيس للعباسيه ومن العباسيه ميكروباصات كتير بتروح عباس العقاد

كايرو مول ده فى شارع الهرم وممكن تروحيه من موقف فى ميدان التحرير اسمه ميدان عبد المنعم رياض أو من ميدان الجيزه حتلاقى حاجات كتير تروح هناك

سمسمه
انتى روحتى مرسى مطروح أنا رايحه قريب ان شاء الله قوليلى كده من خلال خبرتك ممكن أشترى ايه من هناك أنا اعرف طبعا الأعشاب كلها والبهارات والتمر فى ايه تانى ممكن اجيبه من هناك

السلام عليكم ورحمه الله وبركاته
ازيكو يا بنات الموضوع ده فعلا رائع ومفيد جدا لاي بنت
بصراحه دي اول مره اشترك في موضوع وانا مبسوطه اوي
انا مخطوبه وهتجوز اول السنه انشاء الله