حبيت انزل ملف خاص بالاكلات اليمنية وكانت فكره الغاليه بنت جدتي أشارت علي بعمل ملف للاكلات اليمنيه التي قد نزلتها راقت لي الفكرة وبتكون حافزا لي انزل اكلات أخرى لم انزلها بعد وان شاء الله يعجبكم وتستفيدوا
ابدا بالأكلات البحريه
1- مطفاية سمك
جبت لكم اكله مطفايه سمك (اكله يمنيه ) هي قريبه جدا لاكله صانونه السمك بس مره لذيذه جربوها
المقادير
4 او خمس قطع سمك من غير شوك ، 1 باذنجان ، 1 بصل . حبه طماطم . ملعقتين صلصة ، ثلاث فصوص ثوم مبشور ه ، شوي كزبره و بقدونس. ملعقه زيت زيتون . معلقه خل . رشه حلبه مطحونه . رشه قرفه بسيطه ،بهارات . ربع فلفل بارد
الطريقه
نتبل السمك ببهارات وفلفل أحمر وخل وزيت زيتون .
نقطع الباذنجان ع شكل دوائر ونقليهم
نجيب قدر ونحط فيه زيت قليل لما يكون حار نحط السمك ونقلبه للجهه الاخرى لما ينضج نخرجه
بنفس الزيت نحط البصل ونشوحه مع الثوم ثم الصلصه والطماطم يا اما تقطعيه يا اما تخلطيه بالخلاط ثم نحط للكشنه ملعقه فلفل أحمر وبهارات ثم نحط الباذنجان والسمك وفلفل بارد ونغمره بماء ونحط الكزبره والبقدونس ونحط رشه حلبه مطحونه وقرفه ويمكن الاستغناء عن الحلبه والقرفه ثم نخليهم يتسبكوا الين يثقل . وناكله مع رز ابيض او خبز وممكن نستخدم معاها البسباس العدني
صانونة سمك
جايبه لكم صانونه سمك عباره عن ايدام سمك لذيذ مع الرز الابيض هو يحتاج الى سمك مافيه شوك زي الثمد بس انا استخدمت سمك شعور وازلت الشوك
المقادير
كيلو سمك او نص كيلو بدون شوك .
ا ربع او خمس بطاطس كبار مقطعات مكعبات - بصله كبيره -:طماطتين كبار . خمس فصوص ثوم - ملعقتين كبار صلصه . حبتين بسباس عدني . شوي كزبره وبقدونس
الطريقه
تقلي البطاطس المكعبات وتخليهم ع جنب
تتبلي السمك وتقليه وتخليه ع جنب وتتبيلتي للسمك بهارات وملعقه خل وملعقه زيت زيتون وثوم مبروش وملح وبعدما تقليهم تبعدي الشوك
تنقعي البسباس العدني بمويه حاره لمده ربع ساعه وتغسليه وتخرجي من داخله الحبوب وتحطيه بالخلاط مع حبتين طماط كبار وفصين ثوم وتخلطيهم وتخليهم ع جنب
وهذا شكل البسباس العدني
تجيبي القدر وتقصي له بصله كامله وتبشري خمس فصوص ثوم وتحمريهم بزيت بعد كذه تضيفي لهم ملعقتين كبار صلصه ثم تضيفي خليط الخلاط وتحطي البطاط المقليه ثم السمك وتقلبي بهدوء ثم تضيفي مويه تغمرهم وتخليهم يتسبكوا ولا تنس البهارات والملح ورشي كزبره وبقدونس ووطي تحت الشوله الين تحسي المويه صارت ثقيله قدميها مع رز ابيض رووعه
بديل البسباس العدني ملعقه فلفل احمر بس بالبسباس العدني تطلع ألذ
صيادية السمك اليمنية
جايبه لكم صياديه سمك عباره عن كبسة سمك بطريقه لذيذه
المقادير .
رز انا سويت رز الوليمه سوي الكمية الي تناسبك
خمس بطاطس مقطعات مكعبات
بصلتين مقطعات شرائح طويله. خمس أو أربع حبات سمك ثمد أو أي نوع . حبتين طماطم كبار. نص ثومه مبشوره. حبتين بسباس عدني واذا لايوجد معاكم سووا ملعقه فلفل أحمر مطحون . ملعقتين صلصة. بهارات مشكله . ملعقه قرفه مطحونه . ملعقه هيل مطحون. حبتين مسمار .شوي كزبره .شوي بقدونس
الطريقه
قطعي البطاطس مكعبات واقليهم وخليهم ع جنب. قطعي البصلتين شرائح واقليهم بنفس الزيت واقسمي البصل المقلي قسمين
وخليهم ع جنب. اقلي السمك وخليه ع جنب
إعلان
سلقت الرز نص سلقه مع عودين قرفه ورشة هيل
تنقعي البسباس العدني أو بديله فلفل أحمر مطحون تحطيه بالخلاط مع حبتين طماطم وفصين ثوم
تجيبي القدر تحطي له نص كميه البصل المقلي وتحطي من الزيت الي قليتي فيه البطاطس والسمك وتحطي نص ثومه مبشوره وتحركيهم وتحطي البطاطس وتقلبي مع ملعقه قرفه مطحونه وملعقه هيل مطحون وحبتين مسمار ونص فلفل بارد مقطع وملعقتين صلصة وخليط الخلاط وقلبي وشوي ملح وبهارات كاري وكمان كزبره مطحونه. وشوي كزبره وبقدونس تحطي السمك فوق البطاطس من دون ماتحركي السمك حتى لا يفتت تجيبي الرز تحطيه فوق السمك والبطاطس بدون ماتحركي الرز تصبي القليل من الماء ولا تغمريه بالماء تحطي شوي زعفران مطحون مع شوي ماء وتسكبيه عن يمين الرز وكركم مع ماء وتصبيه يسار واجهه الرز والوسط تخليه ابيض وتحطي بقيه البصل المقلي على واجهه الرز وشوية من الزيت الي قليتي به السمك تحطي القليل بالواجهه وتغطي القدر وع نار هاديه جدا حتى لاتحترق من تحت وتبخريه بفحمه وكل شوي تفتحي القدر تضيفي شوي ماء حتى ينضج
وعوافي عليكم
ملاحظه يفضل سمك مافيه شوك انا عملت سمك اسمه شعور فيه شوك بس كنت حريصه يوم غرفت الرز غرفته بهدوء حتى لايتفتت السمك وينزل الشوك منه للرز واذا كانوا أطفالك صغار اكليهم انتي لذلك من الأفضل سمك ثمد (ديرك)
وهذا يوم آخر سويتها
اكلات باللحم
الزربيان العدني اللذيذ (كبسة لحم )
من أحب الاكلات إلى قلبي وكثير عضوات طبقوه واعجبهم
اقدم لكم طريقه الزربيان العدني اللذيذ
تجيبي كيلو لحمه حاشي او عجل تطبخيها بالضغاط تقصي البصل وتحطي اللحمه وبهارات منوعه وتقلبي كثير مع البصل وتضيفي الماء للضغاط وتضغطي الين تنضج اللحمه وتحطيها ع جمب ... الرز تغسلينه وتغليه بالماء وتخليه ينضج نص نضجه وتصفيه من الماء وتحطيه ع جمب .... البطاط استخدمت اربع بطاط كبار قرشتهم وقطعتهم مربعات وقليتهم وبنفس زيت البطاط قليت بصل شرايح تستخدمي بصله كامله تقطعينها شرايح وتقليها ...وتخليها ع جمب ... تدقي ثومه كامله مع ملعقه كبيره قرفه وملعقه كبيره هيل وهذا سر نكهه الزربيان وممكن تخلينهم ملعقعه ونص ع حسب الكميه بعدما تدقينهم مع بعض تخليهم عجمب
نجي الان لتركيب الزربيان تجيبي قدر كبير والاحسن يكون تيفال واذا مافي تيفال مو مشكله وتقصي له بصل كامله وتحطي زيت وتشوحي البصل الين يحمر تضيفي خلطه الثوم والهيلوالقرفه الي دقيتيهم ترميهم للبصل وتحركي وتجيبي البطاط المقلي واللحم وتضيفينهم لخلطه البصل وتقلبي وتعملي لهم بهارات وشويه ملح وتقلبي وتقسمي هذه الخلطه نصين بحيث اول طبقه بالقدر تكون هذه الخلطه وبعدين نص الرز وبعدين بقيه الخلطه وبعدين بقيه الرز وتضيفي شويه ماء وشويه من مرقه اللحمه وتعملي شوي من الزعفران او الكركم بواجهه الرز والبصل الي قليتيه الشرايح تحطيه كمان في الواجهه وحطيه ع نار هاديه وغطيه وكل شويه اتفقدي وضيفي ماء . واخر حاجه تبخريه بفحمه ..
بالنسبه لزربيان الدجاج استخدمي نفس الخطوات بالضبط واستبدلي اللحم بالدجاجعقدة لحم (ايدام لحم )
جايبه لكم اكله اسمها عقدة لحم
- المقادير كيلو لحم عجل او حاشي او غنمي. اربع او خمس بطاطس. طماطتين .خمس فصوص ثوم . حبتين بسباس عدني واذا ماتوفر سووا ملعقه فلفل احمر . شوي كبزرة وبقدونس . بصلتين .نص فلفل بارد مقطع شرايح . ملعقه صلصه او ملعقتين
- الطريقه تسلقي اللحم بطريقتك المعتاده تقلبيها مع بصله وبهارات مشكله ومويه وتضغطي الضغاط
- تفرغي اللحمه لقدر وبنفس الضغاط قطعي بصله وشوحيها ع زيت وخمس ثوم مفروم لما يحمروا تضيفي البطاطس عشكل شبس او مكعبات وتضيفي قطع اللحم وتقلبي والفلفل البارد المقطع شرايح وملعقه الصلصه او ملعقتين صلصه وتضيفي البهارات وكمان أضيفي رشه هيل ورشه فرقه وتكوني نقعتي البسباس العدني تجيبي حبتين وتنقعيهم بمويه حاره وتاخذيهم للخلاط مع حبتين طماط وفصين ثوم واخلطي وضيفي الخليط لللحم واذا مافي بسباس عدني بديله ملعقه فلفل احمر مطحون وتقلبي الخلطه وتغمريهم بمويه وتضغطيوبخري الاكله بفحمه ورشي عليهم كزبره وبقدونس وإذا ماتبغي تبخريها براحتك
حنيذ لحم بالضغاط
جايبه لكم اليوم حنيذ بقدر الضغط بطريقتي من زمان أحب الحنيذ بالضغاط أكثر من الفرن
المقادير
لحم اي نوع استخدمت لحم غنمي
بصلتين . بهارات متنوعه . شحم لحم . رشه قرفه . رشه هيل
الطريقه
جبت الضغاط وحطيت له قطع شحم وولعت النار وجلست اقلب الشحم بعصا خشبيه لما نزل شوي من الشحم رفعت الشحم وحطيت البصل كان مقطع شرائح وقلبتهم بالشحم مع فصين ثوم لما حمروا شوي حطيت اللحم مع ملح وبهارات متنوعه ورشه كركم والبهارات سويت بهارات لحم وكزبره مطحونه وفلفل احمر واسود وكاري وقلبتهم مع البصل
ملاحظه مهمه الملح والبهارات تكون كميتها نصف الكميه إلي تعمليها للحمه المسلوقه بعدما قلبتهم فتره رشيت آخر شيء رشه هيل خفيفه ورشه فرقه وسويت مويه نص كاسه عصير فقط واكبسي الضغاط ووطي النار تحته يقعد ساعه وبخريه بفحمه
الرز عادي سويت له فصين ثوم واعواد فرقه وثلاث مسمار وكركم حطيته ع جنب
انصحكم فيه مره لذيذ والي ما تحب بالشحم عادي تحط البصل وفوقه اللحم وتقلب
لاتنسوا ان الملح والبهارات يكون نصف الكميه إلي تسويها للحمه المسلوقه
وبالعافيه عليكم ولاتنسوا تبخير اللحمه بيعطي نكهه رووعه
شوربة الجريش مع اللحم
جايبه لكم شربه سهله وسريعه
تسلقي الجريش ما يكون جريش ناعم يكون مجروش نص
تطبخي اللحمه تقلبيها مع البصل وتضيفي كاري وفلفل أحمر مع اسود وبهارات لحم وكزبره مطحونه وبصل مجفف مطحون وتقلبي عده مرات الين تحسي ان اللحمه قدها بتنحرق تسوي لها مويه وتضغطي
تصبي المرق للجريش وتخليهم يتسبكوا شوي وتحطي اللحم قطع كامله أو تفتتيها للشربه
وتحطي لها ليمون
شوربة راس الكبش
احيان بالعيد نسوي شربه رأس الكبش
نغسل الراس بعدما يكون تنظف بالملحمه
نقلبه مع بصل وبهارات ونسوي ماء ونضغطه بالضغاط
نسلق الجريش ويكون كمان معانا لحمه مسلوقه نصب مرق اللحمه ونحط الراس وقطع لحم ونخليهم يتسبكوا شوي
لذيذه جدا الي ما تحب الراس تسوي فقط الطريقه الي فوق
الهريش والمرق الحامض
اكله شعبيه يمنيه
المقادير
جريش . . لحم . بصل . طماطتين . حلقه . 10~15 تمر هندي . شوي كزبره . فصين ثوم . 3 قرون فلفل حار . نص ملعقه صلصه . نص ملعقه فلفل حار . ملعقة دقيق ابيض .
الطريقه
تقطعي البصل للضغاط وتحطي اللحم وملح وبهارات متنوعه وتقلبي مع البصل وتغطي وتجي بعدين تقلبي اللحمه وبعد كذه اضغطيها وخليها ع جنب
انقعي التمر الهندي بمويه حاره وخليه ع جنب وهذه كميته
كمان انقعي الحلقه بمويه حاره وهذا شكلها
عندنا اسمها حلقه ما اعرف عندكم أيش اسمها نحط بالخلاط طماطتين الحلقه الي نقعناها وشوي كزبرة وقرون الفلفل الحار ونص ملعقه صلصه . وفصين ثوم ونص ملعقه فلفل أحمر وشوي ماء واخلطيهم وخليهم ع جنب
خذي نص المرق وحطي له الي خلطتيه بالخلاط وحطي له التمر الهندي مع الماء المنقوع فيه التمر الهندي وجيبي ملعقه دقيق ابيض وذوبيها بشوي ماء وصبيها للمرق وتولعي تحته وخليه يتسبك نص ساعه الين يثقل يعني المرق تصبي له التمر الهندي المنقوع مع المويه المنقوعه وخليط الخلاط والملعقه الدقيق المذوبه بماء وتخليهم يتسبكوا نص ساعه . وتضيفي للمرق ثلاث قطع لحم لازم يثقل وتكوني قد سلقتي الجريش تغرفيه لطاسه وتسوي فيه حفره وتصبي له المرق الحامض مع قطعتين لحم او ثلاث
العصيد والمرق الحامض
بشرح لكم طريقه العصيد تجهزي دقيق بر مخلوط مع دقيق ذره شاميه صفراء وممكن تخلطيه مع دخن
انا ماكان معي الا دقيق بر تجيبي قدر تولعي تحته وع طول تحطي دقيق البر ع مراحل وتضيفي الملح وتقلبي بسرعه بمشبك الكيك اليدوي انتبهوا الدقيق يتكتل كلما تضيفي دقيق حركي بالمشبك بسرعه حتلاحظيه يبدا يسوي فقاعات استمري بالاضافه وقلبي لما يصير ثقيل زياده جيبي العصا الخشبيه وابداي قلبي بعد كذه ضيفي شوي مويه رشه بسيطه وغطيه وتجي كل شوي تقلبي العصيد بالعصا وتضيفي رشه ماء
بعد كذه حطيه بطاسه او فخار واعملي حفره وصبي المرق الحامض مع اللحم طريقه المرق الحامض عند طريقه الهريش
طبعا الي ماتعرف العصيد لازم تشوف طريقته يوتيوب لأن يمكن شرحي ماتفهمه
اكله البريك الشهية طعم ولا اروع
اكله يمنيه تقدم في العزائم وهي تشبه بنت الصحن لكن الفرق ان داخلها حشوة معينه
هذه اكله سويتها انا وامي ان شاء الله تعجبكم
نجي للعجينه شويه ماء دافي وملعقه خميره فوريه وبيضتين ودقيق تقريبا مقدار كاستين كبار ونص وتعجني العجينه مع اضافه شويه زيت ... وتخليها تخمر ربع ساعه وتقطعيها كرات صغيره تقريبا كان معانا 14 كره وخليناها خمس دقايق قبل المد وبدأنا نمدهم قبل شرح طريقه المد بشرح لكم الحشوه
الحشوه تجيبي نص كيلو مفروم تغسليه واضغطيه بالضغاط مع ملح وتجيبي قدر تقصي له بصله وتحمريها بشويه زيت وتضيفي نص حزمه بقدونس مقطعه قطع صغيره للبصل وتضيفي المفروم وحركي بالملعقه وقلبيهم دون اضافه ماء وضيفي شويه بهارات ورشه بسيطه ملح.... وجهزي ع جمب ربع كيلو جبن ابيض قطعيهم قطع صغار ممكن تبشريهم يكونوا لحالهم لاتضيفيهم لخلطه المفروم ..
طريقه المد تجيبي صحن الفرن تدهنيه بسمنه مراعي وتبداي تمدي الكره الاولى بحيث تغطي الصحن كامل وثبيتي اطرافها بيدك ورشي رشه زيت ومدي الطبقه الثانيه والثالثه ومابين كل طبقه وطبقه رشي زيت بعدما مديتي ثلاث طبقات رشي من خلطه المفروم وخلطه الجبن وبعدين غطوهم بثلاث طبقات عجين ثم خلطه المفروم والجبن وهكذا يعني ثلاث طبقات عجين والرابعه تكون المفروم وهكذا واخر طبقتين تكون عجين ثم رشي الواجهه بزيت وسمسم وقطعيهم مثل الصوره
ثم ع الفرن من تحت ثم فوق الين تحمر
سويتها أنا وأمي بعد كذه اعتمدت ع نفسي وصرت اسويها من نفسي. بعض المناطق يضيفوا الحشوة بيض مسلوق بس احنا مانحبها بالبيض المسلوق وبنت الصحن اسويها بنفس العجينه
الشاي العدني
المقادير
2 فتله شاي الكبوس او اي نوع
كاستين ماء كبار نفس الصوره
رشه هيل . حبتين مسمار
نص فنجال قهوه سكر
فنجال قهوه حليب أبو قوس او لونا
الطريقه
تجيبي إبريق الشاي تصبي له كاستين مويه وتفكي فتلتين شاي وتحطي السكر والهيل والمسمار وتولعي النار وتقعدي جمبه كل ما يجي يفور تبعديه وترجعيه مره أخرى للنار بعد كذه صبي الحليب ورجعيه مره أخرى للنار
طبعا إذا شفتي السكر ناقص زيديه
والهيل اذا ما معك مطحون سوي ثلاث حبات
ملاحظه ملاحظه لا تجربي أنواع حليب أخرى جربت بوني وأنواع ثانيه ماضبط الا مع شاي أبو قوس او لونا
بالنسبه للكميات الكبيره ما عندي مقاس محدد اعبي مويه ع قدر الترمس واعمل تقريبا سبع فتلات والسكر والشاي اقدرهم تقدير
بالنسبه لمقدار الكاسين الي مامعاها فتله تسوي ملعقه شاي ولازم يفور الشاي كثير يعني حتى لو فار الشاي ابعديه من عين البتجاز ورجعيه
الذمول اليمني
عباره عن كعك مالح بس يكون حجمه كبير
طريقه الذمول بتكون رهيبه مع الشاي للفطار او العشاء
المقادير
كيلو دقيق كويتي- اربع او خمس بيضات للعجين - صفار بيضتين لدهن الوجه - نص كاس سمن مثلا المراعي أو فام -شويه زيت - شوي من الحبه السوداء(حبه البركه )شوي من السمسم - ملعقه خميره فوريه
الطريقه
تجيبي حله العجين تصبي كأس ونص ماء دافي او كاستين ماء وتحطي ملعقه الخميره الفوريه والخمس البيض او ممكن تعملي اربع بيض وتحركي البيض بيدك ثم تضعي الدقيق وتصبي السمنه وشويه زيت وتعملي ملح تقدريه انتي وترشي شوي من السمسم والحبه السوداء وتعجني الين تحسي العجينه قاسيه شوي تغطيها تخمر ربع ساعه وتقطعيها كور وتمديها بيدك بحيث تكون شكل دايري وتحاولي تظفري الاطراف بس انا ماضبطت معايا الظفيره امي تظفرها احلى لان هذه اول مره اسويها وتخليها تخمر شويه بصحن الفرن ثم تدهنيالواجه بصفار البيض
وترشي فوقها سمسم وحبه سوداء وتكوني مسخنه الفرن من قبل وتدخلي الصحن تولعي النار الي تحت على درجه 200 ثم ولعي النار الي فوق الين تتحمر .. وبالهنا والشفاء 
البقلاوة اليمنية
المقادير
ثلاثه او اربعه كاسات دقيق . بيضتين . ربع كأس شاي زيت . فول سوداني محمص . قرفه مطحونه . شيره(قطر)
الطريقه
العجينه لاحظوا مافيها خميرة ولا ملح فقط دقيق بيض زيت
تعجني العجينه مع شوي مويه وتكون لا رطبه ولا قاسيه وتخليها ع جنب تغطيها وبعد عشرين دقيقه قطعيها كور يعني لازم يكونوا 15 كره وما فوق .وغطيهم خليهم عشر دقايق بعد كذه تبداي كذه تسطحي الكره شويه بيدك وتخليها دقيقتين بعدين تمديها ع شكل دايره كبيره وتجيبي صحن دايري مدهون بزيت ورشه دقيق وحطوا الطبقه الأولى ورشوها بزيت ومدوا طبقه ثانيه وثالثه وما بين كل طبقه وطبقه رشوا زيت بعدما مديتي الطبقه الثالثه رشيها فول سوداني مكسر مو مطحون . تكسريه تكسير ولازم يكون محمص أنا نسيت احمصه المهم ترشيه فول سوداني ورشه قرفه مطحونه بالشكل هذا
وتسوي بعدين ثلاث طبقات وبعدين ترشي الفول السوداني وهكذا تستمري واخر طبقتين لاتسوي فيهم شيء وبعدين قطعتها
ودخلتها فرن حار ولعت تحت،ثم فوق لما تخرجيها لاترشي الشيره ع طول لازم تكون البقلاوه بردت شوي والشيره تكون فاتره مو حاره وتكون الشيره ثقيله ودخليها الثلاجه
وهذا الطبق طبق أمي
أما هذا فهو تطبيقي لطبق أمي صح حق أمي احلى بس كتجربه أولى يعتبر نسبيا حلو ومع التكرار ان شاء الله يكون زي حق أمي هذا طبقي والخطوات من تصويري
البطا ط بالكاري والتمر الهندي
اكله عدنيه اصلها هندي بحكم أن الهنود عاشوا فتره بعدن تقدم بالمناسبات تؤكل بالملعقه وتقدم في طواس الشربه الصغيره لكل شخص طاسه
البطاط بالكاري
تجيبي اربع او خمس بطاط كبار تقرشيهم تقطيعهم مربعات وتسلقيهم نص سلقه ماتزيدي في السلق عشان مايهترسوا
تجيبي شوي تمر هندي وتنقعيه بمويه حاميه وتخليه ع جمب انا سويت اليوم ١٥ فص تمر هندي ( حومر )
تجيبي الخلاط تقطعي له طماطتين وفصين ثوم وشوي كزبره وواحد فلفل حار وتخلطيه وتخليه ع جمب
تجيبي حله تقطعي لها بصله وتحمريها مع فصين ثوم وتضيفي واحد او اثنين فلفل حار تشقي شوي من الفلفل بالسكين بس ماتشقيه كامل تضيفي خمس حبوب حلبة تتحمر مع البصل والفلفل الحار المشقوق تضيفي للبصل المحمر الخلطه الي خلطتيها بالخلاط ثم تضيفي البطاط المسلوق نص سلقه تضيفي التمر الهندي مع الماء المنقوع تغمري البطاط بالماء تضيفي ملعقه كاري بس اذا زيدتي كميه البطاط تزيدي الكاري اليوم سويت ملعقتين كاري
تجيبي ربع كوب ماء تضيفي له ملعقه دقيق ابيض وتحركيها وتسكبيها للبطاط وتعملي الملح وتعملي ليمونه تمزيها للحله وتوطي الشوله وتغطي الحله الين تحسي ان الماء صار ثقيل تغرفيها لطاسه زي حق الشربه تاكليها ع ملعقه ما ناكلها بخبز ناكلها بالملعقه وتمتعي بالطعم ممكن تستغني عن حبوب الحلبه
ماكان عندي فلفل قرون سويت ملعقه فلفل احمر
اهم حاجه تخليهم يتسبكوا فتره لما تحسي ان الماء صار ثقيل
كعك يمني بلدي + كعك بالتمر بنفس العجين
جبت لكم كعك روعه للأعياد والمناسبات
المقادير
كيلو دقيق كويتي (بس انا ما سويت الكيلو كامل نقصت منه ربع ) يعني تسووا كيلو إلا ربع
أربع بيضات ... كوب سمن سائل ... كوب حليب سائل .. نص ملعقه خميره فوريه .. ربع ملعقه بكنج بودر . ملعقتين سكر .. نص ملعقه ملح ... نص ملعقه حبة البركه .. تمر معبوط
الطريقه
تسوي الأشياء السائله الحليب والبيض والسمن يكون سائل مو مجمد و تسوي الخميره الفوريه وحبه البركه والملح والسكر وتحركي بالمشبك اليدوي ثم تضيفي الدقيق والبكنج ع مراحل كلما ضفتي دقيق اعجني عشان لا تتكتل وضفت قليل زيت
المهم اعجنيها إلى أن تتكون عجينه متماسكه سهله التشكيل وتكون قاسيه نوعا ما قسمتها نصين وخليتهم يرتاحوا نص ساعه وهذا شكلهم بعد ماتخمروا
اثناء مايخمروا سويت التمر المعبوط اخليت التمر من النوى وجبت الصاج وقلبته بعصا خشبيه مع ملعقه سمن ورشة قرفه وهيل إعلان
قمت بالتشكيل بعضهم حشيتهم تمر والبعض بدون تمر وهذا شكلهم بعد التشكيل صار لونهم ابيض مع فلاش الكاميرا
ثم دهنتهم بصفار بيضه وممكن ترشيهم سمسم 
الشكل إلي بالوسط جبت قطاعه وقطعتهم وسويت خطوط بالسكين ما عملت لهم تمر الكميه كامل 55 حبه وكانت ثلاثه صحون
تدخليهم فرن حار وتوطي الحراره إلى 180 او 200 من تحت ثم فوق وهذا شكلهم النهائي
ملاحظه الوصفة فيها بيضتين انا سويت أربع ولكم الخيار
السمن الي استخدمته روعه مكتوب عليه بنكهه الزبده اسمه مازولا رووعه استخدمي اي سمن عندك
باقي أربع اكلات بملفي باضيفهم لنفس موضوعي بعد البريك بس الان تعبت بضيفهم بكره لأن نسخ المواضيع واضافه الصور أخذ مني وقت كله عشان خاطر عيونكم وخاطر الغاليه بنت جدتي
وانتظروني باطباق يمنيه أخرى بكون اضيفها لنفس الملف ودعواتكم