العفو يا كرمة، اسألي في أي حاجة انتي عاوزاها :26:

و بالنسبة للكيبورد، مش عارفة، بيتهيألي هي عاوزة انك تجربي بس اكتر من مرة لانها بتعلق معايا انا كمان ساعات، فأنا بافضل اعمل ألت و شيفت يمين و شمال لحد ما تظهر الحروف العربي. عموما حتى لو مش شغالة برضه عاوزين نشوف مشاركاتك :)

يا بنات فيه استيكرز شفاف عليه حروف الهجاء بالعربى وبيتلزق عادى فوق مفاتيح الكى بورد ويبقى ظاهر ليكى الحرف عربى وانجليزى بوضوح ولو مالقيتهوش ممكن تكتبوا انتوا المقابل لكل حرف انجليزى على ورق صغير وتلزقوه على المفاتيح بلزق شفاف الطريقه دى حلوه ومجربه

الله ينور يانودى :26:

الاخت عذبه بالنسبة للقطايف اللى طلبتيها فى ملف من كل بلد اكلة اللى بالجبنة واللى بالمكسرات
اهية حكتبهالك هنا

القطايف بالجبنة

1/2 كيلو قطايف عصافيرى
ربع كيلو جبنة رومى
زيت للتحمير
الطريقة
اضريى الجبنة الرومى فى الكبه ناعم
هاتى القطايف وضعى فى كل واحدة معلقة جبنة واقفليها كويس بالضغط
على اطرافها بصوابعك
ضعى الزيت فى المقلاية لحد مايسخن واقلى فيه القطايف ولونها حيكون ذهبى
طلعيها على ورق ماص للدهون وتاكليها بالهنا والشفا ساخنة بتبقى جميلة جدا
وممكن تحشيها جبنة بيضاء مهروسة بشوية بقدونس

القطايف بالمكسرات

1/2 كيلو قطايف عصافيرى
الحشو
زبيب مخلوط بجوزهند ناعم
او فستق مش ناعم قوى
او عين جمل وبندق مطحونين
قرفة ناعمة
زيت وسمن للتحميل
شيرة (عسل)(قطر)
الطريقة
بعد ماتجهزى الحشوة اللى انتى بتفضليها اما تخلطى شوية زبيب مع شوية جوزهند
او تفرمى فستق بس مش ناعم قوى
اما تفرمى عين جمل وبندق وشوية قرفة
وتحشى القطايف وضعى فى كل واحدة معلقة من الحشوواقفليها كويس بالضغط
على اطرافها بصوابعك
وحمريها فى زيت فقط اذا كنتى عيزاها مقرمشة او تحمريها فى زيت وسمنة حتطلع طرية وحلوة وتضعيها فى الشيرة وبالهنا والشفا


بيتزا بالقطايف للسحور
نص كيلو قطايف كبيرة الحجم طااااازة
صلصة طماطم
جبنة موزاريلا
زيت زيتون
فلفل رومى حلقات
بصل حلقات
زيتون اسود
وممكن تونة
الطريقة
اخلطى الصلصة بمعلقتين كبار زيت زيتون وادهنى بيها القطايف
ضعى شريحة بصل وعليها شريحة فلفل وعليها زيتون منزوع النوى
واضع عليها طبقة من الجبنة الموزاريلا
اضعها فى صينية مدهونة بجانب بعض وادخلها الفرن حوالى 10
دقايق لحد ما تستوى والجبنة تسيح وتحمر وبالهنا والشفا



قطايف بالكريمة
المقادير:
1 كيلو قطايف+عسل (شربات)+مكسرات مفرومة (اى نوع)+زيت للقلى,+كريم شانتى.+كريمة الخفق(اختيارى)
الطريقة
نجيب القطايف ونبرمة زى القرطاس من تحت وبعد كدة نقليها فى الزيت وتطلعيها من الزيت تحطيها فى الشربات بعد كدة تصفيها من الشربات وتضربى الكريم شانتى مع الكريمة وتحشى بيها قرطاس القطايف اللى عملناة وتحطى على وش الكريم شاتنى مكسرات مفرومة

ملحوظة :
لطول شهر رمضان كونى جايبة مثلا كيلو جبنة رومى و اضربية فى الكبة مرة واحدة و حطية فى علبة بلاستيك فى الثلاجة و كل يوم يا دوب فى 5 دقائق تكونى حشيتى القطايف قبل المغرب على طول وكل ما تخلص الجبنة تجيبى غيرها وهكذا
عندي حشوة جبنه بتطلع حلوه قوي .. لإني بأجمع فيها أي أنواع جبن جبن رومي أو حمراء أو شيدر أو جوده أو أي نوع جبن وكله مبشور ممكن الجبنه القريش والإستامبولي وأي نوع جبن أبيض مهروسين بالشوكه ألخبطهم علي بعض وأحط شوية نشا تمسكهم وممكن بيض مربوب وممكن نعناع ناشف أو أخضر وشوية بقدونس ..كل دول أعمل خلطه بيهم .. أحشي بيها القطايف وأشيل منها في الفريزر لوقت الحاجه ..

ميرسى يا سموحة المشكلة مش فى الزراير المشكلة ان مفيش عربى اساسا فى الباكيج بتاع ميكروسوفت
لما انزل مصر باذن الله اشترى واحدة

يا سبانيش فلاور بما ان حضرتك فى اليابان فاكيد مفيش قطايف--- يا ترى بتعملى العجينة و الفلم دة والا بتكبرى اناجربت عجينة مرة لكن الموضوع اتقلب لسهرة فمش عارفة العيب منى والا من العجينة

الى عنده اضافة ياريت يدلو بطشته