ملكتي جابت لي الهم

صباح الخير...
الله يوفقكم ويتمم عليكم بخير جميع، بنات انا عندي سالفة او مشكلة بسيطة مدري وش الحل المناسب لها، انا ربي الحمدلله تمم علي وانخطبت لأنسان كويس ماشاء الله ومايعيبه شي ومشت الامور وسوينا التحاليل وتمت الشوفة وكلش يارب لك الحمد، خطيبي من آخر الدنيا على قولتهم من قبيلة بعيدة جدا جدا عننا يعتبرون من قبايل البدو، الحين وش مشكلتي؟ ان حنا عندنا الملكة ع اهل البنت وتكون حفلة كبيرة ويحضرها الكل طيب، انا عندي القدرة اسويها بأي شكل ابيه سواء بأوتيل او استراحة او قاعة او حتى البيت يساعد بيتنا ماشاء الله، بس مشكلتي ان اهل خطيبي ماعندهم هالعادة ابد يعني الملكة قهوة وتوقيع ويجي يلبس الشبكة ويمشي، يعني لو سويت حفلة مافي حريم من أهله بيحضرون الا اخته يمكن!!! وابوه و2 من اخوانه احس شوي مره واخاف اسوي ملكة ينقدون علي اهلي ( قرايبنا) وبنفس الوقت اخاف اخليها مختصرة بالبيت واندم لان خاطري اسوي ملكة وافرح وافرح امي انا بكر اهلي واول وحدة تعرس عند خوالي وماشاء الله خوالي 5 وعمامي كثير وعيب عندنا نملك بدون اشهار وعشاء وكذا، والمعرس صراحة و اهله مره مو مرحبين بفكرة الملكة الكبيرة يبون بس حنا وهم ويجي يلبسني الشبكة وعشاء ويمشي بدون اقاربي انا ودي اسوي بس مفتشله اسوي واخر شي اهلي شكثر واهله مامنهم الا اخته احس بينقدون علي مره خصوصا خواته 2 متزوجات وامه بخير وخالاته بس مايبون يحضرون ، واهلي اصلا اوريدي ناقدين علي لاني وافقت اطلع من القبيله واروح بعيد مره بس والله الرجال كفو ولا ينعاب ، بعد هالهذرة ذي كلها المطلوب تشورون علي، اسويها مختصرة جدا بالبيت بس حنا واهله و اخليها بخاطري وخاطر اهلي؟ ولا اسويها عائلية بالبيت او مخيم و اعزم اقاربي المره وبس اخته تجي، ولا اخليها كبيرة ولا علي من احد! ولا اسوي شبكة بسيطة بالبيت وبعدين كبيرة لأهلي وحبايبي بس ولا وش احتررررررت!