مليت من كثرة زياراتها....(زيارات الأهل المبالغ فيها)

السلام عليكم
كيفكم يا طيبات
ان شاء الله بخير و بأحسن حال
الحقيقة من زمان ابغي افتح هالموضوع ... مو علشان ادور حل فقط...بس ايضا علشان استفسر كيف الناس يتزاورا و بنفس الوقت اللي تبغي تفضفض لانها تمر بنفس المضايقات تتكلم يمكن نقدر نساعدها

الموضوع و مافيه هو زيارات الأهل المبالغ فيها

اللي خلاني اكتب هالموضوع هو زيارة وحدة من الأهل
ياربي الله يهديها و يذكرها بالخير ما تيلس في البيت و دايما تطلع بيت و تدخل بيت
و تجينا بالأسبوع حوالي مرتين و اذا طولت طولت راح تجي كل اسبوعين مرة...بس غالبا تجي بالأسبوع مرتين أو مرة

مو قصدي احش فيها
هي طيبة والله بس مشكلة والله مليت مليت مليت منها من كثر ما تجي
واحنا صراحة متعودين الزيارات بينها و بين بعضها تاخذ أشهر او اكثر بس هي كسرت هالقاعدة
لدرجة انها من زمان كانت اليوم تجي و بكره تجي ..يعني يومين ورا بعض..بس الحين صارت ما تجي يومين ورا بعض ..يمكن كل ثلاث او اربع أيام
واللي يزعجني فيها ساعات تجينا بعد يومين و تقولينا يالقاطعين ليش ما جيتوا تزورونا؟؟؟؟ انا اقول في قلبي انتي اصلا عطيتينا فرصة علشان نزورك؟
و ساعات اقول يوم بتولد راح تنقطع عن زيارتنا شهر ع الأقل :41:
بس للأسف ... ما تكمل اسبوع والله إلا و تجي بيتنا مع انا نكون زرناها في بيتها بعد ولادتها!:o
احنا مو فاضين لها والله ...و هي كانت تجلس مدة طويلة بالساعات...بس في الفترة الأخيرة صارت تجلس فترة اقصر الظاهر حست علينا ننزعج من طول جلوسها

المهم...كيف أسوي
ساعات احسها عمرها ما راح تفهم ان زياراتها الكثيرة تضايقنا و ما تعطينا فرصة اننا نشتاق لها
و ساعات احسها تدري ان احنا منزعجين منها و ملينا منها بس ما يهمها..المهم انها تطلع من البيت و تزور الناس ...لان هي بنفسها تقول ما اعرف اجلس في البيت لازم أطلع

احنا على هالحال من اكثر من 4 سنوات، يعني من يوم صارت من أهلنا و للحين ما تغير الحال إلا شيء بسيط

هل أنا ابالغ؟ هل جميع الناس يتزاوروا بهالمعدل في الأسبوع؟
هل في أحد مرة بنفس المشكلة؟ و كيف تخلصتوا من المشكلة؟
و شو تنصحوني ... ؟ هي من أهلي المقرربين يعني و مستحيل اتخلص من زياراتها
لا تقولولي لمحي لها ..او عطيها بالوجه...لانها هي من أهلي المقربين وهي حساسة و راح يصير زعل و حساسية متأكدة من هالشي
و لا تقولولي تحملي...ترا والله تحملت سنوات و احس نفسي خلاص كرهتها و مليت منها والله من كثر ما أشوفها

دايما ادعي و أقول (اللهم اني اعوذ بك من جار السوء في دار المقامة) والله كريم

افيدوني الله يجزيكم خير:o