ممكن تتزوجين بدون قناعة عشان تفتكين من ازعاج اللي حولك؟؟

السلام عليكم يا عالم حواء :26:


أنا دائما اقرأ نصايحكم واقتراحاتكم وأحس فيها صدق وصراحة، مشكلتي خاصة شوي ولا لي رغبة أناقش صديقاتي فيها فقلت أشوف رأيكم :)

أنا جامعية وجميلة وموظفة وخلوقة وبنظر اهلي وجماعتي لي على اني كبيرة بالعمر ولا تزوجت لأسباب كثيرة والموضوع أصلا ماهو برأسي، قبل أسبوع حضرت زواج عمي وأنا لي أكثر من 3 سنين ما حضرت زواجات، وكان شكلي ناعم وأنيق ولاحظت كل الناس جلست تسأل عني (ماشاء الله لا اله الا الله).. بعد هالمناسبة خطبوني اثنين واحد دكتور جامعة بالرياض لكنه مطلق زوجته من سنتين ولا عنده عيال وامه تقول عمره 31 سنة ويبي وحدة بمواصفاتي على اساس يكون لي بيت خاص واستمر بشغلي، والثاني موظف بشركة قطاع خاص جامعي وعمره 28 وضعه المادي اقل شوي من الاول ولا سبق له الزواج والكل يمدح فيه لكن رديته لأنه مايبيني استمر بشغلي، وانا وحدة شغلها كل حياتها..

الحين كل اللي حولي من اهل ومعارف صاروا يلحون علي بموضوع الزواج وانه ضروري وليه ما تتزوجين الخ، علما اني انخطبت فتره وفكيت الخطبة، وأنا لي نظرة ثانية بأني ما أفكر الحين بهالموضوع وعندي أهداف مهنية ومادية أبغى أحققها بعدين لكل حادث حديث وهم فكرتهم اني راح أندم بعدين اذا كبرت وعنست وفات القطار ومن هالكلام، بيني وبينكم أنا ماني خايفة أصلا من العنوسة قد ما أنا خايفة من الفشل والطلاق لأني أعرف أكثر من صديقة فشلت علاقتها الزوجية وصار عندي تبلد تجاه هالموضوع.. واضطريت اقول لهم إن سبب رفضي للدكتور أنه مطلق وأنا حتى هالسالفة ماتفرق معي، لكن جد ما أبي أتزوج الحين ولا أبي الزواج يسرقني من طموحاتي واحلامي بس أحس اللي حولي مو قادرين يفهموني صح!!! :09:

أبي أعرف منكم هل ممكن وحدة تتزوج بدون قناعة وبضغط من اللي حولها وينجح هالزواج؟ انا ما اتوقع.. انتم وش رايكم؟


:26: