ممكن ترجمولي الكلام مو فاهمه شيئ عشان نستفيد لعلاج تكيس المبايض

شفيت تماما من مرض تكيس المبيض و ألف الحمد و الشكر لله

السلام عليكم و رحمة الله و الصلاة و السلام على أشرف المرسلين
أنا كنت كنعاني من متلازمة تكيس المبايض و كلنا كنعرفو أن هذا المرض صعيب في العلاج أو بالأحرى معندو حتى علاج من غير اللي بغاو إحملو كعطيهم الطبيب منشطات و إبر مع كامل الأسف كاينين اللي مكستاجبوش العلاج .
أ كتكون النفسية د المريضة جد محبطة ، خاصة مني كتمر عليها سنوات من الزواج بدون إنجاب ، أ كتبدى تسمع كلام جارح من عند الزوج ديالها أ من العائلة ديالو ، أ الخوف المستمر من فراق الزوج لها ، يعني كتولي عندها حياة مرة ، واخا هادشي ر ديال الله و لكن العبد اللي مواعيش ديما إحط اللومة على المرأة فحال اللي هي اللي جابت المرض الراسها ، واخا راه إبتلاء من عند الله سبحانه و تعالى و الحمد لله على كل شيء . الله رحيم بعباده ، كاينين اللي مراض بأمراض مستعصية في العلاج و بإذن الله شفاو تماما من المرض بفضل رحمة الله و قدرته سبحانه و تعالى .
و هذشي اللي وقع معايا بفضل الله تشافيت تماما من المرض و أنا دابا حاملة في الشهر الثالث الحمد لله ، الله إثبت الحمل ديالي و يجعل من الصالحين و من المجاهدين في سبيل الله و يفرح كل محرومة بالخلف الصالح يا رب .
أنا قبل الزواج بعامين اكتشفت هذ ا المرض و كانت صدمة قوية و لكن الحمد لله بهذ المرض هذ وليت مداومة على الصلاة ديالي أ وليت مقابلة ديني يعني كان بمثابة ردع لي الحمد لله . المهم هذ عامين كلها و أنا كنجرب ف أي وصفة قريتها ف النت جربت الدغموس د الصحراء مدة شهر و نصف . أ إكليل الجبل مع الزبيب مدة شهر أ حب الرشاد مدة 40 يوم ، و ٱحتجمت مرة وحدة ، و شربت 3 ألتار من الماء يوميا مدة شهرين ، و كنت كناخذ التلبينة النبوية كل يوم في الإفطار . مني تزوجت ما بقيت ناخذ والو حتى ل الشهر الثالث هذ بديت ف العلاج . المهم الشهر اللول جاتني العادة الشهرية 2 مرات أ فالشهر الثاني تعطلات علي شهر و نص لدرجة راجلي و ماماه فرح بزاف عند بالهم راني حاملة . النهار هبطات علي العادة الشهرية راجلي تصدم صدمة خايبة ولا فحال شي وحش معا ولا كعطيني كلام جد جارح أ حتى ماماه ولاة تعامل معايا خايب أ ولات كتهددني وسط داري المهم دوزوها علي ف ديك 20 يوم و حالتي كان إعلم بها الله فحال إلى شحال هذ و أنا متزوجة أ معمري ولدت أ أنا كنت ياللاه 3 أشهر أ مكملاش باش متزوجة . و كنت متخوفة بزاف حيت مكنتش قايل ليه على المرض ديالي . المهم غير سلات مني الدم مشيت الحمام جيت صاوبت مرقة بالدجاج بالمساخن الصحراويين أ بزعفران الحر و كليتها و شربت أتاي بالزعفران الحر و تغطيت مزيان . اليوم التالي بديت كنفطر بالشعير بنخالة ديالو مطحون أ مخلطة معاه معلقة صغيرة حبة البركة دايرة فحال العدسة كحلة ماشي السانوج أ كناخذ فنفس اليوم 5 ملاعق صغار من القسط الهندي البني كل ملعقة في أوقات الصلاة الخمسة أي ملعقة في الصبح و ملعقة ف الظهر ......... ، أ بالليل كناخذ ملعقة صغيرة من مطحون حبة البركة د السعودية المهم هذ الأعشاب ككون عند كبار العطارين اللي ثقة . إستمريت في العلاج مدة 16 يوم أ حبست حيث هذ الأعشاب تسقط الحمل إذا حذت . يعني تاخذوه 16 يوم من كل شهر حتى يحذت الحمل . أنا الحمد لله فنفس الشهر حملت و كل هذا بفضل الله سبحانه و تعالى مني درت تحليل الحمل و مشيت عند الطبيبة مصدقتش راسي حاملة و قاتلي باقين لك 2 أكياس فالمبيض الشمال و قاتلي غايمشيو لك مني تولدي حيت هرمونات الحمل كتحيدهم فالشهر الثالث مني رجعت عندها لقاتهم مشاو و قاتلي كلشي داب عندك طبيعي الحمد لله . القسط الهندي راه كنظم جميع الهرمونات و كقوي التبويض و بالتالي كتزول الأكياس و كاينين أخوات اللي انتاظمو عليه و حملو المهم و طبعا كلشي بإرادة الله . أنا ر قبل الزواج كنت كنقوم الليل مرة مرة و لكن ف رمضان الشهر كل داومت على قيام الليل و الإستغفار كنت كنطلب الله و اللح ف الدعاء ربي يشافيني ويرزقني بالذرية فالشهر الثالث من الزواج أ الحمد لله داكشي اللي وقع سبحان الله . قومو الليل و اكثرو من الإستغفار و استعملو القسط راه سنة نبوية . أ دعيو معايا ربي إثبت الحمل ديالي و يجعل الذرية ديالي من الصالحين و المجاهدين ف سبيل الله أو يجعل زوجي قرة عين لي و قرة عين له و ديما تزيني ف عينيه .
الله إرزقكم بالذريية الصالحة يا رب و الحمد و الشكر لله و الصلاة و السلام على رسول الله .