ممكن تساعدوني في عمل بحث!!

أنا أدرس دبلوم تربوي وطلبت مننا الدكتورة حقت علم النفس عمل بحث في مشكلة تتعلق بالنمو ونطبق عليها طريقة البحث الكلينيكي أو التجريبي.
وأنا فكرت أسوي بحثي على حالة طالبة عندنا بالمدرسة؛ الطالبة هذي بصف ثاني ثانوي وتصرفاتها زي تصرفات طفل بأول ابتدائي والبنات الله يهديهم يضحكون عليها وينتقدون تصرفاتهاوالمعلمات يتضايقون منها داخل الفصل لكثرة حركتها وتسوي حركات تخلي البنات يضحكون عليها والا ينزعجون منها يعني مثلا تجر الطاولة بقوة والمعلمة تشرح والطالبات منسجمين والا تجلس تلعب بالقلم تسوي حركات فيه أو تجلس تضغط بقارورة الموية وتطلع أصوات وزي الحركات هذي.
البنت بريئة جدا وطيوبة وخدومة لأبعد حد إلى درجة إن البنات الله يهديهم مستغلين خدمتها بالاستهتار فيها يعني مثلا يرسلونها لمعلمة تسألها عن شي تافه ويجلسون يضحكون عليها لما تهزئها المعلمة.
طبعا البنت تصرفاتها هذي كانت بسبب فقد أمها وهي صغيرة والضغوط اللي واجهتها يوم كانت صغيرة.
قصتها من البداية زي ما ذكرتها هي للمرشدة بعد ما سألتها عن حياتها..
كانت صغيرة يوم تمرض أمها وتدخل المستشفى وحطها أبوها عند زوجته الثالثة ( غير سعودية )لأن أبوها معاه ثلاث حريم ويبدو إن أمها كانت الثانية,
وكانت زوجة أبوها اللي حطها عندها تكرهها وضغطت عليها ضغط وضربتها وسوت لها شي ما يعلمه الا الله.
ولما عرف أبوها باللي يجيها طلعها عند زوجته الأولى وكانت حرمة كبيرة بالسن,
توفت أمها ما طولت ؛ والبنت عاشت عند هالعجوز وما شاء الله كانت حرمة كبيرة وطيبة وتخاف الله والبنت تثني عليها وتحبها.
لكن اللي أنا استشفيته من خلال معاملتي للبنت إن زوجة أبوها هذي ما تنهاها عن شي ولا تدبرها وإن اللي يدبرها هم أخوانها فحسيت إن البنت تحتاج لتوجيه لأنها صايرة زي ما يقولون على الطبيعة ما فيه توجيه وتصحيح لأخطاءها.
كذلك البنت فاقدة الحنان وهذا شي طبيعي. وأنا أتوقع إن زوجة أبوها تاركتها تخاف إنها تظلمها أو تحس البنت إنها تضغط عليها أو ما أدري ليه ما توجهها؟
ولما جت عندنا العام الماضي وعرفنا مشكلتها وحالتها بدينا أنا وكذا معلمة نحاول ننبهها ونحسسها إننا نحبها وإنها أحسن البنات.
مع العلم إنها ماعندها مشكلة بالذكاء وتفهم كل شي, صرت أمسكها وأقول لها أنا ودي تصيرين زي البنات اللي بفصلك اللي دائما المعلمات يمدحونهم ودي كل معلمة تجي تقول ما شاء الله على فلانه وتمدحك أنتي.
وقلت لها أنت مو زي البنات؟ قالت إلا قلت ليه أجل يضحكون عليك والمعلمات يتكلمون عليك؟
أنا أقدرك وأحبك وأتضايق لما أسمع وحدة من المعلمات تجي تقول عنك إنك آذيتيها بحركتك بالفصل أو بتصرف سويتيه بالفصل.
ومن هالكلام.
والحمد لله قدرت أكسبها وأحها وتحبني وصارت تقبل مني ياربي لك الحمد وتغير كثيييييييير هالسنة عن العام الماضي وقلت أنا ماشاءالله عليك أنتي هالسنة أحسن من العام ودرجاتك أحسن وفرحت بكلامي وقلت لها أنا أتابع مستواك لأنك تهميني وغاليه علي وأفرح لما المعلمات يقولون إنك جبتي درجة حلوة وبعد كل مرة أكلمها تزين الحمد لله وتشجع.
المهم أنا ودي أسوي البحث بأسرع وقت لأنه لازم أسلمه يوم الأحد.
وكل الأيام هذي وأنا حالتي حالة في البداية كنت محتارة ما أدري إيش المشكلة اللي أبحث عنها بعدين فكرت في هالبنت وسألت الدكتورة عن رأيها قالت حلو لكن راح تسوينه بالطريقة الاكلينيكية.
والحين محتارة بالموضوع بداية وطريقة عمل هالدراسة هل أكتب كل شي من عندي ومن المعلومات اللي آخذها منها؟
أو لازم إني أرجع لمراجع وكتب وبما أدري إيش.
وودي أعطيها استمارة تعبيها معلومات عنها ولا تحس إني أبغى أسوي دراسة لحالتها علشان ما أحرجها.
فكرت أعطيها استمارة فيها أسئلة عن معيشتها وما أبين لها إنها هي المقصودة يعني أحط أسئلة عامة مثلا هل الأبوين على قيد الحياة؟ وتعيش مع من؟ ومشكلات واجهتها في الحياة؟
ووحدة قالت لي اطلبي منها تكتب لك عن يوم مر في حياتها.
ما أدي محتارة كيف أسوي بالضبط.
والي يساعدني يتحملني لين أخلص من كتابته لأني بحتاج أسأله كثير أبغى يصير معاي على الخط.
الله يجزاكم الجنة ويوفقكم ساعدوني ووسعوا لي الله يوسع لكم.