ممكن تساعدوني ( يستحي من اهلي )

السلام عليكم

خواتي احترت وقلت مالي غيركم استشيره

انا مالجه ( يعني كاتبة كتابي ) من شهر تقريبا

ونحن عوايدنا ان الزوج يزور زوجته ( في فتره الملجه ) كل خميس ويتغدى عندنا

لكن انا زوجي يعرج ويلبس جهاز حديد في ريوله

ونحن ناكل على الارض ........... وهو ما يقدر يجلس بالجهاز على الارض

اول مره زارنا على الغدا جلس على الكرسي مع ابوي (لان ابوي نفس الشي ما يقدر يجلس على الارض )

لكنه انحرج من الوضع
اننا كلنا جالسين ناكل تحت وهو على الكرسي

وبعدها قام يتهرب او ما يزورنا على الغدا او العشا

واهلي يسالوني دايما ليش ما يزورنا وليش زياراته سريعه ؟؟؟؟؟؟

وهو يوم الحيت عليه يزورنا على الغدا كان يتحجج كل مره بشي
بعدين قالي بصراحه انحرج من اهلج لاني اكون لابس الجهاز وما اقدر اجلس على الارض
وهو طبعا بينحرج اكثر اذا فصخ الجها ز في بيتنا

الظاهر طولت عليكم

ومليتوا

بس ياريت تفكرون معاي
شو اسوي
كيف اقنعه ان الامر طبيعي وما فيها احراج
خاصة ان اخاني يتجمعون عندنا كل خميس وينتظرونه ويسألون عنه وهو يتجنب انه يزورنا وهم موجودين

اخاف يتعود على هذا الشي حتى بعد الزواج

انا ابغي يثق بنفسه وينسى اعاقته

هو وعدني انه يغير هذا الشي لكن بالتدريح ............ لكن ما ادري . احس بس يبغيني ما الح عليه انه يزورنا فيقول ان شاء الله بالتدريج


آسفة على الاطاله بس زوجي قال لا تخبرين اي احد من اهلج بالموضوع
وانا مالقيت غيركم استشيره
يمكن اتشوفون الموضوع بسيط
بس انا خايفة انه يبقى يستحي وينحرج من اهلي حتى بعد الزواج