وعليكم السلام ....
اكيد التوفيق والسعادة الزوجية هي رزق مالها دخل بأي ارتباطات ثانية ...
لي قريبة اهلها مدللينها جدا جدا ماتعرف كلمة لا ولا تعرف كرف ولاتعب.. أميرة أبوها فعـلاً...وتزوجت وصارت حياتها العكـس تكرف للعائلة كاملـة ...
ولي اقارب عددهم ٤ حياتهم منغلقة كثير لكن ربي وفقهم بأزواج غيروا حياتهم من إلـى وطلباتهم أوامر عند ازواجهم تبارك الرحمن ...
ولي قريبة كذلك الكلمة كلمتها في بيت أهلها ومرتااااحة ...ومع زوجها مرتاحة لكن إزعاج أهله ومضايقتهم لها ...وهي بنفسها تقول احس اللي مدللين في بيت أهاليهم يكرفون في بيت أزواجهم ...
والحقيقة مافي قاعدة تحكم الموضوع ...سوى ان السعادة والأرزاق مقسمة ومقدرة

ربطك ماله دخل
هي ما اعتدت على أحد حتى ندور عليها الدنيا وأحد بعتدي عليها
هي كذا عاشت وتربت بديهي بيجيها زوج نفس طبقتها يعني أصلا هو سأل عنها قبل يتزوجها وأكيد يدري إنها مدلله وماتحب الشغل
وحده تكرف أكيد اللي يبيها داري انها تكرف وسنعه ويبيها لإن ماعنده سالفة خدم وحشم هو كذا نظامه
أهم شيء التوفيق والسعادة يا حبي
الدنيا دواره لما تكيدين لأحد تدور عليك الدنيا ويصيبك مثل ما أصابهم
أنا أعرف وحده ما حبت مره زوجة ولدها وأصرت إن ولدها ينزوج عليها رغم إنه يحب زوجته ومرتاح معها بس هي تقول له أنت تستاهل الثانية وراحت بتخطب له حتى بس سبحان الله ماصار نصيب
وبعد فترة بسيطة تزوج زوج هذي الأم عليها رغم إنه كبير وماكان بنيتهم إنه يتزوج حرفيا مافيه حيل
والكل انصدم
لكن كثير قالوا مثل ماكانت تبي تقهر زوجة ولدها دارت عليها وتزوج زوجها هي عليها وماتت قهر

ماله دخل ياماروكو هذي أرزاق موزعه وربطك غلط..


اللي يظلم ويبطش ويتشمت تدور عليه الدنيا..



لكن الزواج رزق واعرف كثير كانو مصغوطين عند اهاليهم وتزوجو اللي اسعدهم وهناهم والعكس بالعكس..


يمكن شفتي كم مثال حولك بس ماهم مقياس..


وان كنتِ بنت ماتزوجتي اسألي الله يرزقك الزوج اللي يسعدك ويريحيك، ولاتشغلين بالك باللي حولك..

احس الانسان يستمر ع طبعه اذا هي من قبل ما تعرف لشغل البيت و ما عندها الرغبة تتعلم زوجها اكيد راح يضطر و يجيب لها شغالة و هكذا

جزاكم الله خير على الردود ،
فعلا أقدار الله مافي قاعدة تمشي عليها الحياة
أختي فيث الله يسعدك ويرزقك ما تتمني أنا متزوجة الحمد لله
تسلمي على دعواتك الحلووة ي عسسل