ممكن مساعدتكم بخبراتكم

اهلين بنات اتمنى من الله اولا ثم منكم المساعدة بخبراتكم اكيد فيه الي اكبر مني وفيه الي رايها افضل من رايي :)

الله يسلمكم هذا اخوي عمره تقريبا 26 سنة متوظف بعيد عننا يعني يسكن منطقة بعيدة نشوفه بالشهر مرة وحدة ويسكن في بيت خالتي مع الشباب اولادها بملحق خاص فيهم لين هنا اوكي

كنا كل مايزورنا نفتح موضوع الزواج لانه البكر والي اصغر منه متزوج بينهم سنة طبعآ
وكان يرفض نعرض عليه افضل البنات وعذرة مو وقته ولا ماجهزت حالي ,, سكرنا عنه موضوع الزواج هاليومين فتح الموضوع وحدد بنت بعينها وقال اني شفتها ببيت خالتي جايه تزورهم انا طالع وهي داخله عند باب الشارع وشالت نقابها وشفتها :30: انا بكل صراحة استفزني مااعرف ولا احب اتكلم عن التربيه بس الله يجزاها بالجنة امي علمتنا لا رحنا لاغراب مانشيل غطاوينا لين ندخل مجلسهم عمومآ الناس تختلف عن بعض ولا اعيب فيهم شي ,, طبعآ انا البنت الكبيرة انا اصغر منه بثلاث سنوات بس انا اكبر بنت اقصد بالبيت ,, هو راح علطول يكلم امي بدون اي مقدمات بالموضوع ابدآ وامي لها مفتاح خاص وهو عارف اني اقدر لها واقدر افهمها شوفو بنات ماابغاكم تلومونها امي زي اي ام تتمنى لولدها افضل الناس بعينها هذي ام مانقول الا عسى جزاهم بجنات النعيم هو فاتحها هو فاتحها من هنا قامت تذكر له بنات محددات وهي تتمنى بنت عارفه عنها كل شي وعارفه امها كيف ربتها تمنتها لاخوي قالها ماابي وحلف مايبيها يعني ابتدا الحال بعناد بينهم :09: قالت خلني افكر بالموضوع اهي من غير تفكير ولا تبي تدخل مع ابوي بصدمات طويله عريضه بسبب ان ابوي يهتم مرة بسالفة الحمايل ولا يقبل اي شي والله اننا معارضين بس وش نقول لا نقدر نطلع عن رايه ولا نقدر نسوي شي ممكن التفاهم يجيب نتيجه بس المدة طويله مرة علشان كذا اتصلت على اختها وقالت لهم لمحي لهم ان الولد بنخطب له من اهلنا وكذا (غلطت امي ادري بس ماستشارت احد ولا حتى فكرت شوي هي بتنهي السالفه لانها تعرف ابوي كويس امر الزواج بيد ابوي لحاله) خالتي ماقصرت اتصلت وقالت للناس هالكلام امهم قالت قالت هي وش فيها تحرم ولدها من شخص يبيه !!!! اوكي شخص يبيه بس احنا عندنا خسارة زوج او زوجة ولا والدين كذا علمتنا الدنيا وتعلمنا ,, اخوي اكتشف الموضوع مادري من وين بس اكتشف طبعآ احتد الخلاف بينه وبين امي مرة طلع ولا رجع الا متاخر علشان يكلمني انا ومشى للشرقيه يقولي الحين ركبت براسي ياهي ياماراح اعرس ماراح اخالفهم بس ماراح اعرس ابد قلت مايصير تعاند ولا تهدد لازم تسايسهم وتقدرهم مو راضي يقتنع ابد وصراحة الموضوع وصل حده امها شايفه ان اهلي ظالمين الولد اوكي ظالمينه بس هم ابوه وامه ياناس والله مادري وش اسوي معاهم والله امي ماالومها تبي تتنقى لولدها افضل البنات تربيه ودين وخلق وهو يقول لمحتها ودخلت قلبي وابوي للحين مابعد اكتشف الموضوع كلمني ثلاث ساعات قال الموضوع بيدك لانه احتد مع امي مرة هو قلت له مايصير هذي امك جنتك ونارك تبي سياسة تبي بس وقت اقنعها بعقل قال اقنعيهم انتي انا بمشي خلاص المشكله الان ان ابوي وامي تعودو هم الي يكون لهم القرار الاول باختيار الشريك لنا يعني اذا الرجال كويس ومن عائلة تناسبنا عرضوه علي,, هم حريصين مرة ويدققون كثير يعني اي زله يرفضون كل شي علشانها ودي ياخذ الي مرتاح لها يمكن تكون زوجتة بالدنيا والاخرة
بس مااعرف كيف اقنعهم طلع وتركني والموضوع كله بيدي وبين نارين نار ابوي وامي كيف اقنعهم ماقدر اقول شافها او لمحها مايقتنع ابوي ابد
وامي الي الموضوع وصل حده الموضوع معها وانتهى بينهم على ولا شي
انا حاسبته ليش مافتحه معاي انا اول شي بس قال توقعتهم بيكونون اروق من كذا معاي وبيتقبلون
ابوي يبيله معروض من وين عرفها اهلي نجديين مرة ماعندهم كلام لمحها ولا سمع عنها يحبون الزواج التقليدي البحت زي اخوي الثاني
بنات اتكلم بارتجاليه مادري حتى وش قلت والله بس يارب اكون وفقت بعرض المشكله الله يسعدكم ساعدوني الموضوع بيدي ولا ابيه ينقهر ولا ابي اهلي يدخل عليهم شخص غريب مو مرغوب فيه
اتمني اني وضحت الصورة كامله
وجزاكم الله كل خير