منح الضمان بالتفصييييل

السلام عليكم ورحمة الله وبركاته

كيفكم بنوتات من زمان عنكم اقرا مواضيع بس ماارد

توني قريت سؤال وحده من العضوات عن منح الضمان وحبيت افيدكم

بالتفصيل

اول شي هي مو منح اسمها مساعدات مقطوعه بس انا حبيت اكتب منح

بالموضوع بس لان الكل يسميها كذه


طبعا شروطها تكونين بالضمان سواء مطلقه او ارمله او يتيمه او او او او


يعني اي وحده يشملها الضمان والشرط الثاني ماتكونين قدمتي عليها من


قبل او ماتكون قبل 3 سنوات

يعني يحق لكل واحد مساعده مقطوعه من الضمان كل 3 سنين

يعني مو مهم العمر مثل ماسمعت

بقولكم اول معاناتي

اول شي انا رحت قبل شهر تقريبا قالو لي الي يوزعون الارقام مافيه

مساعدات ولا نعرف شي عنها


بتقولون لي ارقام شنو بقولكم عند الباب في ثنتين يعطونك رقم عشان


تاخذين دور للسؤال الموظفه او التقديم

بالضمان او او او او

المهم قالو لي مانعرف شي عنها طبعا يكذبون او عندهم تعليمات بكذه وانا صدقتهم وسبق وكلمتهم تلفون قالوامانعرف

صرت اقرا دائما بالمساعدات قلت بروح مره ثانيه ورحت يوم الاثنين بتاريخ 23 الشهر هذا يعني قبل كم يوم


دخلت عندهم الساعه 8 وهي تنادي ارقام وزحمه مره عليها وكانت واصله


تقريبا بالعشرينات قلت لها لو سمحتي ارقام شنو هذي ؟!طبعا ولا اهتمت


سئلت وحده جنبي قلت لها ارقام شنو هذي ؟! قالت المساعدات قلت لها

متى اخذتو الارقام اذا كان توه فتح


قالت انا اخذت الرقم الساعه 6 وكان رقمها 90

طبعا وهي تنادي الارقام اخذتها فرصه وجلست اسولف معاها

قالت لي (انه الحريم يجون بدري من بعد صلاة الفجر ويجلسون برا عند الباب لحد مايفتح الباب الساعه 6 وثلث او 6 ونص
وبعدين يركضون ياخذون مكان بالكراسي وتجي وحده وتوزع عليهم ارقام بالدور )

وجلست اطالع بهذي وذيك وزحمه ونصهم يبون ارقام لانه ماجو بدري


والقهر انه يوم وصلت عند الرقم 76 قالت خلاص خلصت الارقام يعني الي جو

بدري من قبل مايفتح الباب واخذو ارقام انتهت عليهم الارقام الثانيه وطبعا

صراخ والي معصبه والي والي والي

يعني حااااااااااااااااااله

طبعا انا انهبلت ايش السالفه ؟!

الحين اقولكم ايش السالفه


رحت ثاني يوم الثلاثاء وصحيت الوالد من الساعه 5 وعلى ماصحي ولبس

وصلنا تقريبا 5 ونص طبعا انصدمت ظلاااااااام ويخوف المكان كانوا يصلون الفجر

نزلت وحصلت تقريبا 10 عند الباب جالسين الي تسبح والي تصلي والي

تدعي والي جايبه بطانيتها معاها ههههههههه

انا مت من الخوف تخيلو ظلاااااااااام وماتمر سيارات

صح لمبات الشارع مفتوحه بس كمان المكان يخوف

المهم صليت وجلست شوي الا ماشاء الله زاد العدد ماجات الساعه 6 الا

واحنا تقريبا 40وحده هذا غير الي جو بعدين كانو عدد كبير مره ماينعد وكان معانا عجووووزه كبيره بعصاتها الله يطول بعمرها يارب

مسكينه كسرت خاطري

فتح الباب تقريبا 6 و26 دقيقه

واول مافتح جلسو يركضون ويدفون بعض والله كانوا بيذبحون العجوز مسكينه

طبعا اول ماتدخلون من الباب الخارجي فيه مبنى يمين

واول ماتدخلون من المبنى فيه كراسي يمين ويسار

طبعا بثواني امتلت الكراسي خاصه الي باليمين

انا ماادري عن شي جلست بكرسي المفروض لـ 3 بس وحده الله يجزاها

خير بعدت لي وجلست جنبها شكلي كسرت خاطرها

لاحظو اني جيت الساعه 5 ونص صباحا

لما دخلت المبنى حصلت الامن موجودين وعاملات النظافه يعني معناته فيه بوابه ثانيه دخلو منها

وكمان فيه يمكن 4 جالسين طبعا دخلو من البوابه الثانيه يعني واسطه

مع الموظفات

بسرعه امتلا المكان لدرجه انه ماكان فيه مكان بالكراسي

بدت موظفة الامن توزع ارقام ابتدت من اول جهه وهي اليمين مثل ماقلت لكم

انا كان رقمي 13

ومااعرف وصلت عند اي رقم

على فكره لازم تحرصين على انك تاخذين رقم يعني ممكن تطنشك وتروح وهي ماعطتك ماعندها مشكله

لما جت الساعه 8 او قبل بشوي

بدت تنادي على الارقام وتاخذ ارقامهم وتعطيهم ارقام ثانيه

يعني الارقام الاولى كانت بس انتظار على قولها

لما تاخذين الرقم الجديد تدخلين بالمبنى الثاني الدور الثاني وتاخذين دور

وبس ينادون على حسب ارقام او الاسماء لانهم ياخذون منك الاثبات سواء

بطاقة احوال او عائله بس انتم خذو كل الاوراق مثلي احتياط بالاضافه لبطاقة

الضمان

تطلب منك البطاقه الاصل مثل ماقلت الاحوال او العائله

وصوره منها واذا مامعاك صوره يصورون لك

تدخلين عند الباحثه تسئلك كم سؤال وبس تقولين مع السلامه راجعينا بعد 4 شهور

واذا كنتي مو مقبوله تقولك على طول

مثلا للارمله او اليتيمه لو عندهم تقاعد الاب فوق الالف اتوقع ماتنقبل

لانه كان معاي وحده عندها بنتين ابوهم متوفي الله يرحمه وماقبلوهم لان التقاعد فوق الالف

خلصت اخيرا الساعه 10 ونص
لاحظو من 5 ونص لحد 10 ونص


نسيت اقولكم انه كل مازاد عدد المشمولين بالضمان يزيد مبلغ المساعده

بنتي مو مشموله معاي بالضمان لاني ماعندي صك اعاله عليها

يعني الي بتقدم وعندها اطفال ومشمولين معاها بالضمان لاتنسى تقول

للباحثه او الموظفه عنهم

معليش طولت عليكم بس ماكنت ابيكم تتعبون مثلي

ومابي منكم الا الدعاء