منقرفه مره من تصرفات الناس

السلام عليكم ورحمه الله وبركاته
كان نفسي اكتب لكم موضوع حلو بمناسبه هالشهر الفضيل والعيد ان شاء الله ربي يعوده علينا بخير وصحه وسلامه لكن ما باليد حيله مالي غيركم اشتكيه
والله تعبت مره من تصرفات الناس وخاصه ناس قريبين لي مره انا الحمدلله حالتنا الماديه وسط ويمر علينا شهور يكون دخل زوجي قليل بس الحمدلله اهم شي عايشين مااشتكي ولا افتح فمي واي احد يسالني مااعطيه تفاصيل فقط الحمدلله
المشكله اقرب الناس لي وحتي صاحباتي دايم يتشكون لي عن حالتهم الماديه ويلمحو لي يبون سلف ومن البجاحه وحده من قرايبي من كم يوم مكلمتني جوال بنتها تبكي ايبادها انكسر وابوها مو راضي يصلحه قالت لها وهي تكلمني بس يابابا اذا اعطتك خاله فطومه عيديتك نصلحه لك شفتو بجاحه اعظم من كذا طيب يمكن ماعندي يمكن مابعطيها ويمكن عيديتي 50 ريال ماتصلح ايبادها مفكريني عايشه بعز وفوق السحاب وانا حالي من حالهم مصروف وبعض الأحيان اخواني مايقصرون يعطوني واجمعهم واخبيهم واذا بغيت قطعه ذهب اشتريت لي أي شي ابيه اشتريه من مصروفي لانه اخبيه قليل اصرف مو زيهم المصروف يطير بطلعه سوق طيب وش ذنبي انا اذا انتو ماتذخرون فلوسكم
والا صاحبتي تبي سلف 500 وهي ينزل لها حافز يوم قلت لها استني لين ينزل لا تتسلفين زعلت وقالت ماتوقعت ردك كذا وقفلت وهي زعلانه مع انها تبي السلف عشان تشتري ثوب ماركه عاجبها وش هالعالم كيف اتصرف معاهم طيب
حتي اخت زوجي لا شافت علي أي قطعه ذهب لو خاتم ب200 ريال قالت اخوي مدلعك أقول لها مايقصر بس كل شي اخذه انا من مصروفي قامت تطالعني بنظرات مثل انتي كذابه واخوي مغرقك بفلوسه ياهو ياعالم وربي تعبوني هالناس لازم اصير منتفه واتشكي زيهم عشان يصدقون انه ماعندي وهم الكل يتشكي واخر شي لبس ماركات وذهب وسفريات يعني اكذب أقول لكم زوجي شحات وماعنده ياكلني والا اخبي ذهبي والا وش المطلوب كيف اتصرف مع هالنوعيات وربي تعبت كثير انصحوني وش اسوي نصهم من الأقارب مااقدر اقطعهم ومن يشوفون وجهي قعدو يتشكون عن الفلوس والحاله وكذا طيب وش بيدي انا لو اني بنك عطيتكم وفكيت عمري
وربي نفسيتي تعبت خاصه برمضان كثر التشكي والمقاضي والثياب للعيد وكل وحده تقول الزود عندي ماادري من قايلهم اني فوزيه الدريع
تكفون ادعو لي بهالشهر الفضيل الله يرزقني الذريه الصالحه فوق همي يزيدوني هم الله يحرم وجيهكم من النار يارب ويحقق كل امانيكم ادعو لي لا تنسوني بهالشهر الفضيل