منك لله يا ابو بنتي

السلام عليكم

اسمعوا قصتي واحكموا مين الغلطان

انا متزوجه وعندي بنت 8 سنين.....وفي مدينه بعيده عن اهلي ما اعرف فيها ولا احد.....حتى جيران فين وفين لما نتقابل....وفيه وحده اتعرفت عليها بنت ناس وماشوفها دايما بس اكلمها ......ودراستي ما كملتها لاني تزوجت وحملت على طول.....قاعده في البيت لا شغله ولا مشغله......لا اهل ولا جيران ولا معارف وحتى المدينه الي انا فيها مدينه صغيره ....طبعا محبوسه في البيت واذا طلعت بس ع الملاهي العب بنتي ونرجع......المهم قولت لزوجي دورلي على وظيفه او خليني ادرس بمعهد ع الاقل اخرج من الجو الي حابسه نفسي فيه.......طبعا ما طاوعني ولا شجعني .......وكسر مجدايفي.....ونسيت الموضوع .... وطبعا الايام بتمشي والعمر بيجري وانا مكانك سر .....كلمتني صديقتي وقالتلي جايتك بكرا ....قولت الله يحيكي .....وبعدين قالتلي ترا بشترك بنادي لو حابه تشتركي معايا ......قولت حلو خليني اكلم زوجي واردلك ......قالت طيب .....المهم كلمته وانا فرحانه اتوقعت بيوافق من غير تفكير .....خصوصا مع وضعي هذا..... او حتى يعطي وياخذ معايا في الكلام او يحسسني فعلا انو نفسه يلبي طلبي لو بالكلام بس......الا عصب واتنرفز وفاجئني وقال ماينفع مين يوديكي ومين يجيبك وبنتك مين يدرسها وانا عندي نادي كمان متى اروح ومتى اجي ......قلت يا سلام انا يعني الي لازم اضحي .....قال خلاص خليها بعدين الشهر الجاي ......قلت لا هذا الشهر عشان نشجع بعض او زميلتي وكلها شهر واحد بس......كلمه مني وكلمه منو اتزاعلنا .....وقال هاذي الادميه(قصدو على زميلتي ) لا اشوفها تدخل بيتي ولا تجيكي بكرا ......قلت منك لله.....
بالله ايش رايكم انا غلطانه......؟؟
يعني تخيلوا يا بنات اني محبوسه طول السنه لا سفر ولا طلعات زي الناس وحتى لما اروح عند اهلي في جده تحصل مشاكل ولا اطلع يادوب بيت اهلي واهله بسس....
قرفت حياتي وانا معاه......عايشه من غير هدف......مايبغاني اطلع او اروح عند احد او اكمل دراستي او اشتغل ....لا وفوق كل هذا لا يعطيني مصروف زي الناس مع انه مايقصر بس برضه مو ممتعني بحياتي .....اشتهي اشتري ذهب ولا غرض ماقدر يقول مافي فلوس ....قلت طيب لا تصرف عليا بس وظفني وانا اصرف على نفسي.....اهله يسافروا ويروحوا كباين وشاليهات وطلعات .....وانا حابسني في البيت او يبغاني اطلع على حساب اخواته واوزواجهم......وانا نفسي عزيزه ما اتحمل انبسط على حساب غيري ......والله تعبت ومليت ......
تخيلوا متزوجين ومومتفقين ولا لي كلمه في البيت ولا رأي .....الي يقولو بس هو الي يمشي .....احس ماعد عندي شخصية حتى بنتي صارت تمشي رأيها عليا .....والله يا بنات فرش بيتي هو هو ماتغير من عشره سنين .....عندي الغساله والتلفزيون والمكنسه والثلاجه كلها خربانه ......ومع كذا اقول لا تكلفي عليه ومشي حالك فيها لحد ربي ما يفتحها عليه......حتى سفر ما اطلبه يسفرني .....كله عشان لا اكلف عليه .....وفي الاخير مستكثر عليا نادي شهر واحد بس...واقل من 500.....وعذره مين يوديكي ويجيبك..... وحتى قلتله خلاص اروح واجي مع صديقتي ....قال لا انا ماعندي الكلام الفاضي هذا.....تخيلوه حتى ثقه مافي مع العلم اني فوق 30 .....اخ اخ بس اشوف جاراتي الي تشتغل والي تدرس والي والي ....وانا محبوسه بين اربعه جدرااان.....
ادعولي ان ربي يكتبلي الي فيه الخير ....
وابغاكم بس تحكموا بيني وبينه وتقولوا مين الغلطان انا ولا هو؟؟
بس فيه حاجه ابغا اقولها عشان تعرفوا العقليه الي عايش فيها......تخيلوا ان اخته متخرجه من الجامعه وقدمت على بعثه واتاخر قبولها ....وفكرت انها تروح تقدم في جامعه مكه معيده وهيا اصلا في جده على ما يجي قبولها في البعثه.....المهم قالت لاخوها الي هو زوجي ابغاك توديني مكه ....قالها طيب....وبنفس اليوم انا كان عندي مشوار ضروري مررره ....قولت خلاص خليها تأجل طلعتها لمكه ووديني مشواري انا ....او خليها تروح مع سواق ....قال لا ابدا اختي ما تطلع مكه مع سواق ... قولت طيب انا مين يوديني مشواري ....قال خلاص لا تروحي ......قولت طيب والبعثه ....لما يجيها قبول وتسافر لوحدها على بلد الكفار كيف يرضيك هذا الشي وهيا من غير محرم ولا في بلد كفار واجانب .....قولت ايش هذا التناقض الي عندك ....هنا ماتخليها مع سواق....لكن بعثه تخليها تروح لحالها .............هذي بس عينه من تفكيره ....
على فكره كل فتره وفتره يجيني اكتئاب خصوصا لو مرضت....طبعا من الهم والوحده الي عايشه فيهم .....كل يوم استناه يعدي واقول متى يجي اليوم الي وراه ....ويجي اليوم الي وراه واقول متي يجي اليوم الي بعده ....وعلى هذا الحال .....ووزني صار يزيد وشكلي صار يجيب الهم ....عايشه بعزله الله لا يحطكم فيها ....وهو مو داري عني لا يتكلم معايا ولا يفتح مواضيع نتناقش فيها ....يرجع من شغله يتغدى وينام ويصحى يروح النادي واخر الاسبوع ياخذ نفسه وينزل على جده ...