منو زوجها اناني مثل اللي عندي ؟؟

السلام عليكم و رحمه الله وبركاته

بنات في عندي سؤال ودي اسأله لكم ...

رجاجيلكم فيهم انانيه !! وله بس اللي عندي اناني ؟؟

ما ادري قبل اول الزواج لاحظت عليه انه اناني ويبي كل شي لنفسه ، ، وكنت اقول له انت ليش اناني ؟؟
يرد علي يقول انا مو اناني ؟

الحين قاعده اشوف اشياء تخليني اتأكد انه اناني !!

تبون مثال :
الحين انا كنت طالبه بالجامعه درست سنه ونصف هندسه كمبيوتر و لما تزوجت صمم زوجي اني اترك الدراسه بحجه ان الدراسه مختلطه !!

وحتى الشغل اللي كنت اشتغله طلعني منه ( انا كنت ادرس و اشتغل بنفس الوقت ) و هم بعد قال ما ابي اختلاط و طلعني من الشغل !!

قلت له اوكي ما في مشكله ...

قلت له اسجل في جامعه بنفس تخصص زوجي بالضبط ،، على اساس اني ادرس بديرتي الكويت و امتحن هنا في القاهره و اروح واجي معاه ( لان اهوا قاعد يحضر ماجستير ) يعني مو خسران شي

اول شي وافقني وسجلني !!

بس بعدين غير راييه و قال مستحيل مافي .. انا ابيج تساعدين بأمور اهم من جذي ..

صار يعطيني كتبه الكبيره لخصي الكتب لي ملخصات عشان الامتحانات ( عشان يقدر يقري الملخص ويدرس منه ) و قعدت فتره طويله عيوني تمققت وانا اقرا كتب ( تخصص ما اعرفه ولا ادري عنه ) و افهمه عشان اطبعه بالكمبيوتر و اطلعه بورق عشان زوجي يدرس منه ... :) لانه ما يعرف للكمبيوتر و ما يعرف يشغل الكمبيوتر .

قلت ما يخالف تفانيت في الشي هذا وصرت اعدل له الملخصات و اضبط له عشان يدرس و ما يحاتي و اسهر بالليل على شانه اكتب و ألخص . يعني لخصت له فوق 5 كتب ..

غير اني اكتب له مقالات . و محاضرات . ومواضيع عشان الجرايد . مرات يكون عنده ندوه او مؤتمر اقعد انا االف له الكلمه اللي يلقيها . واكتبها له ( من يومي شاطره بالتعبير و الانشاء ) و احب القراءه كثيره . عشان جذي اهوا كله يعتمد علي بالموضوع هذا حتى مقالاته الصحفيه انا اكتبها له . وساكته يعني شغله عاديه اشغل نفسي فيها .

جيت اول امس قلت له انا عيوني حيل تعبانه . ابي اسوي عمليه ( ليزيك ) وبما اننا في مصر راح تكون كثير رخيصه من الكويت . وبالفعل دقيت على كم مستشفى خاص هنا في مصر و اتفقت عليهم وسعرهم يجي ( ربع سعر الكويت ) و كنت حيل مستانسه !!

تعرفون شنو رد علي ؟؟ قال ودراستي ؟
قلت له وشكو دراستك بالموضوع .
قال يمكن بعد العمليه تتعبين واضطر اوديج مستشفى و تخربين علي الجدول الدراسي اللي انا مسويه عشان الامتحانات !!

سكت و انطميت . و قمت ابجي و من قلبي قلت حسبي الله ونعم الوكيل .

اهوا اناني انا ادري فيه بس ما توقعت بالدرجه هذه !!

امس كنت صايمه و قعدت ادعي ربي ان الله يسخره لي . اليوم جاء من الامتحان الظهر يقول انا تعبان ما اقدر اوديج الطبيب ( دق تلفون علي ) رحت سكرت التلفون بوجه و قمت ابجي

جاء صعد الشقه قال شفيج انا تعبان ما اقدر اوديج الحين . اليوم بالليل ابي اوديج سينما !! ( يعني يقص علي بالسينما مثل ما كان يقص علي اول بالكاكاو و الآيس كريم !! ) انا صرت ابجي

قلت له / ما ابي اروح السينما

سكت وقال يا الله تعالي انا اوديج و بالفعل وداني الطبيب وسوى لي فحص و ان شاء الله العمليه يوم الاحد الجاي .

بس بالغصب و الله بنات بالغصب اقنعته . هذيج المره قعدت معاه قلت له / مبارك انا شنو راح يصير فيني؟؟
انا ما عندي شهاده بس الثانويه العامه !! و الحين انت خربت علي كل شي . لا جامعه ولا انتساب و لا اي شي ؟ و لاحتى وظيفه !!

سكت يقول انا ما احب مرتي تختلط مع احد او يشوفها احد ( مع العلم اني منقبه و البس عباه راس ) و الحمد الله اخلاقي وايد زينه و لله الفضل .

شسوي بنات ودي اكمل دراستي ،، يعني انا وقفت معاه في موضوع امتحاناته و دراسته و كله اشجعه و الله انه اكثر من مره يهون ويقول خلاص ما ابي اسوي الماجستير و انا اشجعه و اذكره باصدقائه اللي صاروا دكاتره الحين .. وكله اقول له ودي تكون دكتور و دي تكون حاصل على شهاده كبيره وتصير دكتور بالجامعه . يعني الحمد الله مو مقصره معاه كله رافعه معنوياته بكل شي

ليش عندي و يصير اناني ؟؟؟

انتم فاهميني بنات ؟؟

ازواجكم مثل اللي عندي و له بس انا ؟؟؟