السلام عليكم
مساء الخيرررر
جاء في بالي موضوع حلو
كل وحده منكم تذكر لنا موقف حصل معها مع ناس جو يخطبونها طبعا قبل ماتوافق على زوجها
مشاءالله اغلب البنات انخطبو اكثر من مره نبي كل وحده تدخل وتذكر لنا قصه
بصراحه حلو مره يوم يكون جو البيت يترقب موضوع خطبه
الكل يكون مترقب يتم او مايتم
العروس تكون خجلانه ومتوتره
تفتح دولابها وتقفله 20 مره وش البس وش اسوي اكل وش احط مكياج
واخواتها معها وفي بال كل وحده متى ياربي احس هالاحساس:hahaha:
تحصل صح ولا لا
وراح ابتدئي انا ,,,
هذي قصه من مجموعه قصص راح اقول اهم القصص الاكشن يعني^_^
هذي القصه وانا ثالث جامعه الحين لي 3 سنين من تخرجت من الجامعه : )
مره جارتنا عزمتنا على حفله عندها وانا ماعمري دخلت بيتها وهذاك اليوم قلت للوالده ابروح معك وبالعاده امي ترفض تحب تروح بروحها ماتحب البنات يحتكون بالحريم
مع ان جارتنا عندها بنات كبار
المهم وافقت وانا ماصدقت خبر رحت لبست وكشخت
ورحت معها للحفله
وطبعا الحفله كانت مليانه حريم اشكال والوان
وحده منهم حطت عينها علي وانا مدري عنها
رجعنا البيت وثاني يوم ولا جارتنا تتصل على امي وتاخذ منها موعد انها تزورنا
هي وعمتها مرت ابوها فهمتو^_*
قلت لامي والله اني شامه ريحة معرس :hahaha:
قالت امي لا مافي شي هي بس بتجي تسولف معي قلت لها امس احنى عندهم مداها تجي عندنا
جارتنا ماقالت لامي اي شي ولا عطتها فكره عن الموضوع بس مشاءالله علي انا الي فهمت
ثاني يوم ظهر اتصلت قالت بيجون معي خواتي خلي بناتك يطلعون ان جينا
عارفه امي وطبعها ماتحب بناتها يطلعون مع الحريم
المهم لبسنا وكشخنا
واستقبلناهم احسن استقبال وحطينا لهم احلى سفره
وبعد القهوه اخذت البنات للمقلط وامي والحريم بالمجلس
استلموني خوات جارتنا وهم اخوات العريس
طبعا عددهم 4 كلهم الاربع اصغر مني
واخوهم هو الكبير الي بيزوجونه
وطبعا جارتنا اختهم من ابوهم
المهم
شوفو الاسئلة الي سالونا عنها
1- عندكم جوالات؟؟
طبعا بحكم اني اكبر وحده في البيت معي جوال
قلت لهم ايه طبعا انا معي جوال
قالت شمعنى انتي؟؟؟
قلت انا الكبيره الحين وغير كذا احتاجه بالجامعه
2-عندكم دش
وهم عندهم دش بس مدري وش تبي بالسؤال هذا
قالت لهم اختي لا ماعندنا قالت غريبه في بيوت الحين مافيها دش
قالت اختي ايه احنى عادي مو مهم عندنا التلفزيون
3- على طول سالت عندكم نت
قلت لها طبعا
قالت من متى؟؟<<<تحقيق قسم بالله
قلت له سنتين عندنا
قلت وانتم عندكم قالت ايه
طيب خير ان شاءالله ذبحتني
4-قالت كيفكم مع الزواجات دايم تفصلون تروحون مشاغل
قلت والله مانقصر على انفسنا الحمدلله اي مناسبه نروحها نكون قد الروحه
بس مو لازم مشاغل بكل مناسبه او لبس جديد
يعني بالله وش رايكم باسئلتهم
ماسالو عن الطبخ وش تعرفي اكلات
ماسالو عن دراستي وانا باي مستوى بالجامعه
ماسالو عن اشياء مهمه صح
اسألة خارجيه مالها داعي يمكن عندهم مهمه الله واعلم
المهم يوم جو خارجين شفت البنات عند امهم يكلمونها رشحو منهي العروس الي يبونها لاخوهم
واختاروني طبعا:35:
وقالت الام لامي نبي فلانه لولدي
وهي خلاص بعبايتها وطالعه مع الباب اسلوب شي شي
وقالت انتظر منكم رد عشان الرجال بيجونكم بكره
بسم الله الرحمن الرحيم وش هالعجله
تبي رد وهي تقول الرجال بيجون بكره
المهم ابوي يوم عرفهم قالو ونعم وقال خل الرجال يجون ونشوف الموضوع
ثاني يوم جو الرجال
احنى توقعنا بس الولد وابوه
والله يابنات 9 رياجيل حشى الملكه اليوم
جده وابوه وعمه و2 من خولاه والباقين اخوانه
ابوي تفاجئ مره وانحرج مره
يعني كلهم يجون لسى ماصار شي عشان كلهم يجون لنا كذا
ابوي شاف العريس كان نقيب في مكافحة المخدرات بس ماعجبه مارتاح له مدري ليش
ابوي له نظره في الرجال
حتى ماسأل عنه
قرر على طول بالرفض
قال ابوه واهله ونعم فيهم بس الولد مارتحت له ولاني موافق عليه
:icon33::icon33::icon33:
ماخذ رايي ولا سالني حتى
قال لامي اتصلي عليهم واعتذري منهم
احس العجله ماهي زينه
هم مستعجلين يبون الموضوع يتم
وابوي استعجل بالرد بدون مايسال
اكتفى بخبرته في الرجال
وكل شي قسمة ونصيب
وللامانه الرجال هذا توه تزوج هالصيف
وارسلو لنا كرت عرسه
بس طبعا ماحضرنا العرس
الله يوفقه
يالله ياحلوين ننتظر قصصكم مع الخطاطيب:27:
نور قلبي2010 @nor_klby2010
كبيرة محررات
يلزم عليك تسجيل الدخول أولًا لكتابة تعليق.
حياة اسهل ...stc
•
لي عوده الحين مشغوله هههههههههههه موضوعك حلووووو ياقمره
لا يمكنك مشاهدة هذا التعليق لانتهاكه شروط الاستخدام.
حبيبتي لو تجري جري الوحوش غير رزقك ماتحوش
انا بعد انخطبت كثير سبحان الله وربي طرح حظي في واحد كنت احسبه كفوووو وطلع ماش وتطلقت منه
قبل كنت اتدلع هذا يخطب وهذا نقول لا وهذا نفكر فيه
ومره تصيب ومره تخيب
ويوم تم الموضوع واراد الله ان يكون نصيبي مع هالانسان اصبحت مطلقه بين لليله وضحاها
واسال الله العوض
الصفحة الأخيرة