من أجل طفلي..

-








كل اللي فوق ما يعني إن زوجي مافيه خير.. هو ولله الحمد كريم مصلي بار بوالدينه وكان يحترم هلي الحقيقة لكن صارت مشكلة من حاجه تافهة ماتستاهل ومن وقتها صايرين أعداء وبينهم أحقاد..




ومن إيجابياته كذلك انه يحاول يبعدنا عن الحرام .. بس بطرق غريبه كنت مستنكرتها وحاقده عليه..حارمني من النت والتلفزيون .. النت حارمني تماما حاط رقم سر مايعرفه الا هو الحين أكتبلكم من بيت هلي زيارة .. التلفزيون مافيه الا القنوات الرياضية واﻹخبارية والقرآن والسعودية مع اني ماني حق تلفزيون.. هو يتونس عالنت والتلفزيون وانا ماعندي الا الخياس الواتس، إﻻ مرات اذا احتجت أبحث عن طبخه مثلا يسمح لي علی جواله بشرط قدام عيونه.




وشكله حن علي وكان توه ملاحظ إن مالي علاقات وزيارات غير أمي وأبوي وهله فجاني يسألني لمس أكبر نقطة ضعف بحياتي حسيت اني بخطر واني بغرق حاولت أصرفه بس وربي يابنات ﻻحظ حتی مسح العرق عن وجهي ثم غير الموضوع ولعد رجع سألني، صحيح اني تشافيت لكن ﻻزلت ماقدر أكون صداقات بالثانوية ماشيت بنات بس ماعرفت طعم الصداقة وماصدقت أتخرج وأفتك وبالجامعة تعمدت أنضم انتساب ماعادني أستحمل الناس. المهم ﻻحقا بعد هالموقف مع زوجي حصلت بلاوي وﻻ عالبال والله الموضوع تافه جدا جدا بالنسبة لكل الحوسة اللي حصلت وبدأ في يوم جاني اتصال غريب من أمي تسألني كيفي مع أهل زوجي متواصلة منظبطة علی الزيارات؟ علمتني ان زوجي جا أبوي بالعمل وكلمه بموضوع .. عرفت وشهو الموضوع قبل تعلمني يابنات لو تشوفون حالتي بهاللحظه سألتها بايش جاوبوه قالت ﻻتخافين مافضحناك قلناله هذي طبيعتك خجوله من صغرك.. اخر شي نصحتني أقرب أكثر من أهل زوجي وقالت الله الله بالعزايم ووصتني ما أعلمه ان عندي خبر عن جيته ﻷبوي. قهرني والله وقتها يابنات ليه يحقق عني من وراي؟ المهم يومين ولقيت أمي داقه علي ثاني وهالمره تهاوش تقول ماقلتلك ﻻ تعلمينه؟ حلفت لها بأغلظ اﻷيمان اني مانطقت بحرف وانا أبكي مايرعبني كثر صوت أمي وأبوي لما يعصبون يصارخون زوجي قسم مع انه حق أذية بس أرحم ماقد صارخ علي هواشه دايم هادئ من ناحية الصوت.. المهم قعدت تسب بزوجي وتطعن بأخلاقه وتربيته وطيحت قلبي وهي تقول انه كان علی وشك يمد يده علی أبوي وفهيت وانا اسمعها تقول لمي عفشك أخوك بالطريق. انتهت المكالمة وانا منهبله من هالمشاكل الطلعتلي فجأة قبل يومين كنا ما أحلانا. بعد ساعة دق اخوي عرفت انه تحت بيتنا مارديت أرسل واتس شفت رسايله من برا وﻻ دخلت. كنت مادري وش أسوي مابي أروح محتاجه أكلم زوجي أبيه يجيني الحين بس ماهو حل لو جاء بيقلبها مضاربة مع أخوي وأخوي عصبي حيل وزوجي أخس منه قد شفت له منظر في مضاربة مع واحد من اخوانه ببيت هله كلما أتذكر المنظر ينشف دمي.. جوالي معد وقف رنين أخوي يدق وأمي تدق موقف رهيب ومرعب دماغي حسيت بيجن من الصراع اللي حطوني فيه كان بودي أكسر الجوال دخلت الواتس كتبت ﻷخوي ارجع ماني جايه وكتبت ﻷمي خلي ولدك يرجع ماني جايه، وحطيت الجوال صامت ورميته بعيد عن عيوني مابي اشوف ﻻ رسايل وﻻ شي من بعد هاليوم حذفت الواتس ولعد رجعته انا وحده اذا كرهت شي تعقدت منه. المهم جاني زوجي بالليل انهبل من منظر وجهي قلب بالونه طلعت له عذر وﻻ جبت له سيرة عن الموضوع وﻻ هو جاب لي سيرة عن موضوعه وبطريقة ما الحمدلله عدت الليلة بسلام بس مالمسني أبدا ذيك الليلة :( آخر محادثه وموقف كان بهذا الشأن باليوم الثاني اتصلت أمي تهدد تبيني أأدب زوجي ويقصر شره عن العالم ﻻيطلقوني منه بالغصب. مدري مالقيتني غير أضحك وطنشت واكتفيت برسالة علی رقمه قلت له فيها جننت الناس تراك :( المهم جب معك بصل وبيض وطماط وإلخ 😂






بعد فترة طويلة من هالحدث سيطر علي ملل واكتئاب مو طبيعي فقررت أفاتحه بموضوع رغبتي بالتقديم علی ماجستير لكن رفض 😔 ما رجعت ناقشته واضح رفضه عن كرامة مايبيني أصير أعلی منه :)




مدري هو من باب الرحمه والشفقه يوم شايف كمية الفراغ والفضاوة بحياتي واﻻ يبي ينسيني سالفة الماجستير.. صاير يجيب لي روايات ثم أفلام ومسلسلات من النت وﻻحظت شيء مشترك بينهم خلاني أكتشف إنه يستخدم برنامج يقص المقاطع غير المرغوبة 😂 ثم تجرأت أطلب أنميات اللي هي الكراتين اليابانية أتوقع خرعته بس لبی الطلب ساكت بدون تعليقات غير مرغوبه ونفس الشي شغال قص :) بصراحه من نواحي الترفيه ماقصر غرقني ألعاب مع ان البلاي ستيشن حقه كان مكفي وموفي يوديني متاجر اﻷنمي ويطلب لي اللي أبيه من النت عدا طلعات التمشيه والمطاعم والسفر ماقدرت أتقبل أنخنق فبطل منهم.






بس فيه حركه متهوره بخصوص مشكلتي معه حق التعذيب والبهدله 😷😖 حركه ندمت عليها وزدت الطين بله 😔😭 أنا عندي حالة بسيطه اسمها نوبة هلع من ايامي عند هلي متعايشه معها والوضع تمام وبداية زواجي كانت نادره وعالخفيف ماكان ملاحظها وانا بدوري كنت أحاول أبعد عن عيونه ﻻ حسيت فيها وهو موجود ويوم ﻻحظ عمل منها قصه وداني ﻷربع أطباء مفكر السبب عضوي وتطلع النتائج تمام محد فيهم فتح ثمه وقال انها حالة نفسية طمعانين عكس الطبيب اللي ودوني له هلي طلع ابن حلال أعاطانا فكرة عن البلی اللي فيني ووصانا بطبيب نفسي بس هلي قالوا لا مرض نفسي ولا شي هذا دلع :) المهم اﻷطباء استغلوا اﻵدمي أيما استغلال تحاليل وراء تحاليل بغوا ينشفون دمي 😔 وانا ساااااكته تخيلوا أقول له يا فلان أنا معي مرض نفسي 😱 👻👽 خاصه ما أعتبره مرض أعتبرها حالة عادية تعدي تسلم علي وتمشي. بس ويجيني الرجل ذاك اليوم ويقل لي مافيه تفسير غير إن اللي معك هذا حالة نفسية، جهزي حالك بكره رايحين طبيب نفسي! قلت له بالحرف الواحد ماني رايحه وكلمة بكلمة انقلب الوضع باتل فيلد (ساحة معركة :d ) وحطيت فيه كل اﻷمراض والجنان، باليوم الثاني لقيتنا قدام الطبيب النفسي سألني كم سؤال وصرف لي دواء مامنه فايده، وحنا راجعين بالسيارة حطيت البلوی علی راسه وتبكبكت انخرش المسكين وصدق وعجبني الوضع فقمت أزيدها عليه لو دروا هلي الله يعينك وآخرتي ندمت جاء يوم وعرف 😷 😳 زعل زعله قوويه 😔 اضطريت أنا أراضيه، ورجع أخس من أول :)






حطيت أسباب واحتمالات كثيرة تبرر أخلاقه وطبعه معي ومع الناس فما وجدت غير إنه يا إما يكون من تكوين شخصيته يا انها عادات يا انها اضطرابات نفسية يا ان ماخذها من مبدأ العين الحمراء وهالخرابيط.....




يقال أنه يجب معالجة اﻷسباب عند حل أي مشكلة :) لكن تتوقعون أخواتي لو بإمكاني حل هاﻷسباب كان جيت وشكيت؟ :) ياليت عارفه ايش اﻷسباب علشان أعالجها :)




لذلك ماهمتني اﻷسباب كثر همي بحلول تخليه يكف أذاه عني بالذات الضرب مابي طفلنا يفتح عيونه علی مصارعات أبوه وأمه.. تتوقعون يتطاول ويتطور وضعنا إلی ضرب مبرح وتعذيب؟






اعذروني علی اﻹطالة طولت حيل ماصدقت أفضفض ماعندي أحد أكلمه عن مشاكلي 😢 مع ان زوجي مسوي لي مساحة فضفضه يومية لكن مستحيل أنكده بكل هالمشاكل وهي نعتبرها لعبة سواها ﻷجل يخليني أتكلم ﻻني وحده ممكن تمر أيام وﻻ أحكي حرف وهذي طبيعتي وعلی حسب المزاج تجيني حاﻻت استرخاء وهدوء عجيبه ومابي أتكلم عشان ﻻ أخرب علی نفسي الجو وﻻ أجبرني أحد أتكلم أتعكر وتقلب أخلاقي وفترات أقلب شعلة حماس بلا سبب وأجنن زوجي أصير له لزقة .. فاخترع هاللعبة وسماها مساحة فضفضه علشان يجبرني أحكي يوميا وحددها 10 دقايق نلعبها قبل نقوم ننام وخلاني أنا أحط قوانينها بعدما حط هو أول قانون وهي اني ما أسكت لين تخلص ال10 دقايق وفيه عقوبة لو سكتت حتی لو بالغلط اللعبه تشبه فكرة المذكرات اليومية أحكي له يومياتي وحطيت قانون بعدين يفك أزمات وقانوني ينص علی أنه مسموح التأليف 😂 يفيدني لما مايكون عندي شي أقوله فأألف له أحداث واذا تحمست أقلب اﻷحداث سوبر ناتشورال وأدخل معي شخصيات روايات وأفلام واذا تحمست تحمست أدخله هو نفسه معي باﻷحداث 😂






شكرا لكم علی مشاركتكم حياتي وأوجاعي ❤ دعواتكم لي بالراحة و السعادة ولزوجي الهداية.











THE END

يا قلبي انتي موضوعك صعب شوي اول مره اشوف مزح كانه مصاارعه والمشكله يغمى عليك !!!!
زوجك مزحهه ثقييييل حاولي اذا جا بيمزح تغيرييين مكانك اذا هو بالصاله روحي الغرفه واذا هو بالغرفه اطلعي فهمتي كيف !!!
(تهربي) اما عن ان اهلك يسموونه راعي مشاكل وما ينادونه باسمه ياختي وقفيهم عند حدهم قوليلهم ترى زوجي عنده اسم !!!!!!!! يمكن هم تمادوا لان انتي ساااكته لكن وقفيتهم مره وحده بس
صدقيني ما راح يعيدونها
والحمدلله ان امه طيييبه شوي احس العايله كلها ضدك الله يعينك طيب هو ليه كذا مع الناااااس في سبب ولا طبيعته كذا!!!!
سوري اذا الرد ملخبط؟؟؟
أتمنى افدتك لي رد ثاني بعد ما تكمليين
وممكن تردين على اسئلتي عشان توضح الصوره اكثر عندي !!!
بانتظار ردك يا عسل

كملت قراءه موضوعك
سؤااال هو لييه مانعك من النت والتلفزيووون انتي مو صغيييره؟؟؟ هل هو من باب شك او مبدا ويمشي علييه
لان احس ملللللللل لا نت ولا تلفزيوووون
وحلوه فكره الفضفضه !!!!
بس اللي ما دخل مخي ليه كان بيضرب ابووكك وليه امك تقول انك علمتيه وانتي ما تكلمتي بشي
احس شي في السالفه نااااقص؟؟؟
بانتظر ردك وبرجع ارد
بانتظاارك حبيبتي
موفقه

حزنت لما قلتي امك اتصلت عليكي وبتخاصمك
صارلي الموقف دا وجلست ابكي في التلفون
بس ما سألتيه داك اليوم ليش وفي ايش كلم ابوكي
يمكن كلمه في موضوع غير
وامك تحسب في نفس الموضوع

صراحه ضحكت علي استهباله المهم انتي ادعي ربك حسيتك مره بعيده مقلتي ولاحتى اصلي ادعي استغفر كله لعب وسوالف ومشاكل صراحه حلك تدرين وش امسكي سبحه واستغفري وحطي نفسك مسرحه وسبحي معنده مجال يصارعك هههه المهم بعد البيبي ان شاءالله يهداء زوجي اول راعي مشاكل وانهد مع الزمن هههه