من اسبوع واحنا على هالحالة .. حد يعطيني حل الله يخليكم

السلام عليكم ورحمة الله وبركاته

بوصف حالة ولدي واتمنى تقولولي شسوي؟؟؟

ولدي عمره سنة وشهر
عنده تكسر فالدم
ورضع طبيعي لمدة ست شهور بس
وزنه حاليا 9 كيلو

من يوم صغير وهو كل يوم والثاني تعبان ومريض
ولما كان عمره 3 شهور صابه زكام لدرجة انه نام فالمستشفى 3 ايام على بخار واكسجين بسبب البلغم
وقالو احتمال يكون معاه ربو وخلوني استمر بالبخار يومين زيادة

بعدها سافرنا لبريطانيا وقعدنا هناك سبع شهور والحمد لله ماراح المستشفى الا للتطعيمات
صحته كانت زينه وياكل عدل ويشرب حليب صناعي وكل شي تمام

رجعت الامارات لما كان عمره 10 شهور ومن اول اسبوع وهو مريض
ترقد فالمستشفى على اول رمضان لمدة خمس ايام بسبب التهاب فالاذن والبلغم اللي في صدره وكان وجهه شاحب وحرارته توصل للـ 39.8
عطوه مضادات حيويه وخافضات حرارة واكسجين وبخار والحمد لله تحسن

وعلى آخر رمضان رجع مرض مرة ثانية زكام وكحة وعلى طول التهاب فالاذن وحرارته مرتفعه
وصدره فيه بلغم

وديته الطبيب وصفله مضاد حيوي مرة وحدة فاليوم لمدة ست ايام
وعطاه ادول عشان حرارته
ونصحني اشتري جهاز البخار في بيتي وفعلا اشتريته
علمني عليه وعطاني دوى مذيب للبلغم عشان استعمله فالبخار

المشكلة الحين صارلي خمس ايام على المضاد ولين يومكم الحرارة ما تنخفض
تنزل لمدة ساعه او ساعتين بالكثير اربع ساعات وترجع

البلغم خف والكحة اقل من قبل لكن مشكلتي فالحرارة
والولد ما ياكل شي من خمس ايام
اذا غصبته رجع اللقمتين اللي كلهم ومايرضى يرضع من الرضاعه ولا يشرب اي شي غير الماي
وشويه عصير :(

وانا ما اتحمل اشوفه بهالشكل
وجهه شاحب وهالات تحت عيونه وصاير شكله نحيف اكثر من قبل
لون جسمه متغير صاير على اصفر وعروقه مبينه
وكل ما اتكلم واقول حق ابوه
يقولي الولد تعب من المستشفيات والادوية وما بنوديه الا على الموعد يعني بكره او بعده

وعندي سؤال هل كثرة الادول تضر؟؟

لأن كل ما ترتفع حرارته حطيته في مغطس ماي فاتر وعطيته أدول
مرة تحميلة ومرة شراب
وصار عنده اسهال وحاولت اوقف التحميله صرت اذا عطيته الشراب يرجعه على طول
اشربه شوية ماي وانتظر عليه نص ساعة وارجع اعطيه الأدول ويرد يرجعه

طولت عليكم بس والله انا على اعصابي

جزاكم الله الخير والجنة