من تجربتي الحلول لبعض المشاكل الجلديه

بسم الله الرحمن الرحيم
1-احسن حل لحبوب الشباب الروكتان بس لازم تسوين تحاليل قبل ماتاكلينها واول ماكان يصرفها الا المراكز الكبيره زي ديرما وادمه والحين اشوف حتى المستوصفات الصغيره يصرفونها وانا ماانصح احد يروح للمراكز الكبيره لانها بتصير غاليه وانا صرفها لي الدكتور احمد مدري محمد العيسى بدريما وبعدين صرت احلل لوظائف الكبد بمستوصف قريب من عندنا واسعاره رخيصه ولي اربع سنين ماطلعت لي ولا حبه وبشرتي بعد ماكنت كان فيني جدري صارت بيبي فيس وزوجي مو مصدق اني كنت من الناس اللي وجيههم محببه بشكل مقزز ولا ضرني جبت ولدين والحمدلله ولا فيهم الا العافيه وانا تمام التمام بس الحبوب خطر على الحامل لانها تسبب تشوه للجنين علشان كذا ماينصحون المتزوجات فيها يخافون تحمل وهي تاكلهم ولا الصراحه هي الحل الوحيد والجذري للحبوب من كل الجسم فقط تحتاجين عنايه بالشعر والعيون والشفايف يحتاجون ترطيب طول فترة اخذك للعلاج
2-الشعر اللي في الجسم الليزر وبس انا جربت كل شي حتى مرارة العنز مع النشادر تملطت فيها تملط لمدة خمس ايام وكنت شايله بحلاوه قبلها مباشره ولا فيه نتيجه نهائيا لحد ماطلع الليزر اللي نساني اني كنت خروف وربي مااذكر المناطق اللي بوجهي وش كثر كان فيها شعر بس الليزر يبي دراهم يبي فلوس ورجال يشجعك مايقول لا وشوله تراهم نصابين يطلع تحت الجلد ومدري وشو من هالخرابيط على ضمانتي مايطلع تحت الجلد يخف ويصير زي الوبر ماينشاف ولا تسالين كم جلسه اللي بتسوي ليزر تحط ببالها انها ممكن تستمر ثلاث سنوات لحد مايخف الشعر حتى الاباط يخف يصير زي شعر الوجه خفيف وناعم وثلاث ارباعه مايطلع بس مو اقل من ثلاث سنين بس على فكره مو كل شهر كل اربع شهور تسوين ليزر لحد مايصير كل ست شهور والبيضاء محظوظه الليزر يبين فيها على طول ويفيدها اكثر لانهم ماعندهم مشكله يزيدون درجة الليزر لاقصى حد ومايضرها وممكن تخلص كورس الليزر خلال سنتين والجلسه بالبدايه كل ثلاث شهور وبعدين كل ست شهور وبعدين كل ثمان شهور بس واحسن مركز بالرياض الاستشاري بشارع الثلاثين بالعليا ارخصواحسن اجهزه
3-احسن حل للسواد من بعد الولاده للبطن وبين الافخاذ والصدر علاج صرفته لي دكتوره ناديه الخطيب عيادتها بالاطباء الاستشاريون بشارع الضباب عطتي كريمات مااستخدمتها الا اسبوع ونصف مدري اسبوعين ولاظنتي اسبوعين لاني عجازه كان جلدي يتقشر ويطيح زي الورق اقسم بالله كانه سحر وتفتحت وصرت ماكاني والده بس الحين عرفت لنفسي اني عجازه بعد حملي الثاني ماافكر اقشر افكر بشي سريع ويروح بيوم واحد اللي هو ليزر الفراكسل سمعت انه مؤلم بس معليش تراه يوم واحد بساله عنه واذا سويته بقولكم بقولكم
وبس وسلامتكم اي وحده عندها تجارب زيي مع علاج او ليزر او تقشير تضيف لموضوعي بس ترانا عجازين مانبي كريمات وخلطات واشياء نتايجها بطيئه وتضبط على ناس وناس نبي شي بنسبة تسع وتسعين بالميه مفيد زي الروكتان والليزر والتقشير