من تروح معي لمحل أبو ريالين؟؟ عندهم بضاعة رهيبة

الملتقى العام


السلام عليكم ورحمة الله وبركاته

أكيد مستغربين من العنوان بس بقولكم السالفة وأنتم أحكموا بأنفسكم.....

القصة واقعية....

هذا ياطويلات العمر في يوم من الأيام مع إقتراب موسم الدراسة و تداخله مع شهر رمضان ومع زيادة الأسعار عندنا بالسعودية ( الله لا يجزاهم بالخير ) قررت أختكم أم سعد وسعود التوجه إلى إحدى المحلات الشهيرة بـــ (( أبو ريالين )) حتى نتقضى للدراسة وبعض مقاضي رمضان
الموووهيم قلت للشلة اللي جالسة بجنبي من جاراتي وصديقاتي من ودها تروح معي لأبو ريالين
قالت وحده أنا بطلع مع أبو الشباب بعد المغرب
والثانية قالت حنا نبي نشتري مقاضي المدرسة من جرير وهي الله يصلحها نصابه ماهي عادة لها من جرير بس شكلها طايحه على محل أبو ريالين أحسن من ذا ولا تبي تقول
وكل وحدة جابت عذر ماعدا هدى قالت يالله أنا بروح معك

بصراحة في البداية ماصدقت و قعدت أمعك عيوني عشان أصدق ... هدى ؟؟؟


مابقى إلا هدى تروح محل أبو ريالين !!!

هدى ماتطيق هالمحلات ودايم تحذرنا منهم ومن بضاعتهم وتقعد تقول وتحط فيهم تبينا نعافهم بس ماعندك أحد!!!

كل الموجودات صاحن بصوت واحد أنتي ياهدى!!!

قالت هدى وهي واثقة : إيه أنا.....

صحيح إني شّكيت بنيتها بس قلت خل نشوف وش وراها؟؟؟

لبسنا عباياتنا ونزلنا ومشينا إلين وصلنا محل أبو ريالين اللي على الشارع وإلا الزينات والأعلانات والزباريق مدري شسالفة قلت لهدى شكلهم قلبوه قصر أفراح !!!
قالت هدى : لا هذولا مستعدين للموسم أو الموسمين بالأصح رمضان والدراسة بس مستعدين عشان يخدعون الأغبياء

ناظرتها نظره قوية بس خسارة ماشافتها لأني متغطية خخخخ قلت لها قلبي حاس يا هدى إنك ماجيتي معي تبين تشترين بس الله يستر منك!!!

قالت والله يا أم سعد وسعود ما تطلعين إلا أنت راضيه و مبسوطة وقولي هدى ماقالت!!

المهم أنا اللي أذكره إنه على شارعنا محل أبو ريالين واحد والحين بقدرة قادر صاروا أربع محلات !!!
وش اللي صار؟؟؟

قالت هدى : هذولا محلات المواسم قبل عودة المدارس يبيعون قرطاسية ودفاتر وقبل رمضان يبيعون مواعين واجهزة كهربائية و ممكن كريمة ومهلبيه وفيمتو وقبل العيد يبيعون إكسسوارات ومستحضرات تجميل وعطور وممكن ملابس على شوية طراطيع وصواريخ وشروخ
وقبل عيد الأضحى تلاقينهم قلبوا جزارين وسلاخين كلاً شايل الساطور و واقف قدام باب المحل!!!!
والحين زي ماقلت لك بما أنه موسمين قرروا يغتنمون الفرصة و يفتحون أبو ريالين عشان يبيعون كل شي وإلا فيه محل يبيع مواد التجميل والعطور بجنب أدوات التنظيف والمواعين؟؟؟

الان تأكدت إن هدى لها غرض و أعطيتها نظرة ثانية بس للأسف لحقت اللي قبلها لأني ... نفس السبب السابق هههههه

بس فعلا قعدت أفكر وشلون أدوات تجميل وبجنبها كلوركس وديتول؟؟؟

الي صار إننا دخلنا أحد هالمحلات وطلعت القائمة حقتي وهدى لاصقة فيني

أول شي رحت للمواعين وتعرفون نحتاج مواعين زيادة برمضان عشان العزايم وغيره
وأشوف عندهم صف مواعين تبرق برق وش هالنقشات وش هالاشكال الخطيرة لا وبعد كل صحن بريالين صدق يا بلاش

و أعبي العربة من كل نوع خمس صحون و أنا أقول هذي للكبه وهذي للسمبوسة وهذي للكريمة
وإلا تطمر هدى وتقول لي أم سعد وسعود أنتي تحبين عيالك؟؟ دورت طاسة وإلا مقلى عشان أصكه براس هدى ...

أنا : بالله ياهدى هذا وقتك؟؟ يعني وشو أحب عيالي؟؟ لا أحب عيال الجيران ؟؟؟؟؟

هدى : صح أنتي متعجبة من سؤالي؟؟ بس أنا تعجبي أكبر منك !!! يعني اللي تحب عيالها تسممهم؟؟؟

أنا : ....... نظرة ناريه ... بس ماحولك أحد لأني ... طبعا عارفين خخخخخ

هدى : ايه طبعا أنتي قاعدة تسممين عيالك !!!

يعني ماتدرين إن هذي المواعين الرخيصة اللي تنباع في محل أبو ريالين مصنوعة من مادة اليوريا فورمالدهايد واللي حذرت منها وزارة التجارة ؟؟
لأنها تسبب مرض السرطان لأنه مع حرارة الطعام يتحرر الفورمالدهيد منها بسهولة وتنتقل هذي المادة المسرطنة من الأواني إلى الطعام المسكوب بها ويذوب داخل الطعام ويتم تناولها مع الأكل ؟؟؟

مو بس المواعين حتى استخدام العبوات البلاستيكية التي تكون فيها المادة الملونة غير ثابتة أو تتأثر بالأحماض والزيوت والحرارة في حفظ الأغذية التي توضع فيها.


والحين هل تقدرين تشترينها مهما كانت رخيصة وتراقبين زوجك و أطفالك بل وضيوفك يتناولون السموم والمسرطنات قدام عيونك؟؟؟

أنا : ... (طبعا هالمرة استغنيت عن النظرات النارية اللي أثبتت عدم جدواها ) ....

هدى : وش فيك ساكته؟؟

أنا : لا انا مو ساكته بس فاتحه فمي متر من الدهشه الين طلعت اثار عملية اللوز اللي قبل عشرين سنة ... بس ماتشوفينه لأني متغطيه ههههههه (رجعنا .......)

هدى: والحين تبيننا نرجع للبيت ؟؟؟

أنا : لا عاد وشو نرجع باقي حاجات ثانية مالها علاقة بالأكل عشان ما تقولين مسرطنة و مدري وشو ...
طلعت القائمة حقتي و طيران على قسم القرطاسية وعبيت العربة من الدفاتر والأقلام والمحايات والالوان والشنط

لحقتني هدى وقامت تقلب معي بالدفاتر وطبعا انا حسيت بالنصر لاني اقنعتها تجي معي حتى لو ماشرت مواعين شكلها تبي تشتري دفاتر لعيالها


التفت علي هدى وقالت : تتوقعين هذي الادوات أصليه؟؟

أنا : بالله عليك ياهدى في شي اسمه دفتر اصلي ودفتر تقليد ؟؟؟ كلهم دفاتر وفيها أوراق ...

هدى : طيب ليش الدرزن هنا بريالين وبالمكتبات المتخصصة تلاقينه أغلى ؟؟

أنا : ههههه  ضحكة انتصار .. عشان المحلات الكبيرة ياخذون منك قيمة الديكور وكشخة المحل ورواتب الموظفين بعد


هدى : لا ما أعتقد بس بضاعتهم أصلية

أنا : وهذولا وش فيهم ؟؟ راس ماله دفتر و إلا يعني بقوم بكره الصبح والقاه انقلب قلم ؟؟؟؟

هدى : لا أكيد ماراح ينقلب إلى قلم بس ممكن ينقلب إلى سلاح خطير ...
لأن محلات أبو ريالين تبيع أدوات مدرسية للصغار تحتوي على مواد خطرة ومؤذية لأن هذه المواد المدرسية والمكتبية تكون بشكل جميل ولافت للصغار ومن الأدوات المحببة وعليها صور أفلام الكرتون اللي يحبونها ولكنها تحمل الخطر في داخلها لأنها تحتوي على مشارط ومواد جارحة داخل الأقلام.
بالأضافة لردائة الورق وسهولة تمزقه أما بالنسبة للاقلام والالوان فخطوطها رديئة غير واضحه وهذا يعني خسارة لقيمتها الحقيقة يعني انك دفعتي فلوس مقابل لاشيء بل قد يكون المقابل سلامة ابناءك؟؟؟

أنا : طيب هذولا حسبي الله عليهم وين وزارة التجارة عنهم؟؟؟

هدى : حتى لو الوزارة تحركت ومنعتهم راح يلقون ألف طريقة وطريقة يبيعون بضاعتهم القاتلة عن طريقة لكن أنتي وين وعيك وحرصك؟؟

أنا : يعني أنا وش دراني عن البلاوي اللي في بضايعهم؟؟؟

هدى : المفروض تفكرين بسبب رخص البضائع مقارنة بمثيلها في المراكز المتخصصة؟؟

أنا : تصدقين ماعمري سئلت هالسؤال ؟؟؟

هدى : والحين نروح للبيت؟؟

أنا :لا باقي أشياء ما أخذتها للحين ....وقعدت أناظر القائمة اللي معي

سحبت هدى القائمة من يدي عشان تختصر الوقت
وشدتني من يدي وقالت أنا راح أشرح لك كل شي موجود هنا عشان ترتاحين

أول شي أخذتني لقسم العطور و المستحضرات الصحية
لقينا عندهم انواع العطور والكريمات ومزيلات العرق ومبيضات البشرة

هدى: شفتي هذي العطور الرخيصة اللي ممكن تكون ريحتها فعلا حلوة وسعرها لا يتجاوز 5 ريال
يمكن ان تسبب متاعب وأمراض وأكدت العديد من الابحاث العلمية أن أكثر من 60في المئة من حالات الصداع وحساسية الجلد سببها يرجع الى العطور ، لذلك فإن الحديث عن تأثير العطور رخيصة الثمن على العقم بات صحيحا لدرجة كبيرة
أن التعرض لهذه المواد الكيماوية بكميات ضئيلة ولمدة طويلة أمر خطير ويسبب تزايد معدلات الإصابة بالأمراض السرطانية وخصوصا بين النساء. كما انها قد تسبب الادمان لاحتوائها على كحول بنسب عاليه.

إضافة ملمعات الأظافر والصابون والفقاعات ومعاجين الحلاقة ومزيلات رائحة العرق والفوط التي تستخدم لامتصاص الإفرازات والملطفات والشامبو وغيرها من منتجات الأناقة.
وكانت دراسة سابقة قد بينت أن استخدام بودرة التالك في مناطق الأعضاء التناسلية يرتبط بإصابة النساء بسرطان المبيض.
كما اكتشف الباحثون وجود علاقة بين سرطان الفم واللسان والحلق والكميات العالية من الكحول والسكرين والأصباغ ومادة كيميائية تسمى "PS60/80" الموجودة في عدة أنواع من غسولات الفم ( الرديئة) محذرين من بعض أنواع الصابون وسوائل غسيل الصحون ومنظفات المصابغ التي تحتوي على مواد كيماوية خطرة.
وأخيرا توصلت دراسة علمية قام بها فريق من الباحثين بجامعة هارفارد الأميركية إلى أن بعض المواد الكيماوية التي تستخدم في صناعة العطور لإطالة عمرها تحدث تشوهات بجينات الحيوانات المنوية، وبالتالي تؤدي الى عقم الرجال

مادة (SDS) الموجودة في مستحضرات التجميل الرديئة تسبب (السرطان) وتكوُّن المياه البيضاء للعين!!
كذلك تحتوي أنواع الشامبو المعتادة على مواد كيميائية عالية الخطورة أيضا، فكل شيء يلمس فروة الرأس يُمتص إلى المخ أولاً، فعلى سبيل المثال: عادة ما تُستخدم المواد المشتقة من كبريتات الصوديوم وSodium laurel sulfate في تصنيع الشامبو ومعاجين الأسنان ومنتجات العناية الشخصية الأخرى، ويمتص المخ هذه المواد بسرعة، ويؤدي تراكم هذه المواد إلى فقدان البصر في النهاية.

أخذت هدى علبة شامبو للأطفال تقليد على ماركة شهيرة وقالت:

شوفي هذي تقليد على نوع من أنواع الشامبو المخصصة للأطفال ولا تفرق عنها لكن ممكن تكون أخطر من الأنواع العادية من الشامبو؛ لأنها تحتوي على بعض من أسوأ المواد الكيميائية، ومنها مواد مخدرة لإخفاء تأثيرات المواد الكيميائية المثيرة للعيون.

ومرينا من عند رف وسحبت هدى منه كريم اسمه Dermovate قالت لي هذا مبيض للبشرة وجميع محلات أبو ريالين يبيعونه..
ويقولون أنه يبيض البشرة،طبعا هذا الكريم يسبب أضرار بليغة عند استخدامه، ممكن ضرره يمتد إلى الكلى ويسبب بفقر الدم، لأنه يحوي نسبة عالية من مادة «كورتيزون» الخطرة.

ومن الرف اللي جنبه سحبت معجون أسنان وقالت :
هذي المعاجين سامة وكانت من نوع Bes ، Smile2 Akura2 ، Shine Special2 ، Moonlight Zain وهذي تحتوي على مادة داي ايثلين جلايكول
السامة و هذه المادة تعتبر من المواد الضارة بصحة الأسنان ، وقد تم استخدامها في هذه الأنواع أكثر مما تسمح به هيئة الغذاء والدواء الأمريكية وهو 0.1 بالمائة ، مشيرة إلى أن هذه المادة تستخدم كمذيب ومانعة للتجمد،، كما تستخدم هذه المادة في أجهزة تبريد السيارات (الراديتر

طبعا هدى ما أنتظرت ردت فعلي هالمرة لا نظرات نارية و فتحة الفم لكن شدتني من يدي بسرعة وراحت قسم أدوات التجميل ولقينا عندهم بودرة خدود وظلال العيون الرخيصة اللي تحتوي على الوان جذابة ممكن تغري أي وحدة انها تشتريها خصوصا غلاء سعرها بالمحلات المتخصصة...

هدى:
ينبه الخبراء إلى وجود مواد كيماوية مسرطنة في أحمر الخدود والمستحضرات التي تخفي حب الشباب والندب وبودرة الوجه والماسكارا وظل العيون وأحمر الشفاه

و مستحضرات التجميل المقلدة غالباً ما تركز على الكحول بنسب عالية جداً.. اضافة الى احتوائها على تركيبات كيماوية تضاهي الروائح العطرية مؤكداً ان هذه المواد جميعها تسبب الحساسية او التهيج الشديد سواء في الجلد او الجيوب الانفية او فروة الرأس والشعر لمن يستخدمون مستحضرات نظافة مقلدة، و هذه المواد يمكن ان تتسبب في امراض جانبية تصل الى السرطانات الجلدية مشيراً الى ان استخدام هذه المستحضرات حول العينين تسبب هالات سوداء وحكة دائمة وبالتالي يحدث ترهلاً في الجلد يظهر في شكل تجاعيد اسفل العينين


شدتني هدى مرة ثانية وقالت لي تعالي اوريك الطامة الكبرى....

ودتني قسم ألعاب الأطفال
وقالت:
كثير من الاباء والامهات يشترون لعيالهم العاب رخيصة مثلا سيارة كبيرة يلاقون سعرها ريالين وبصراحة سعر مغري جدا خصوصا ذوي الدخل المحدود وكذلك كثير من المعلمين والمعلمات يشترون هدايا لطلابهم بكميات كبيرة من هذي المحلات لكن لو عرفوا الخطر اللي ينتظر عيالهم أو طلابهم هل ممكن يشترونها؟؟

بغض النظر عن رداءة الصناعة واللي من سهل كسر اللعبة ممكن خلال خمس دقائق واحتوائها على اجزاء صغيرة ممكن تضر بالطفل الصغير في حال ابتلاعها لا قدر الله لكن الخطر الحقيقي اكبر من كذا بكثير ...

بعض الالعاب مصنع من مادة الميلامين المقلدة يعني السامة وبعضها مصنع من مادة الرصاص أو النيكل السامة تخيلي طفل جلده يلامس هذي المواد السامة أو حتى يضعها في فمه.......!!!

ناظرت فيني هدى وقالت : ها يا أم سعد وسعود باقي شي تبين تشترينه من محلات أبو ريالين ؟؟

أنا : لو سمحتي هذي اسمها محلات القنابل الموقوته ...

هدى : هاه وش رايك لمن قلت لك راح تطلعين وانتي راضية ومبسوطة؟؟

أنا : بس عندي سؤال ........ ليش المسؤلين ساكتين عنهم ؟؟؟


هدى: ........................... الجواب اتركه للقراء ............. لكن حنا علينا توعية اللي نعرفهم ونحتسب الاجر عند رب العالمين....


تنويه : المعلومات والاحصاءات الواردة بالموضوع منتقاه من مقالات من صحف سعودية وعربيه ومنتديات
ونتائج ابحاث عالميه منشورة على النت وحبيت انشرها باسلوب شيق مع تصرف بسيط لا يمس جوهر المعلومة
أما القصة فهي من بنات أفكاري .... وعندما قلت في البداية إنها واقعية فأنا أعني المعاناة فهي واقعية وتحصل كل يوم وليلة مادام إن هذه المحلات المهلكة تمارس عملها بحرية وتنتشر إنتشار النار في الهشيم


تنويه 2

الموضوع كتبته للتوعيه والتنبيه فمن أرادت الأخذ به أو لا فهذه حرية شخصية ورجائي عدم ذكر أسماء أشخاص لا تربطني بهم علاقة وليس لي من هدف وراء هذا الموضوع غير التوعية طلباً للثواب من الله فالرجاء أخذ الموضوع بحسن نية وعدم تأويله لغير مقصده


والسلام عليكم ورحمة الله وبركاته





*************
43
5K

يلزم عليك تسجيل الدخول أولًا لكتابة تعليق.

تسجيل دخول

وجدوحنين
وجدوحنين
تسلمين على القصه وعلى بنات افكارك وكلامك مزبوط وفي محله
مايكبرني لقب
مايكبرني لقب
ياويلللللللللي منها هالهدى روعتني

ماخلت شي الا وحطت فيه علــه


الله يستر علينا من ابو ريالين

باقي سوق الشمال يعيبون عليه خخخخخخخخخ

استهبل

بس انا مايمر اسبوع الا وانا بابوريالين كذا فرجه

وبزراننا سبحان الله من يوم تقولين ابو ريالين فزوا من مكانهم يموتون فيه

بس الشكوى لله وحسبي الله على اللي مايخاف الله
cbc111
cbc111
ياليت الكل يقاطع محلات ابو ريالين وخاصه الاواني والالعاب خطيرررررررررره
اجتماعيه
اجتماعيه
ياويلللللللللي منها هالهدى روعتني ماخلت شي الا وحطت فيه علــه الله يستر علينا من ابو ريالين باقي سوق الشمال يعيبون عليه خخخخخخخخخ استهبل بس انا مايمر اسبوع الا وانا بابوريالين كذا فرجه وبزراننا سبحان الله من يوم تقولين ابو ريالين فزوا من مكانهم يموتون فيه بس الشكوى لله وحسبي الله على اللي مايخاف الله
ياويلللللللللي منها هالهدى روعتني ماخلت شي الا وحطت فيه علــه الله يستر علينا من ابو...
الله يسلم هاليدين اللي كتبت والعقل اللي ابدع..
اسلوبك جدا شيق ومعلوماتك جدا غنيه ...وكلامك كله سليم ..
وماقول الا حسبنا الله ونعم الوكيل في هالمسؤلين الغافلين عن مسؤلياتهم ..
{أم سلطان}
{أم سلطان}
جزاك الله خيرا
وبارك فيك
قرات موضوعك كاملا

00000000000000
مشششششششكوره