من تسلفني أمـــها علشان تروح معي لحفلة تخرجي

أنا مشكلتي باختصار أن أنا في ثالث ثانوي وحفلة تخرجي يوم الاربعاء الجاي وأستاذتنا المسؤلة عن الحفل عطت بطاقات دعوة للأمهات وقالت لنا أمهاتكم لازم يجون علشان نكرمهم وأنا أمي الله يرحمها ميتة من يوم كنت في خامس ابتدائي كانت أستاذتنا مرة مهتمة علشان يجون أمهاتنا للحفل...
قلت لمرت أبوي وترجيتها تروح معي للحفل قالت خلاص بروح معك أنا شوي وأطير من الفرح يوم قالت بروح معك قلت طيب إذا رحتي قولي لهم أن أنتي أمي لاتقولين أن أنتي مرت أبوي قالت لا أنا إذا رحت بروح بصفتي مرت أبوك مو أمك قلت خلاص لاتروحين مابي أحد يروح معي
اتصلت على عمتي وقلت لها عمتي الله يعافيك أبيك تروحين معي لحفلة تخرجي قالت ماشاء الله بتتخرجين مبروك بس والله أنا عندي زواج ولازم أروح له إن شاء الله إذا جاء زواجك أنا أول وحدة أجي فيه!! أصلا عمتي ماعندها لا زواج ولا شي والدليل أنها ماسألتني عن موعد الحفل
كيف تقرر أن عندها زواج في نفس يوم تخرجي وهي أصلا ماتعرف متى موعد الحفل!!
اتصلت على خالتي وتعذرت هي بعد رحت لأستاذتي وقلت لها أنا آسفة ياستاذة أمي ماراح تجي قالت ليش قلت هي معزومة في زواج قالت أنا أول مرة أشوف أم تروح للزواج وماتروح لحفلة تخرج بنتها قلت زواج بنت أختها يعني هي خالة العروس ولازم تروح قالت تحضر حفل تخرجك وبعدين تروح للزواج وبعدين الحفل ماراح يطول وقالت لي عطيني رقم جوال أمك قلت أمي ما معها جوال قالت طيب رقم بيتكم قلت تليفون بيتنا مقطوع قالت طيب رقم جوال وحدة من خواتك قلت أنا أكبر أخواني قالت طيب رقم جوالك قلت جوالي مقطوع قالت مو معقولة أنت ليش ماتبيني أكلم أمك أنتي ماسويتي شيء غلط بالعكس أنتي لازم تفتخرين قدام أمك وتقولين لها انك راح تتخرجين وبتفوق بعد قلت ماعليش ياستاذة أمي الله يرحمها ميتة من يوم كنت صغيرة قالت أنا آسفة والله ماكنت أدري أنا كنت أظن أن أمك مثل بعض الأمهات اللي مايهتمون بحفل تخرج بناتهم أنا آسفة مرة ثانية قلت لاعادي ماحصل إلا كل خير وطلعت من عندها ودمعتي على خدي أنا أحيانا أفكر وأقول أنا وش ذنبي إذا ماصارعندي أم تهتم فيني!! وش ذنبي إذا تخلوا عني أقرب الناس لي!! وش ذنبي إذا شفت صديقاتي كل وحدة تفخر بأمها إلا أنا!! وش ذنبي إذا الكل يناظرني بنظرات الرحمة!!وش ذنبي إذا شفت صديقاتي كل وحدة منهم جالسة بجنب أمها في حفل تخرجها إلا أنا جالسة لحالي!!
وأحيانا أفكر وأقول وإذا كنت يتيمة وش فيها أنا تخرجت من الابتدائي بتقدير ممتاز وحضرت حفلة تخرجي من دون أمي ولا أي أحد من أقاربي وتخرجت من المتوسط بتقدير جيد جدا وحضرت حفلة تخرجي من دون أمي وتقديري في ثالث ثانوي (علمي) النصف الأول ممتاز ونسبتي94%وراح أحضر حفلة تخرجي من دون أمي وإن شاء الله يقبلوني في الجامعة من دون أمي وإذا صرت يتيمة عادي مافيها شيء فية ناس كثير عندهم أمهاتهم وفاشلين في دراستهم وحياتهم أنتم معي ولا لا؟؟!