الله يعينج .. ويفرج كربج وهمج ..

الله يعينك يا أختي الموضوع يدوخ

بس إمسكي أعصابك قد ما تقدري لحد ما تعرفي إيش الموضوع

الله يريح قلبك وإن شاء الله يكون خير

اخواتي ترى ماابغى افتح موضوعي مع احد حتى لو ابغى مساعده واخويه كلمته وقال لي بكل برود ياشيخه تعوذي من ابليس انتو الحريم بلشه والله وامتحان
يعني اذا اخويه شافني تافهه وقهرني بكلامه اجل الغربا بيكونون احسن منه؟ وبعدين هذي مواضيع خاصه الى الآن حتى امي ماتعرف عنها شي ولا يمكن اجيب سيرة الشك وتغير زوجي لأحد لايمكن
لما احصل دليل ساعتها بقول لكل اللي حوالي تعالو اشهدو وتعالو احكمو
الحين مااقدر
انا سويت كل اللي قلتي عليه يااخت ابي رمشك يغطيني
والله سويت لكنه داهيه داهيه
تصوري يمسح كل المسجات من جواله وبعدين مايخلي في المكالمات الصادره والوارده اي رقم غير ارقام اصحابه المعروفين واعرفهم تماما
لايمكن يخلي شي والظاهر انه اصحابه قايلين له على الطرق اللي يتجنبها علشان محد يكشفه ودارس الموضوع زيييييييييين
والله ماتصدقون قد ايش هو داهيه
لدرجة اني نسخت كل الارقام بجواله عندي واتصلت عليها والحريم اللي بجواله كلهم نساء معروفات عندي ومسميهم باسمائهم يعني مالقيت اي رقم لحرمه باسم رجال نهائيا واتصلت من جواله وهو نايم بكل الارقام وبرضو مالقيت شي وفيه ارقام ماترد مره حتى لو اتصلت من جواله واتصلت من جوالات ثانيه ولا اعرف ليه
تعبت من هذي الطرق
مافي غير اني أأجر احد يمشي وراه اسبوع كامل بس انتو تعرفون الناس الغرب لما يتدخلون يبدأون في التمرد والاستغلال والابتزاز وانا ماابغى ادخل في هذي المشاكل
دلوني انصحوني
وبعدين هو يروح العمل يوقع وبعدين يطلع
وممكن جدا يكشف اي احد يمشي وراه ويضلله
ولاحظت شي ثاني عليه
لما نطب انا والعيال نخرج لمدينه ثانيه سياحه وتمشيه يتعذر ولما نصمم يتغير لونه وكأنه بيفقد روحه اذا خرجنا من المدينه
وانا استحمل واسكت
وكأنه ماله نفس يروح معانا
ولما اقول له رايحه مع اهلي او صديقتي واختبره الاقيه مايصدق وبعدين ابطل الاقيه يرجع يتأفف بينه وبين نفسه وانا بعيده عنه بس الاحظه مزبوط
آآآآآخ يالقهر وربي قهر وعذاب
والله ماكان كذا والظاهر انه انحسدنا فعلا مع ان كل اللي جنبي مبسوطين مع رجالهم زينا وواضح عليهم الراحه والانبساط ومشاكلهم قليله يعني يحسدونا ليه بالله ؟ لكن زوجي ماشالله باين عليه حبوب وجنتل مان ورقيق في تعامله مع الناس ويحب يخدم وخلوق وشكله انيق وخلقته حلوه ويمكن هذا السبب اللي يخلي البنات يجرون وراه ويعذبوني انا
تصورو مره وحده اتصلت بزوجي ولما رد عليها اعطاني الجوال وقال عليك بها تراها تغازل -- واخذت الجوال وهي لسى تتكلم وتقول - انا بصراحه لما شفتك اعجبت فيك وتعبت حتى جبت رقمك يااستاذ فلان وارجو انه معرفتنا تكون خاصه واتمنى اني مااسببلك مشاكل ولما سمعت صوتي كأنه جني ركبها - قفلت الخط ورجعت اتصلت عليها وماردت

شوفي حبيبتي لا انا ولا غيري يعرف زوجك اكثر منك عشان كذا احسن حل في البدايه اول شي ابتدي في نفسك ريحي نفسك من الشك والعذاب والجئي لرب العالمين هو وحده اللي قادر انه يرد عنك اي مكروه مو اهلك ولا جاراتك و لا اخوانك ولا اي حد تستأجرينه وتعطينه كل ماتمكلين اذا رب العباد مقدر عليك شي راح يصير او بيده انه يمنعه
ثاني شي حبيبتي انا عارفه اشكثر صعب موقفك بس والله ترى مابيدينا شي مع زوج من نوعية زوجك او مع اي زوج حط شي في راسه وبغى ينفذه لازم تقتنعين بهالشي وتسلمين فيه لانه لو راقبتي زوجك وتبعتيه مثلا واكتشف شو راح يكون موقفك منه ؟؟؟؟؟؟؟؟؟؟ خصوصا اذا ماقدرتي تمسكين عليه شي وفرضا راقبتيه ولقيتيه متزوج او متعرف على وحده فاسده شو بتسوين ؟؟؟؟؟؟؟؟؟ غير انك تحطمين نفسك وبيتك وكل العشره والحب اللي بينك وبينه ويمكن تكون نزوه او مجرد تقليد لصديق او اصحاب السوء وكان ناوي يتوب وبحركتك هاي دمرتي كل شي ............. طيب ويمكن يعرف انك تتبعينه او يشك ويظللك انتي او اللي يتبعه ويبين كانه حمل وديع ولا مسوي اي شي صح ولا لا ؟؟؟؟؟
عشان كذا ابتعدي عن اللي تسوينه واللي تفكرين فيه صفي عقلك وتعوذي من بليس وارجعي لبيتك وابو عيالك وعيالك مثل اول واكثر وخليك هاديه واكثري من الاستغفار وقيام الليل
واحب اقولك شي ياعمري من خلقة الدنيا وحواء تطارد الرجل وتخاف تفقده واكثر الرجال خصوصا بهذا الزمن لهم علوم وسوالف الله يستر منها بس نحن كحريم شو بيدينا نسوي ؟؟؟
اصبري وعطيه فرصه ولا تدققين وتفتشين بخصوصياته ترى انتي بتتعبين ادري صعب عليك تنفيذ اللي اقوله بس والله لو نفذتيه وضغطي على نفسك واعصابك بترتاحين وبتشوفين الامور من منظار ثاني
انا مابغي اطول عليك بس اتمنى اكون فدتك بشي قومي اللحين تسبحي وتعطري وبخري ثيابك وبيتك وشوفي عيالك ودشي مطبخك حضري لك اكله سنعه ورتبي وسنعي سفره حلوه واثقلي شوي علىابو عيالك لان الرجال اللي يغلط دايما اذا يحب زوجته مثل زوجك يعيش بصراع وتأنيب الظمير ويخاف انه يجرحك خصوصا اذا لقاك مو مقصره معاه ولا مبين انك حاسه بشي بس اللي شاك بزوجته انها تعرف شي في البدايه يخاف من ردت فعلها بس بعدين يحس انه مثل الهم وانزاح عن صدره سر وخلاص صار معروف وبيقول في نفسسه خلاص تراها بتعرف اليوم بكره او هي حاسه وعارفه ماتفرق معاه خلاص عشان كذا خليك عكس اللي يتمنى الصقي فيه وقربيه لك بحركاتك الحلوه وكلامك العسل الحسي مخه وتفكيره وبنفس الوقت لا تبينين قدامه اي شي ولا تبينين انك ميته عليه بالعكس حتى لو سالك قولي له انت حبيبي وعمري وحياتي واعرف انك تبيني وتحبني ولا تستغني عني ومتأكده انك راح ترد مثل الاول واكثر لاني حبيبتك وام عيالك خلي يالك يشاركونك اللعبه ويلصقون في ابوهم ويتدلعون عليه ويقولون له اشتقنا لك ونبي نقعد او نطلع معاك وحتى لو ماقالو انتي قولي له على السان عيالك وانهم مفتقدينه ومهما كان زوجك شاطر ترى غلطت الشاطر بالف وراح يغلط اذا كان مسوي شي
ولما يطلبك ابسطيه لااااااااااااااااخر درجه وريحيه على الاخر وسوي كل شي يحبه وشوفي النتيجه
موفقه انشاء الله

يا بعد عمري والله ماادري شقولج اي تصرف بتصرفينه ماتدرين شني تكون عواقبة

انا اقول صارحية .. ولاا تخلينه جذي على ابو انه تبين توصلين ل شنو اهوا يسوي على الاقل يمكن تنقذين ما يمكن انقاذه قبل مايوصل الشيئ لشيئ اكبر

واستشيري احد تعرفينه وتثقين برجاحة رايه وحكمة قراره

وطبعا قبل كل هذا استخيري الله سبحانة وتعالى وادعيه انه يهديج للتصرف الصح ويريك الحق حقا ويرزقك اتباعه ويريك الباطل باطلا ويرزقك اجتنابة


والله يريح بالك ويحل لك مشكلتك بالقريب العاجل يارب ويقر عينك بزوجك