اخباركم وعلومكم
اليوم بكتب لكم طريقة عنايتي بجسمي بخلطتي الخاصه
اللي بروحي اخترعتها وسويتها وحصلت على نتائج مبهره ولله الحمد والمنة
خلطتي راح تغنيكم بإذن الله عن كل شئ
لانكم من خلالها راح تحصلون على
النظافه
والتفتيح
والصفاء
والنعومه
والاشراق
لي اكثر عن 3 سنوات احين استخدمها وما شاء الله الحمدلله يا بنات مرتاحه عليها كثير
لان فعلا نتائجها حلوة ودائمة واشدد على كلمه دائمة يعني لو تركتوها ماراح ترجعون كسابق عهدكم لان قد صارت لي ظروف كذا مرة ووقفتها والحمدلله اموري طيبة مارجعت تشوهت
ومافي اسوأ من حالتي احين من شهرين قاعده بفراشي منكسرة رجلي ومسوية عملية وطبعا تعرفون ما اقدر استخدم خلطات نفس قبل والحمدلله حالي مثل ماهو ماتغير ولا حتى جسمي تأثر بغياب الخلط عنه
ايضا اختي وصديقاتي وجارتي وزوجة اخوي كلهم جربوها وحبوها كثير وللحين مداومين عليها خاصه زوجة اخوي استخدمتها حق زواجها وتخبلت عليها
والخلطه بنات تصلح للجسم وللوجه بإستثناء البشرة الحساسه طبعا وللمناطق الحساسه ايضا
ما بطول عليكم كثير نبدأ بالمكونات :
1 حبة صابونة ديتول الخاص بالبشره
واللي تبي تحط الاخضر الاصلي العادي ممكن تحطه
بس افضل للبشره لانها تعطي نعومه جدا حلوة
1 حبة صابونة بيبي جونسون
افضل هالنوعيه منها اللي تكون بيور بدون شئ
تقدرون تغيرون للنوعيه اللي تبي بس ترى يا بنات ماراح تفرق كثير
1 حبة صابونة الكركم
وهذي النوعيه افضل نوعيه على الاطلاق
لا تخدعكم الدعايات للانواع الاخرى
صديقتي الهنديه قالت لي هالمعلومة
1 حبة صابونة البابايا
انا استخدم هذا النوع بس اللي تبي تحط نوعيه ثانية مب مشكله ماتفرق
بس تتاكد انها زينة عشاان تعطي المطلوب منها
1 علبه صابون مغربي
معروف عند الكل
2 كيس ملح الحليب
2 كيس ملح البابايا
5 قارورات ماء ورد اصلي
هذي كل مانحتاج مكونات سهله ومتوفرة بكل مكان
نجي للطريقه وسامحوني يا بنات ماقدرت اصور لكم ادواتي
لان كاميرا تلفوني خربانه وايضا الكيبل مالها ضايع
بس استعنت ببعض صور النت واكيد بتفيدكم
واصلا الطريقه سهله جدا ومايبي لها شئ
اولا راح نحتاج الى وعائين كبار شوي ناخذ واحد منهم ونفضي فيه ماء الورد كلهم الـ 5 زجاجات بعدين نفضي عليهم اكياس الملح الـ 4 ونقلبهم شوي مع بعض ونخليهم على جنب
نجي للصابون اللي عندنا ناخذ مبشرة الجبن ونبتدي نبشر الصابونات اللي عندنا كلهم
وحاولوا تبشرونه على الصوب الصغير عشان يذوب لكم عدل بالخلطه بيتعبكم شوي بس ماعليه تحملوا ترى الخلطه من جد تستاهل
وكل ماتبشرون صابونه وتخلصونها صبوها على الخليط وقلبوه شوي خل يندمج زين
وبعد ماتخلصون كل الصابونات وتقلبونهم عدل تاخذون الصابون المغربي ايضا تضيفونه للخلطه وايضا قلبوه شوي
بعدين نجي للخلط الحقيقي وعن نفسي اريح روحي من هالمرحله باسرع وافضل واسهل طريقه للخلط وهي استخدام الخلاط الكهربائي
تاخذون جيك الخلاط وتعبون من الخلطه لين نص الجيك لا تكثرون لان الخلطه تتخمر مع الخلط وتزيد لذلك حطوا الين نص الجيك وخلطوها عدل عدل عدل وقد تكون الخلطه سميكه شوي زيدوها ماء حلو لا حد يحط ماء مالح ترى بتخربون كل شئ اذا احتاجت الخلطه لماء فزيدوها ماء حلو لين تصير لكم مثل الكريمة
بعدين صبوها في الاناء الثاني الفاضي وارجعوا من جديد عبو الجيك لين النص وهكذا لين تخلصون كل الخلطه اللي عندكم
بعد كذا عبوها بعبوات التخزين سواء كانت بلاستيكيه او زجاجيه ماتفرق الي عندكم حطوا فيه وتقريبا بيكون شكلها كذا
بس انتبهوا يا بنات لا تملون زجاجه التخزين عن آخرها عبوا لين ثلاث ارباع بس وخلوا الربع فاضي لان مثل ما قلتلكم الخلطه تتخمر وتزيد في الحجم
وتقريبا راح تحتاجون من 3الى 4 علب تخزين بحسب الحجم اللي بتستخدمونه
والخلطه بتكفيكم من شهر الى شهر ونص بحسب الاستخدام
بعد ماتعبون الخلطه خزنوها بمكان مظلم ودافي وجاف طبعا هي كلها صوابين مافيها شئ طبيعي لذلك ماتحتاج الى ثلاجه تتخزن باي مكان دافي وجاف ومظلم
بعد ثلاث ايام من التخزين تاخذون احدى العلب مع ليفه مغربيه وتدخلون للحمام اعزكم الله
استخدمت انواع مثيرة من الليف بس ما ارتحت الا لهذي الليفه مادي ليش وهي ترى مش اجبارية مع الخلطة كل وحده تاخذ الليفه اللي تناسبها وترتاح لها بس لازم تكون ليفه خشنه عشاان تنظف وتقشر عدل
المهم تدخلون الحمام اعزكم الله وتفتحون الشاور ماء دافي وتغسلون جسمكم فيه بعد كذا تسكرون الماء وتبتدون تاخذون من الخلطه وتدهنون كل الجسم كامل مع الوجه والمناطق الحساسه
بعد كذا تجيبون كرسي وتستريحون عليه
وهذا عشان تاخذون وقتكم وماتتعبون لان راح نفرك جسمنا بذمة وضمير سامعين يا حلوات بذمة وضمير
تفتحون صنبور الماء الحار وقد ماتقدرون او تتحملون تبللون الليفه بماء ساخن مب دافي لالالا نبي ماء ساخن
تبللونها شوي وتبتدون تفركون كل جسمكم بالليفه فرك نوعيه ممتازة لكامل الجسم
واللي تقدر تفرك وجهها ايضا بدون لا تخدشه زين و اللي ماتقدر تاخذ ليفه الوجه الخاصه من بودي شوب
وتفركون عدل بذمة وضمير
وبالنسبة للوجه افركوه برضو بذمة وضمير وحاسبوا لا يدش الصابون بعيونكم ترى يحرق حيييل
بتشوفون رغوه الصابون صارت رصاصيه وهاي دليل ازاله الاوساخ المترسبه على الجلد وازاله الالوان الزائده عن الجلد وايضا ازاله الجلد الميت والتنظيف بعمق
بعد ما تذبحون روحكم فرك افتحوا الشاور ماء دافي وكملوا فرك تحت الماي عشاان تروح الخلطه وتوابعها
يعني يا بنات بنفرك اجسامنها مرتين مرة بماء الليفه ومرة تحت الشاور
فركوا عدل لين تتخلصون من كل الخلطه كامل ويصير ينزل الماء نظيف مافيه اثر صابون
بعد كذا سكروا الماء الساخن واخذوا لكم شاور بارد لمدة دقيقتين مو اكثر وخلاص كذا خلصنا
تنشفوا وطلعوا
وفي اضاءة الغرفه راح تشوفون الفرق بعيونكم فرق في لون البشرة اولا
بعد ذلك يا بنات رطبوا جسمكم باستخدام المرطب المناسب كل وحدة تشوف اللي تحب وترطب جسمها كامل
عن نفسي انصح كل فتاة باستخدام افضل مرطب على الاطلاق واللي بعد اسبوع واحد بس يعطيك بشرة راائعه النعومة والرطوبة مثل بشره الاطفال واحلى
وهو جلسرين سائل + كريم جليسوليد الاحمر
تخلطونهم مع بعض بمضرب البيض عشان يصير اسهل لكم وتحتفظون به كمرطب دائم للجسم والله يا بنات اروع من هالشئ ما بتحصلون
وهذي ترى نصيحه مب اجباري مع الخلطه لا الترطيب بس اجباري بس نوع المرطب كل وحدة تختار اللي يناسبها
بعد ذلك انعموا ببشرة رائعه رائعه رائعه بمعنى الكلمة
نظافه
بياض
نعومه
صفاء
اشراقه
واذكروا الله علي وعلى انفسكم
بالنسبة للاستخدام فالشاطرة طبعا تقدر تستخدمها يوميا وهذي بتعطيها نتائج مذهله
والمتوسطة تستخدمها 3 مرات اسبوعيا
والكسوله مثلي ^_^ مرتين بالاسبوع
منقول من موقع الفراشه للأخت دبدوبه حفاضآ على الحقوق منو جربها تكفون ردو علي اعاني من التصبغات الجلديه طفشت ابغى حل لها ياليت تكون هالخلطه هي الحل وآآآآآآآآرتاح من عدم توحد الون وخاصه تكون كلها صوابين واسهل في الأستخدام وقت الأستحمام