من حقي اعاتب وازعل من اهل زوجي على هالموضوع ولا لا؟

السلام عليكم

عزيزاتي انا علاقتي باهل زوجي شبه رسميه يعني مش رسميه مره بس محاوله اني اكفي خيري شري مثل ما يقولون و لا اعاتبهم اذا قصروا معاي او غلطوا ولا اشتكي لريلي منهم اذا زعلوني

بس صار موقف كثير حز بخاطري

الاسبوع الي فات توفت وحده من اهلي الله يرحمها و يغفر لها والمهم انا كنت بزياره عند اهلي (اهل زوجي بديره ثانيه) وهم استخبروا مع اني من وصلت اتصل على حماتي اكلمها بس من صار العزا لا اتصلوا فيني يعزون او اي شي ولا كانه صاير شي.

سالت زوجي انت مخبر اهلك قال ايه مخبرنهم وانا ارسلت لهم مسج بالموضوع ومع ذلك ما اتصلوا او اي شي بتقولون اتصلو على الجوال مستحيل لانه دايم معي و حتى لو مغلق يعطي رساله بالمكالمات الي صارت والجوال مغلق
وبيت اهلي في كاشف يعني ما اتصلوا ابد ابد

وانا صراحه حاز بخاطري يعني لا عمري غلطت عليهم و لا عمري قصرت معاهم بشي

يمكن تقولون وش عليج منهم كلن يعمل باصله بس انا اقول لانهم بديره غير ديرتي و في هذيك الديره مالي بعد الله غير ريلي وهم والمفروض انهم اهلي ( او على الاقل دايم يرددون هالكلام لي)
بس ما شفت منهم اي تقدير

وانا بكره راده ان شاء الله تتصورون اعاتبهم على الموضوع ولا اطنش حاله حال باقي المواضيع الثانيه (مع اني في داخلي اشوفها كبيره شوي)

و اسفه على الاطاله بس كثير منكم اهل خبره وادري انكم ما راح تبخلون علي بشي