فالبدايه السلام عليكم ورحمةالله وبركاته
امسي عالجميع بالخير واتشرف اني انضممت للتو بركب عالم حواء الراقي والذي نتمنى ان يرتقي بنا الى حيث العلو والرفعه والامان في الدنيا والاخره
بصراحه تشدني كثير واحة الادب الشعبي
وبالمناسبه تذكرت جدتي كانت تقولنا سالفه قديمه اللي هي بين (إدغه)وضرتها هاذي إدغه اجودييييييه ومالها اذى على احد وعلى نياتها
المهم ضرتها صارت تقضي معظم اشغالها بالليل ع ضو السراج كله عشان(إدغه)ماتشوفها وتتعلم للامور مثل نسج الصوف ومن هالشغلات
تجيك السالفه
00000 ومره من المرات راحت الضره تدور على هوادي( الهوادي حصى يحط ع النار ويركب عليه القدر)
وهي قاعده تدور رفعت ذيك الحصاه إلا وذيك الحيه الملتويه رجعت الحصاه محلها وحطت في راسها (آآآآآه شوفو جت النذاله) المهم جمعت لها هوادي وراحت تزبط امورها جت المسيكينه إدغه تسألها من وين جبتي الهوادي هاالنذله دلتها على ذيك الحصاه اللي تحتها الحيه00000
راحت على نيتها وتررررررفع الحصاه يااااااااو وتشهق ذيك الشهقه من الفرح إلا والملتوي اثاريه مطاوي وش زينها تاخذ العقل (المطاوي زي محنا نقول اساور)
عااااد ضرتها مستانسه تفكر ان الحيه بتقرصها وترتاح
شوي وتناظر الا وادغه جاايه لابسه بيدها المطاوي والحصاه بيدها االثانيه
انننننجنت وماتت قهر ومرت الايام والنذله قاعده تنسج ذاك السدو ومن دون محد يشوفها يوم خلصت السدو واكتمل
وهي تجي هالمقروده تستعرض به عند هالمسيكينه تبغى تحرها
و(إدغه) مامن عرف وتسأل على نياتها وشلللللللون سويتيه
وهاذي النذله ماتابت وماطاح اللي براسها المهم وتشرح لها هاك الشرح (قالت روحي لذيك العواشز العوشز شجر مليان شوك والاولين دايما يعتقدون ان العواشز مكان للجنون)بسم الله الرحماااان الرحيم قالت خوذي كل الصوف اللي عندك وفليييييه على العواشز وقولي (ياعواشزي تناشزي)وخليه لاتجينه الا بكره
تبي صوف المسيكينه يتلبك بالشوك وينشب وتبغى الجيران يشوفون سكانة إدغه وضعف عقلها
0000000000000000000000000000000000000000000000000000000000000000000
رااااحت إدغه وسوت كل اللي قالتلها ضرتها خطوه خطوه وراحت بنت الحلال ورقدت بامان الله وهي ماتدري وش السالفه يوم صحت الفجر راحت للعواشز يوم جاااااااااات والا وهالجنون ماقصرو مظبطينه ومنزلينه لها بالارض هالخبيله اخذته وراحت بتوريه ضرتها
اش تتوقعون موقف ضرتها اتوقع جتها جلطه من القهر00000
شوفو الحظ على نياتها وحظها واقف ماشالله وصارت (إدغه)يضرب بها مثل الحظ ودايما جداتنا نسمعهن يقولن (ويليييييييييي حظ إدغه)
بصراحه احسها خرافيه بس حبيت انقلها لكم زي ماحكتها لي جدتي ربي يطول بعمرها على طاعته
اتمنى تروووووق لكم تحياتي
احتاجك بدنيتي @ahtagk_bdnyty
عضوة جديدة
يلزم عليك تسجيل الدخول أولًا لكتابة تعليق.
هام هام
•
والله حلوة بجد حكاية جدتك روعة فديت قلبك مبدععة
قطعه حلى
•
ههههههههههه
وسعتي صدري ..
عرفتها هاللي تكلمين عنها ,,حتى جدتي كانوا يقولون لنا عنها بس حنا يسمونها طغاة
((حظ طغاة ))كل شي تسويه غلط يطلع صح وهذا اظنه مثل ..
الله يعطيك العافية ..
وسعتي صدري ..
عرفتها هاللي تكلمين عنها ,,حتى جدتي كانوا يقولون لنا عنها بس حنا يسمونها طغاة
((حظ طغاة ))كل شي تسويه غلط يطلع صح وهذا اظنه مثل ..
الله يعطيك العافية ..
الصفحة الأخيرة