من خمس سنوات واكثر ادي ربي وماستجاب لي واظني عرفت السبب

بسم الله الرحمن الرحيم .. والصلاة والسلام على نبينا محمد وعلى اله وصحبه اجمعين

تخيلي عندك شغاله انتي جايبتها من ديرتها عايشه ببيتك تاكل من خيرك
وتركب سيارتكم ,,أكلها شربها نومها علاجها
ملابسها تجديد اقامتها معجون اسنانها كل شي عليك انتي توفرينه من احقر
شي لاكبر شي ..
وهالشغاله كلما تامرينها بشي تعصيك .. ولاجاء احد من برا امرها من الجيران
او غيرهم تطيعه .. تنفذ اوامر الناس ومعلق قلبها فيهم وانتي ماتحسب لك حساب
وان سوت لك شي سوته اي كلام وبدون نفس

وش تتوقعين ردة فعلك معها ؟؟ باحسن الاحوال بتقولين خوذي راتبك من اللي تطيعينهم
انا ليش اعطيك ريال ؟ اذا ماجلدتيها وعاقبتيها ولاسفرتيها لغير رجعه

وهذا حالي وحال اغلبنا مع الله سبحانه .. والدليل اليتيمه اللي بقولكم سالفتها الحين ان شاء الله

مايحتاج نقول هو اللي خلقنا ورزقنا ويعطي ويمنع ويعز ويذل .. كلنا نعرف افضال ربنا علينا
وقدرته فينا .. ونعرف ان ماعند الله ماينال الا بطاعة الله مستحيل تاخذين من الله شي غصب مستحيل
ومع كذا مانحسب لها الامر حساب

مع كذا لما طلعوا موضة رفع الشعر لفوق كنه سنام بعير كلنا معها .. وامر الله ؟ ورى الظهر
كلما طلعت موضه لشكل العبايه اتبعناها من الوان وموديلات .. وأمر الله .. ورى الظهر
موضة التعري بالمناسبات والتنانير القصيره والبناطيل اللي تفضح ماتستر .. وراها .. وامر الله بالستر
ورى ظهورنا
وش تتوقعون بيقول لنا لارفعنا ايدينا له سبحانه نبغاه يعطينا .. ؟ ماستجبنا له حتى يستجيب لنا

مالنا يد وسابقة فضل عنده .. ومالنا قدر لما ماحسبنا لأمره علينا قدر

لما قال زكريا عليه السلام رب لاتذرني فردا . . قال الله فاستجبنا (فاء الفوريه) يعني فورا استجبنا
لهم .. ليش ؟؟ انهم كانوا يدعوننا رغبا ورهبا وكانوا لنا خاشعين .. مهو عاصين ومضيعين

ولازلت اذكر اليتيمه اللي قد ذكرت لكم قصتها والله اني اعجب منها كانت لاام ولاأب وسمعتهم قبيحه
واختها دخلت السجن ولاعندها مال ولاجمال وكنت اسمع الناس يقولون من يبيها
وعايشه عاله على اقاربها والله يابنات رقت للسطح ورفعت يديها لله ودعت ماقامت دعوتها على ماذكر
شهرين ان ماخانتني الذاكره .. الاوهي تزف لرجل ماشاء الله شكله وراتبه عزها ببيتها ورزها قدام الناس
دللها حتى حفايظ عيالها يغيرهم .انا وامي سمعناه وهو يمدح فيها مدح .. سبحان الله ؟؟ بس يمدحها ماشاء الله
لاقوة الا بالله .. اللهم زدها ولاتنقصها لكن يابنات والله انها كانت تقيه حسب ماكنت اعرف من حالها قبل الزواج ...

فضل الله سبحانه واسع بس احنا ماتعرضنا لنفحات رحمته ..

اخواتي نصيحه اخيره ..

الحجاب امر الهي غير خاضع لايدي المصممين وصيحات الموضه وبيوت الازياء
اتقوا الله بالحجاب .. ماضرك اذا لبستي عباة واسعه وخاليه من الزينه
ماضرك اذا تجملتي عند الناس وبنفس الوقت كنتي رمز للرقي والعفه بعفافك والتزامك بطاعة الله ..
وأذكركم ونفسي بقول الرسول صلى الله عليه وسلم : صنفان من اهل النار وذكر نساء كاسيات عاريات
روؤسهن كاسنمة البخت المائله لايدخلن الجنه ولايجدن ريحها .. ماودنا نكون منهن ترى الدنيا بسرعه تخلص

وبعدين ماتدرين وش يصير بالدنيا يمكن يتعرض احد ابنائك او زوجك او انتي بنفسك
لحوادث الدنيا وترفعين يدك لله مايكون لك وزن عنده لانك ماعملتي لاوامره عليك وزن من قبل
اللهم خذ بنواصينا جميعا للبر والتقوى ووفقنا لما تحب وترضى .. واغفر لنا ماقدمنا وماانت اعلم به منا ..:26: